Ngaahi Totongí

‘Oku mau fiema‘u ke ngaohi ki he faingofua taha ‘e ala lavá ho‘o tauhi ho‘o ngaahi totongi nofó mo e ngaahi mo‘ua kehé, ‘I he peesi ko ení te ke ma‘u ai ha ngaahi fakaikiiki ‘aonga ‘e ni‘ihi, ka te ke malava ma‘u pē ‘o fetu‘utaki mai kiate kimautolu kapau ‘oku ‘i ai ha‘o ngaahi fehu‘i.

Totongi malu‘í/pooní (bond)

‘E ‘ikai ke ‘eke atu ‘e he Kāinga Ora  ha totongi malu‘i ‘i he taimi te ke hiki mai aí - ‘oku mau fiema‘u ke fakafaingofua‘i ‘a e hiki mai ‘a e kakaí ki ha ‘api māfana, mo mātu‘ú, ko ia na‘a mau ta‘ofi hono fakahoko ení ‘i ‘Epeleli 2019.

Totongi ki he Nofó

Ko hono totongi kei taimi ho‘o totongi nofó ‘e lava ke ke hao ai mei he hoko ‘o fu‘u mafasiá. Ko hono ta‘etotongi ha ngaahi totongi ‘e ni‘ihi ‘e ala hoko ai ‘o hā ngalingali ‘e ‘alu ke toe kovi ange ‘a e ngaahi me‘á, ko ia ai fetu‘utaki mai kiate kimautolu kapau te ke hoha‘a nai fekau‘aki mo ho‘o malava ko ia ke totongi kei taimi iá.

Kapau ‘oku ke ‘ilo ‘e ‘ikai te ke fakahoko ha fo‘i totongi nofo pe ‘oku ‘osi hoko ia, te tau lava ‘o alea‘i ha palani te ne fakafaingofua‘i hono totongi iá pea ‘uhinga ia ‘e ‘ikai ke ke maumau‘i ho‘o aleapau ki he nofo totongí. Telefoni mai ‘i he 0800 801 601 kapau ‘oku fiema‘u ha tokoni.

Totongi nofo ‘oku tokoni mai ki ai ‘a e pule‘angá

Kapau ‘okú ke totongi ha totongi nofo ‘oku tokoni mai ki ai ‘a e pule‘angá, ‘e vakai‘i ia e he Ministry of Social Development (MSD) ‘i he ta‘u kotoa, fakafuofua ki he taimi na‘a ke hiki mai aí.

Hili ‘enau vakai‘i iá, ‘e faitohi atu ‘a e MSD ke talaatu pe ‘oku liliu ho‘o totongi nofó pea ko e hā ‘a e ngaahi liliu ko iá. ‘E ‘oatu leva ‘e he MSD ha foomu ke ke fakafonu fakafuofua ki he māhina ‘e fā kimu‘a ‘i he taimi ‘oku fiema‘u ke lliu ai ho‘o totongi nofó.

Kapau ‘oku ‘ikai ke ke fie tohi kole ki he totongi nofo ‘oku tokoni mai ki ai ‘a e pule‘angá, pe ‘oku laka ho‘o pa‘anga hū maí ‘i he fakangatangatá, ‘e ala ‘uhinga ia ‘oku fiema‘u ke ke totongi ‘a e totongi fale ‘i he māketí ki ho ‘apí.

Manatu‘i ke talamai ‘i he vave tahá kapau ‘oku liliu ho ngaahi tūkungá.

Ki ha fakamatala lahi ange

• Telefoni ki he Ministry of Social Development ‘i he 0800 559 009.
• ‘Oku nau toe ma‘u foki ha fakamatala lahi ange, kau ai ‘a e ngaahi fehu‘i ‘oku fa‘a ‘eké, ‘i he ‘enau uepisaití(external link)

Malu‘í

Malu‘i ‘apí

‘Oku ‘i ai ‘a e malu‘i ‘a e Kāinga Ora ‘okú ne malu‘i ho ‘apí kau ai ‘a e, maumau mei ha ngaahi fakatamaki fakaenatula hangē ko e ngaahi afā, tāfea mo e ngaahi mofuike.

‘Oku ‘ikai ke fiema‘u ia ke ke totongi ‘a e maumau mei he ngaahi me‘a ko ení. ‘E talaatu ‘e ho‘o Aleapau ki he Nofo Totongí [PDF, ] ‘a e malu‘i ‘oku fakahoko ki ho ‘apí.

Maumau ki ho ‘apí

Kapau te ke fakatupunga ha maumau ki ho ‘apí, hangē ko e fahi ha matapā sio‘ata, ‘oku fiema‘u ke ke fetu‘utaki mai kiate kimautolu ‘i he 0800 801 601 ke tau talanoa ki ha ngaahi founga.

Malu‘i ki he ngaahi nāunau/koloa ‘i loto ‘i ha ‘api

‘E fiema‘u ke ke totongi ha malu‘i ‘o ho‘o ngaahi nāunau/koloa ‘i ho ‘apí, mahalo ko ho‘o tv nai, mohengá pe valá. ‘E lava ke ke talanoa ki ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá ‘a ia te ne lava ‘o ‘oatu ha ngaahi fili ‘o e ngaahi kautaha fakahoko ngāué.