Fanga monumanu pusiaki/lalata

Ko e Kāinga Ora ko ha lenilooti ia ‘okú ne talitali lelei ‘a e monumanu pusiakí

‘Oku mau ‘ilo ‘oku lelei ‘a e feohi mo e fanga monumanu pusiakí/lalatá pea ‘oku mau fiema‘u ke hokosia ‘e he ‘emau kau nofo totongí mo honau ngaahi fāmilí ‘a e ngaahi lelei lahi ‘o hono ma‘u ha monumanu pusiaki.

‘I hono ma‘u ha monumanu pusiakí, ‘oku loto lelei ai ‘a e kakai nofo totongi ‘a e Kāinga Ora ke muimui ‘i he ngaahi lao ‘a e kōsilio fakakoló pea, kapau ‘oku nau nofo ‘i ha ‘apaatimeni, ‘oku nau talangofua ki he ngaahi tu‘utu‘uni ‘o e sino ngāue ‘oku kaunga ki hono tauhi ‘o e fanga monumanu pusiakí ‘i he falé.

Hoko ko ia ko ha tokotaha tauhi monumanu pusiaki leleí

Hangē pē ko e kotoa ‘o e kakai tauhi monumanu pusiaki ‘i Nu‘u Silá, ko e fatongia ia ‘a e kakai nofo totongí ke māpule‘i, tokanga‘i ‘a e mo‘ui lelei mo e tu‘unga lelei ‘o e mo‘ui ‘o ‘enau monumanu pusiakí - ‘oku kau ki heni kae ‘ikai fakangatangata ki ai ‘a e:

• me‘akai,
• vai,
• fakamālohisino,
• ngaahi mo‘ua ki he faito‘o ‘o e monumanú,
• fakahū ‘o ha me‘angāue faka‘ilonga faka‘ilekitulōnika ki he sinó (microchipping),
• ngaahi huhu malu‘í,
• to‘o ‘o e ‘ōkani fakafanaú,
• lēsisita,
• malu‘i meí he ponú mo e
• faito‘o kutufisí.

Ke tokoni‘i ‘emau kau nofo totongí ke hoko ko ha kau tauhi monumanu pusiaki leleí ‘oku mau ‘oatu ha ngaahi fakakaukau tokoni mo e fale‘i mo fakalotolahi atu kiate kinautolu ke nau fekumi ki ha toe fakahinohino lahi ange mei he ngaahi kautaha fekau‘akí.

Kapau ‘oku ‘i ai ha‘o ngaahi hoha‘a fekau‘aki mo ha monumanu pusiaki

Kapau kuo ngaohikovia ha monumanu pusiaki pe ‘okú ke hoha‘a fekau‘aki mo e tu‘unga lelei ‘o ha monumanu pusiaki, fetu‘utaki ki he SPCA(external link).

Kapau ‘oku ‘alu holo ha kulī ‘i he halá, kālou longoa‘a ‘i he ‘ahó kakato, fakakina pe ‘ohofi ha taha, fetu‘utaki ki he va‘a ngāue Māpule‘i ‘o e Fanga Kulií (Dog Control) ‘a e kōsilio fakakoló.

Lau ha fakamatala lahi ange fekau‘aki mo e tauhi ‘e ha tokotaha nofo totongi ha monumanu pusiaki ‘i honau ‘apí.