Liliu ki he tūkungá
‘I hono fakahā mai ‘i he taimi pē ‘oku hoko ai ha liliu ki ho‘o ngaahi fokotu‘utu‘u ki he nofó pe pa‘anga hū maí, ‘e lava ai ‘e he Kāinga Ora mo e Ministry of Social Development (Potungāue ki he Fakalakalaka Fakasōsialé) ‘o fakapapau‘i te ke lava ‘o ma‘u ‘a e tokoni lelei taha ‘oku ‘atā atu kiate koé.
Ko e liliu ki he pa‘anga hū maí mo e fa‘ahinga ‘oku nofo ‘i ho ‘apí te ne lava ‘o uesia ho tu‘unga ‘i he fakahokohoko ‘i he tohi lēsisita ki he fale nofo‘anga ki he fa‘ahinga ‘oku mā‘ulalo ‘enau tu‘unga fakapa‘angá pe ko e lahi ‘o e totongi nofo te ke totongí.
Pe ‘oku ke lolotonga talitali ki ha ‘api Kāinga Ora pe lolotonga nofo ai, fakahā ki he Ministry of Social Development fekau‘aki mo ha ngaahi liliu ‘i he vave taha te ke ala lavá ‘aki ‘a e fetu‘utaki ki he:
- Work and Income ‘i he 0800 559 009 pe
- Ngaahi Sēvesi ki he Kau Toulekeleká ‘i he 0800 552 002 kapau ‘oku ke lahi hake ‘i he ta‘u 65.
Ko e hā ha liliu ki he tūkungá?
Ngaahi liliu ki he pa‘anga hū mai ‘o homou ‘apí pe tokolahi ‘o e kakai ‘oku nofo ‘i ho ‘apí. Ko e fakatātaá, fakahā ki he Ministry of Social Development kapau ‘oku mavahe ha kupu ‘o e fāmilí mei ‘api, pe kapau ‘oku liliu ‘a e pa‘anga ‘oku ke ma‘u mei he ngāué, ha penefiti pe nofo totongi pooti (board) ‘i ho ‘apí.
Kapau ‘oku ke ‘i he tohi lēsisita ki he fale nofo‘anga ki he fa‘ahinga ‘oku mā‘ulalo ‘enau tu‘unga fakapa‘angá pea kuó ke ma‘u ha ‘api ‘i ha feitu‘u kehe, kātaki ‘o fakahā ia ki he Ministry of Social Development(external link) ‘i he vave tahá koe‘uhí ke nau to‘o koe mei he lisi talitalí.
Te ke lava ‘o sio ki he fakamatala ‘oku tauhi fekau‘aki mo koé ‘i ha fa‘ahinga taimi pē. Kapau ‘oku fehālaaki, te ke lava ‘o kole ke liliu ia.
Kuo fakafo‘ou ‘a e peesí: 4 Siulai 2023