‘Ilo Fo‘oú (Innovation)

‘Oku mau ngāue fakataha mo homau ngaahi hoa ngāue ki he langa fakalakalaká mo e langa falé ke fa‘u ai ha ngaahi founga fo‘ou ke fakalahi ‘a hono tuku atu ‘o e ngaahi fale tu‘unga leleí mo fo‘oú ka e kei ma‘u pē hono tu‘unga ma‘ama‘a fakapa‘angá mo fakapapau‘i ‘a ‘ene fakatupu mo‘ui leleí mo e tu‘unga lelei ki he mo‘u‘i ‘a kinautolu ‘oku nofo aí.

Kuo ‘osi ngāue fakataha ‘emau ngaahi timi ‘ilo fo‘oú mo e Scion, BRANZ, Callaghan Innovation mo e ngaahi kautaha kehe ‘oku nau tataki ‘a e ngāue‘angá ni. ‘Oku kau ‘i he ngaahi faingamālie kuo mau ngāue ki ai ki ha tekinolosia, ngaahi founga ngāue mo e ngaahi koloa fo‘ou ‘e ala hoko ha motuhia ki aí ‘oku kau ki ai ‘a e: 

• Fakatotolo fakaloto-falé mo e ngaahi polokalama langa fakalakalaka ki he ngaahi nāunau langá mo e ngaahi sisitemí
• Ko ha fakava‘e GIS ke fakatātaa‘i ai ‘a e tāfeá, ‘ilo fakatekinikale ki he kelekelé mo e ngaahi palani fakafeitu‘ú ‘i he ‘īmisi satelaite 3D, ke lava ai ‘o ‘analaiso ‘a e tu‘unga lavame‘a ‘o e ngaahi fakakaukau 3D ki he langa falé
• Fetongi ‘o e ngaahi aleapau langa fale taautaha ‘aki ha Ngaahi Aleapau Langa Fale ta‘u lahi, ke ‘oatu ai ki he ‘emau ngaahi hoa ngāué ‘a e ongo‘i pau ‘oku nau fiema‘u ke fakalakalaka mo fakalahi ‘enau ngāué
• Fakavave‘i ‘o e vaha‘a taimi ki he fakangofuá ‘aki ha ngaahi fa‘unga fale angamaheni mo lava ke toutou fakahoko mo tomu‘a tali ‘oku ‘i he tu‘unga Lifemark mo e Homestar
• Hoa ngāue mo e Piritahi ke fakataha‘i ‘a e ngaahi ngāue sivile ‘oku fiema‘u ke teuteu‘i ‘o e kelekelé ki he langa ‘i he ‘emau ngaahi langa fakalakalaka lalahí.

‘Oku mau fakalahi ‘emau faka‘aonga‘i ‘o e nāunau ‘oku ngaohi ‘i he feitu‘u kehe mei he feitu‘u ‘oku langa ai ‘a e falé ko ha founga langa, fakataha mo hono ngāue‘aki ‘o e fa‘u fakakongokongá (modular design) mo e ngaahi nāunau langa fakatekinolosia hangē ko e papa lōlahi‘í (cross-laminated timber).

‘Oku lahi ‘emau ngaahi ‘api motu‘a ange ‘oku hauhausia mo faingata‘a hono fakamāfana‘í. ‘Oku mau fakafo‘ou ‘emau ngaahi fale nofo‘anga lolotongá mo langa ha ‘api fo‘ou, mo fakaeonopooni ‘a ia ‘oku fakapotopoto ange ‘enau faka‘aonga‘i ‘a e ma‘u‘anga iví mo e vaí. Te ne ngaohi ai heni ‘emau ngaahi fale nofo‘angá ke fakatupu mo‘ui lelei ange ki he kau ma‘u ‘apí mo e palanite foki. ‘Oku hulu atu ‘emau ngaahi ‘api fo‘oú ‘i he ngaahi fiema‘u ki he Tu‘utu‘uni Langa Falé (Building Code). ‘Oku ngaohi ‘e he ngaahi maama ‘okú ne fakapotopoto‘i ‘a e ma‘u‘anga iví, ngaahi nāunau ki hono faka‘aonga‘i fakapotopoto ‘o e vaí, ‘aofi fakamāfaná mo e sio‘ata lōuá ‘a ‘emau ngaaahi ‘apí ke māfana mo ma‘ama‘a ange.