Ako ngāué mo e akoako ngāué (Training and apprenticeships)
‘Oku mau ngāue‘aki ‘a e lahi ko ia ‘emau polokalama langá ke fakalahi ai ‘a e ngaahi faingamālie ki he ako langá fakafou ‘i he ngaahi polokalama hangē ko ‘emau ngaahi polokalama akoako ngāué mo e ako‘anga langá.
Polokalama akoako ngāué
‘Oku ‘i ai ‘a e polokalama kateti (cadet) mo e akoako ngāue ‘a e Kāinga Ora ‘a ia ‘oku ngāue ai mo e ngaahi kautaha fakahoko akó mo e tauhí (pastoral care), ngaahi hoa ngāue langá mo e kau ngāue fakakonitukelí tokoní (sub-contractors) ke tokonia ‘a e kakai Nu‘u Sila ‘oku nau fie kau ki he akoako ngāue ki tu‘á, ‘o tokoni‘i kinautolu mo ‘enau ‘enau ngaahi ngāue‘angá ke fakalahi ‘enau lavame‘á.
Talu mei hono kamata ‘emau polokalama akoako ngāué ‘i he 2019, kuo laka hake ‘i he kakai Kiwi ‘e 250 kuo ola lelei ‘enau hū atu ki ha ngaahi ako kateti (cadetships) mo e akoako ngāue mo ‘emau ngaahi hoa ngāué ‘i he kotoa ‘o ‘emau polokalama langa fale ‘a e pule‘angá. ‘Oku mau feinga ma‘u pē ke fakangāue‘i ha kakai fefine, Mauli mo e Pasifika, mo ha kau kasitomā, ki he akoako ngāué. ‘I he ‘emau ngaahi mahu‘inga lalahi fo‘oú, ko e 50% ‘o e kau akoako ngāué kuo pau ke ha‘u ia mei he ngaahi kulupu ‘oku fakamu‘omu‘á.
‘I hono tokoni‘i ko ia ‘o e kakai Nu‘u silá ke nau kau atu ki he ngaahi ngāue ki tu‘á, ‘oku fakataumu‘a ai ‘a e Kāinga Ora mo hono ngaahi hoa ngāué ke fakatupulaki ‘a hono tukuange mai ‘o e kau ngāue langa ‘a Nu‘u silá, pea ‘i he taimi tatau, fa‘u mo ha ngaahi falenofo‘anga pule‘anga lahi ange mo tokoni‘i ai ‘a e tu‘unga lelei ‘o e mo‘ui ‘a e kakaí mo e ngaahi komiunitī ‘i he koló.
Ko e ngaahi hoa ngāue ki he ‘emau polokalama akoako ngāué ‘oku kau ki ai ‘a e Building & Construction Industry Training Organisation (BCITO), ko e Ministry of Social Development (MSD), mo e New Zealand Institute of Skills and Technology. ‘Oku mau toe ngāue foki mo e ngaahi kautaha fakahoko ngāue ‘i he koló, ‘o tokonia ai ‘e honau tokolahi ‘a e ngaahi komiunitī Maulí mo e Pasifikí.
Ngaahi Ako‘anga Langá (Building Academies)
‘Oku hoa ngāue ‘a e Kāinga Ora mo e ongo ako‘anga langa ‘e ua, pea mo e Unitec ke fakalahi hono tuku atu ‘o e ngaahi ‘apí mo ‘oatu ‘a e ngaahi faingamālie ako ki he to‘utupú. Ko e Massey High School Building Academy mo e Dargaville High School Building Academy ‘okú na ‘oatu ha halanga ma‘á e to‘utupú ke nau hū ai ki he ngaahi ngāue ki tu‘á (trades) mo ma‘u ai ‘a e ngaahi taukei ‘i he ngāue fakatufungá, palamá mo e ngāue faka‘uhilá, lolotonga hono supavaisa ‘e ha kau ngāue langa mo ha kau faiako. ‘Oku langa ‘a e ngaahi ‘apí ‘i he ngaahi ‘apiakó, pea toki fetuku ki he ngaahi feitu‘u ‘oku fiema‘u ki ai ha ngaahi falé.
Ko ‘emau hoa ngāue mo e Unitec te ne tuku atu ha ngaahi ‘api ‘e lava ke fetukutuku holo ‘e fā ‘a ia ‘e langa ‘e he fānau ako ‘i he ‘apiako ‘i Mt Albert.
MATES (Kaungāme‘a) ‘i he Langá
Ko e sekitoa ki he langá ‘oku mā‘olunga taha ai ‘a e tuunga ‘o e taonakitá ‘i he kotoa ‘o e ngaahi nāue‘anga ‘i Nu‘u Silá, pea ‘oku tui ‘a e Kāinga Ora ‘e lava ke tokoni ki hono fakaivia ‘o e kau ngāue langa ‘osi ma‘u tikite ‘oku nau fekuki mo e palopalema ki he ‘atamaí ke nau ma‘u atu ha tokoni ‘i he taimi te nau fiema‘u aí. Ko e ‘uhinga iá ‘oku mau fengāue‘aki ai mo e MATES in Construction ko e kautaha ngāue ‘ofa ki he faka‘ehi‘ehi mei he taonakitá mo e mo‘ui lelei ‘a e ‘atamaí ‘i he 2020.
Ko e polokalama MATES in Construction, ‘a ia ‘oku tukuatu ‘i he ngaahi feitu‘u ‘oku langa ai ‘a e Kāinga Ora, ko ha polokalama faka‘ehi‘ehi mei he taonakitá ‘i he feitu‘u fai‘anga langá ‘o tataki ‘e he ngaahi ngāue‘anga langá pea ‘oku fekau‘aki mo hono faka‘ai‘ai ‘a e kau ngāue langá ke nau fetokanga‘aki mo kumi, ‘eke pe ‘oku fiema‘u mo tali ‘a e tokoní ‘i he taimi ‘oku fiema‘u aí. ‘Oku fakataumu‘a ke langa hake ‘a e ngaahi pōto‘i mo e ‘ilo‘ilo ko ia ‘i he mo‘ui lelei ‘a e ‘atamaí pea mo fakakau eni ki he ngaahi ngāue faka‘ahó.
Ko e MATES in Construction kuo fakamatala‘i ia ko ha fakatātā ‘o e founga ngāue lelei taha ‘i he faka‘ehi‘ehí ‘e he World Health Organisation (WHO) ‘i he ‘enau tohi kuo pulusi ko e Live Life: An Implementation Guide for Suicide Prevention in Countries(external link).
Construction Plus
Fakafou ‘i he Construction Plus, ‘oku tokoni ai ‘a e Kāinga Ora ki he ngaahi komiunitī kuo uesia ‘e he langa fakalakalaka ‘i he feitu‘u ‘i koló, ‘aki hono fakafehokotaki ‘a e kakaí mo e akó, ma‘u ngāué mo e ngaahi faingamālie ‘i he ngaahi ngāue‘angá ‘i ‘Okalani mo Nu‘u Silá. ‘Oku fakafehokotaki ‘e he polokalamá ‘a e fānau ako kolisí mo ‘emau ngaahi hoa ngāue sivilé Piritahi pea ‘oange ai mo e ngaahi faingamālie ki ha taukei ngāue.
Polokalama ‘i he Potungāue Pilīsoné
‘Oku toe tokoni mai kiate kimautolu ‘emau hoa ngāue mo e Potungāue Pilīsoné ke ‘unuaki kimu‘a ‘a hono fakalahi ko ia ‘o hono tuku atu ‘o e ngaahi fale māfana mo mōmoá.
‘Oku ngāue ‘a e Kāinga Ora mo e Pilīsone ‘i Rolleston mo Spring Hill ‘i ha polokalama ‘a ia ‘oku ma‘u ai ‘e he kau pōpulá ‘a e ngaahi pōto‘i ngāue langa lolotonga ‘o e ngāue ki hono toe fakasanisani fo‘ou ‘o e ngaahi ‘api nofo‘anga ‘a e pule‘angá ‘i he ngaahi konga kelekele ‘oku tu‘u ‘i he pilīsoné. ‘Oku toki fakahiki leva ‘a e ngaahi fale nofo‘anga ko ‘ení ki he kelekele ‘a e Kāinga Ora ke hoko ko e ngaahi ‘api ki he ‘emau kau kasitomaá. Kuo fakalahi ‘a e polokalama ko ‘ení ke fakakau ki ai ‘a e ngaahi ‘api nofo‘anga fo‘ou ‘a e pule‘angá kuo langa ‘i he ngāue fakataha ko ‘ení.
Kuo fakafo‘ou ‘a e peesí: 23 Fēpueli 2024