Poloketi tetele o atinaega o le taulaga
E silia ma le 40,000 fale fou, mafanafana ma matū lelei o fuafuaina e le Kāinga Ora mo le atunuu atoa ma e auala atu i poloketi tetele o atinaega o le taulaga. E faafefiloi ituaiga fale o le a maua i le isi 20 tausaga o sosoo ai mai fale e faatupe se vaega e le malo, fale tumaoti ma faasolo atu i fale e gafatia na totogi.
O lo o fuafuaina e Kāinga Ora le fau o fale e fou, mafanafana ma matū e silia ma le 40,000 i le atunuu atoa i le isi 20 tausaga o sosoo ai, e faaaoga ai fanua e lei faaaogaina muamua – ma e faafefiloi ai ituaiga fale e umia e le malo, fale tumaoti, ma fale e gafatia na totogi (e pei o le Kiwibuild).
E ausia le faamoemoe lenei, i galuega faapaaga a le Kāinga Ora ma fai atinae faufale, pulega faalotoifale, iwi ma matagaluega a le malo e faataunuu poloketi e eseese lona lautelega mo le atinaega o taulaga.
O lo o faia galuega e faataunuu ai atinae tetele e ono i Aukilani - Hobsonville Point, Northcote, Roskill, Oranga, ma Mangere, ma le tasi atinae tele i Porirua. E iai fanua tetele e lei faaaogaina muamua ua faia ai atinae i Te Kauwhata, Waikato ma Tauriko i Tauranga.
O lo o galulue faatasi le Kāinga Ora ma le Tāmaki Regeneration Company e faaopoopo fale e fau i Point England, Panmure, ma Glen Innes i sasae o Aukilani. E faapena foi galuega faapaaga ma Ngāti Toa ma le Porirua City Council e faataunuu atinae tetele i Sasae o Porirua.
E le gata i le faaopoopo o le aofaiga o fale fou e tulaga lelei, e aofia ai ma fale e gafatia na totogi e pei o ituaiga e maua i le Kiwibuild, o poloketi nei ua maua ai avanoa e toe faaleleia ai atinae tetele, fesootai lelei ai tuaoi mai le tasi lotoifale i le isi, ma faamanaia atili ai nofoaga faitele mo tafaoga.
E tāua le maua i nofoaga, aai ma taulaga o isi mea e ese mai mea na fau e tagata, e tusa ma faiga o matou faaaogaina e atiae ai taulaga. E iloa le lelei o fuafuaga e atiae ai taulaga i le tau aofia ai o faiga tuai, talisapaia o agaifanua eseese o tagata o nofoia pitonuu nei ma faaleleia ai le siosiomaga. O le mafuaaga tonu lena o le galulue vavalalata ma tagata e faamautinoa le aogā o taunuuga mai atinae ua matou faia ma e lagolagoina le tofa mamao a le Kāinga Ora mo le fau o fale sili ona lelei, mananaia, faapea afioaga ma tagata.
Fai se kopi Faateleina le aofaiga o fale mo Tagatanuu Niu Sila [PDF, 6.1 MB]
Nofoaga Atinaega o le Taulaga
E tutonu Hobsonville Point i le penisula e 167 heta le telē o le talafatai o Upper Waitematā, ma na o le 20 minute le mamao e alu ai le taavale agai atu i matu i sisifo o Aukilani. E silia ma le 80 tausaga na avea ai ma nofoaga autu a le Defence Force ma o lo o iloga ai talaaga o lea pulega tele i fale tetele tuai ma laau matutua o ola ai, ma e faigofie foi ona feoai ai taavale. E lua auala tetele e mafai ona uia ai ma taula ai feoaiga a vaa e malaga atu i Nofoaga Tutotonu mo Pisinisi.
Vaitaimi faatulagaina o le poloketi: Fuafuaina le faauma lelei i le 2025/2026
- Pe ā ma le 4,500 fale e mafai ona nofoia e le 11,000 tagata i le taimi e uma ai
- O se nofoaga faitele mo tafaoga e aofia ai malae mo tafaoga e 26 heta le lautele, faiga eseese faafefiloi e faaaoga ai le uafu (o lo o faia i ai galuega) ma le auala savali i le talafatai e 5km le mamao
- O se faataitaiga o le faalautelega o laufanua o nofoia i nofoaga tu lata i le taulaga i totonu o Aukilani
O matu o Aukilani e tu ai Northcote, ma e tutonu i tua atu o le Auckland Harbour Bridge, ma e 15 minute le mamao e alu ai le taavale mai le Nofoaga Tutotonu mo Pisinisi. E lelei tele fesootaiga mo feoaiga lautele, ma o lo o fuafuaina le faaleleia atili o auala e feoai ai pasi. Na o le 10 minute le mamao e alu ai le taavale mai nofoaga tu lata i ai agai atu i faleoloa ma nofoaga mo tagata tafafao i Takapuna ma e lelei ma saogalemu le matafaga mo taelega. E tele malae mo tafaoga ma taaloga, ma e avea Northcote ma nofoaga e fai ma mitamitaga o le toatele o aiga ua loa tausaga o soifua ma ola ai.
Vaitaimi faatulagaina o le poloketi: Pe ā ma le tolu tausaga e faauma lelei ai
Galuega toe faaleleia mo fale:
- Na suia fale tuai a le malo o iai i le taimi nei e 380 i fale fou a le malo e 480
- Fausia le 1,200 o fale e gafatia na totogi ma fale e maua i fefaatauaiga faamaketi
- Talosia e uma ifo le poloketi ua maua fale fou e 1,700
O saute sisifo o Aukilani, e tu tonu ai Mt Roskill, e maua ai nofoaga tetele ma le manaia ma auala e fesootai ai feoaiga, ma e nofoia e mau tagata eseese. Pe ā ma le 6.5km le mamao mai le Nofoaga Tutotonu mo Pisinisi, ma e faigofie mo feoaiga lautele. E le mamao foi mai le malaevaalele i Aukilani, ma o se tasi o nofoaga tele mo galuega, ma e iai se fuafuaga o le nofoaga tonu lea o le a uia e tamai nofoaafi. E tele ai fale a le malo ua tatau ona toe faafou.
E aofia i atinae o faia i Roskill le Roskill South, Ōwairaka, Waikōwhai ma lotoifale o Wesley, ma e tele isi lotoifale o faamoemoe e aofia ai.
Lotoifale Roskill South
O Roskill South o se tasi o pitonuu i Aukilani e pito sili ona toatele ai ituaiga tupuaga eseese, ma e fou pe a faatusa i isi vaipanoa e tuaoi i ai. O le lotoifale lenei e tu ai le May Road Primary School, Turner Reserve, Winstone Park ma le Freeland Reserve. E mafai ona savali i le Mt Roskill Grammar school ma le Mt Roskill Intermediate School.
Vaitaimi faatulagaina o le poloketi: Pe ā ma le lima tausaga e faauma lelei ai
Galuega toe faaleleia mo fale:
- Na suia fale tuai a le malo e 290 i fale fou a le malo e 330
- Fausia le 600 o fale e gafatia na totogi ma fale e maua i fefaatauaiga faamaketi
- Talosia e uma ifo le poloketi ua maua fale fou e 1,000
Lotoifale Ōwairaka
Na o le 8km le mamao e sau ai mai le taulaga tele i Ōwairaka ma e pue gofie auala mo feoaiga lautele e malaga ai i le Nofoaga Tutotonu mo Pisinisi.
E tau i le Waterview (SH20), ma faafaigofie ai ona taunuu i le malaevaalele i Aukilani ma isi nofoaga autu e pue ai le pasi. E maua ai le tele o auaunaga faalotoifale, aoga ma is nofoaga faitele mo tafaoga, faapea malae mo tafaoga, fanua faasao ma malae taalo.
Na amata muai fau fale i le vaitaimi o le 1950 na maua ai fale a le malo e 200. Pe ā ma le 60% o fale i Ōwairaka e umia e le Kāinga Ora.
Vaitaimi faatulagaina o le poloketi: Pe ā ma le lima tausaga e faauma lelei ai
Galuega toe faaleleia mo fale:
- Na suia fale tuai a le malo e 225 i fale fou a le malo e 280
- Fausia le 900 o fale e gafatia na totogi ma fale e maua i fefaatauaiga faamaketi
- Talosia e uma ifo le poloketi ua maua fale fou e 1,200
Lotoifale Waikōwhai
E silia ma le 5,000 tagata mai soo se tupuaga ma atunuu o nofoia Waikōwhai, ma e tutonu lava i saute o le Nofoaga Tutotonu mo Pisinisi i le faasiusiuga o Dominion Road i Mount Roskill. E lelei aoga, malae mo tafaoga, fale taalo ma auala mo feoaiga lautele i le lotoifale lenei ma e tele faamanuiaga mo tagata mai se faalapotopotoga e lē maua ni tupe faasili e ta‘ua o le Oasis hub.
E sopoia le tuaoi i saute ma le Manukau Harbour i Waikōwhai Bay. O Waikōwhai Park ma le Wattle Bay Reserve o tu lata ane e ola ai se vaega tele o vaomatua maoi e maua i le Taulaga o Aukilani, ma e 10km le telē o le taamilosaga i le Waikōwhai Walkway mo savalivaliga faapea ma le auala savali i augutu o le talafatai. E fa aoga i totonu o Waikōwhai: Hay Park School, Monte Cecilia Catholic School, Waikōwhai Primary ma Waikōwhai Intermediate, ma isi aoga e lē mamao mai le pitonuu lenei.
E tau le iloa le aulelei o Oranga o tutonu i Aukilani, e 9km le mamao i saute sasae o le Nofoaga Tutotonu mo Pisinisi ma e lata i nofoaga tutotonu mo galuega i Greenlane ma Penrose. E lata i le taulaga o Onehunga, ma e fetaui lelei ma fuafuaga e fia faalautele ai fesootaiga mo feoaiga i le lumanai. E lata foi i nofoaga tu lata i le taulaga e tele ai fale o nofoia e tagata e pei o One Tree Hill, Greenlane, Ellerslie ma Royal Oak, ma e tofu pitonuu uma nei ma aai laiti. E 2 minute e ave ai le taavale po o le 15 minute e savali ai mai Oranga agai atu i le Cornwall Park, o le malae lauiloa i le matagofie, i Maungakiekie (One Tree Hill), Aukilani.
Na muai faia atinae i Oranga ma le faamoemoe e avea ma nofoaga e maua ai fale a le malo e faataamilo pei o se faaofuofu tulaga o fale. O le tele o fale na fau i le 1940, ma toe faaopoopo isi fale na fau i le 1980, 90 ma le 2000.
Vaitaimi faatulagaina o le poloketi: Pe ā ma le valu tausaga e faauma lelei ai
Galuega toe faaleleia mo fale:
- Na suia fale tuai a le malo e 400 i fale fou a le malo e 500
- Fausia le 600 o fale e gafatia na totogi ma fale e maua i fefaatauaiga faamaketi
- Talosia e uma ifo le poloketi ua maua fale fou e 1,100
E tutonu i saute o le aai, ma o se tulaga lelei mo tagata faigaluega ma pisinisi e aofia ai le Mangere Centre, le Malaevaalele i Aukilani i le itu i saute, Otahuhu i le itu i sasae ma le Manukau Centre i le itu i saute sasae. E tu lata i ai iunivesite e lua: MIT i le Manukau Centre ma le AUT South Campus i Otara.
Na amata fau fale i Mangere i le vaitaimi o le 1960 ma e tusa ma le 20,000 fale a le malo na fau ai. E sili atu ma le tasi mai le lima fale e umia e le Kāinga Ora i le taimi nei i Mangere. E aofia Mangere West ma Aorere i galuega o tau atiae ai Mangere, ma o tau fuafua le faaopoopo o nofoaga i se taimi o le lumanai.
Lotoifale Mangere West
E tumu loaloa Mangere West i le mau ituaiga tupuaga eseese ma se vaega toatele o tagata Pasifika. E iai le Mangere College, Moyle Park ma se vaitafe i le taulaga: Te Ara-rata Creek. E sao gofie ma e 6km le mamao o Mangere West mai le malaevaalele i Aukilani ma e le atoa le 2km le mamao mai le South-Western Motorway ma le Mangere Town Centre.
Vaitaimi faatulagaina o le poloketi: Pe ā ma le lima i le fitu tausaga e faauma lelei ai
Galuega toe faaleleia mo fale:
- Na suia fale tuai a le malo e 230 i fale fou a le malo e 340
- Fausia le 600 o fale e gafatia na totogi ma fale e maua i fefaatauaiga faamaketi
- Talosia e uma ifo le poloketi ua maua fale fou e 950
Lotoifale Aorere
O se lotoifale manaia mo aiga, ma e tele ekalesia ma lotu i Aorere faapea ma aoga maualuga faaiunivesite e tau lata i ai, e pei o Aorere College e le mamao pe a savali ai. E tele mea e aogā ma faafiafiaina ai tagata o nofoia le lotoifale e pei o auala eseese mo feoaiga ma nofoaga faitele mo tafaoga,
e aofia ai Aorere Park ma Mangere Town Centre.
Vaitaimi faatulagaina o le poloketi: Pe ā ma le lima i le fitu tausaga e faauma lelei ai
Galuega toe faaleleia mo fale:
- Na suia fale tuai a le malo e 137 i fale fou a le malo e 160
- Fausia le 340 o fale e gafatia na totogi ma fale e maua i fefaatauaiga faamaketi
- Talosia e uma ifo le poloketi ua maua fale fou e 500
E 12km le mamao Tāmaki mai le Nofoaga Tutotonu mo Pisinisi i Aukilani ma e fesootai lelei i auala mo feoaiga faitele ma atinae tetele.
E iloa atu ai laufanua matagofie e fetaui ma manaia mo faafiafiaga ma faatasiga tetele ma e iloa atu ai le Tāmaki River ma Mt Wellington. E 900 heta le telē o galuega e toe faaolaola ai le taulaga pito telē i Niu Sila ma e sopoia ai totonugalemu o sasae o Aukilani e tau lata i le taulaga i Glen Innes, Point England ma Panmure.
O se vaega o le aai o Porirua le itu Sasae, e 24 kilomita le mamao mai matu o Ueligitone. O Porirua le tasi o taulaga i Niu Sila e pito tele ai fale a le malo, ma o se vaega tele o fale nei na fau i le vaitaimi 1960 ma le 1970.
Ua tele ina tuai, le aogā ma e le fetaui ituaiga fausaga ma lautelega faapenei ma manaoga o aiga Porirua i le taimi nei, ma le lumanai. Ua avea le tatala ai o le Transmission Gully, ma teuteuga na faia i le Porirua City Council’s District Plan ma le faatuputupulaia o le faitau aofai o tagata o le a nofoia Porirua i le lumanai, ua talafeagai ai le faataunuu loa i le taimi nei o fuafuaga tetele e maua ai se siosiomaga e soifua ma ola lelei ai tagata — e amata atu i le augatupulaga lenei ma faasolo atu i augatupulaga fai mai.
Ua vave lava feoaiga i le va o Aukilani ma Hamilton talu ona fai auala fou, ma e tu lata ai atinaega o le Lakeside i Te Kauwhatai le matagofie o le Lake Waikare.
- Pe ā ma le 1,650 fale tutasi ma fale piilua o le a maua i le isi valu i le sefulu tausaga o sosoo ai.
- E tusa ma le 20% o fale ua faavasega i ituaiga e gafatia na totogi, ma o le taimi nei e $650,000 le tau o le fale e tolu potumoe.
- Pe ā ma le 75 heta o le a taatia ese e avea ma fanua faasao ma faataufusi.
- E ono kilomita le mamao mo savalivaliga ma tietiega uila.
- E 223 le aofai o fale ua fuafuaina le fia fau po o faagasolo ona fau i le taimi nei.
- Ua uma ona faatau atu fale e 70 mai fale ua uma na fau.
O lo o faagasolo nei galuega faufale i le vaipanoa o Lakeside, ma e aofia ai se falekofe, aoga tulagalua fou, malae taalo mo tamaiti, nofoaga mo ofisa ma faleoloa ma le mau paka mo taavale. E le mamao ma Te Kauwhata o se vaipanoa mautu e ui atu i le auala na faalautele i Rimu Street, na tatala ia Aperila 2022.
Galulue faatasi ma Kāinga Ora – Faataunuu Atinaega o le Taulaga
O atinae tetele ua matou sauni atu e faataunuu o le a maua ai avanoa e tele ma faiga fou e fau ai fale.
O se tasi o fuafuaga a le Kāinga Ora le tau atiae o tuaoi ma vaipanoa e gafataulimaina ma lelei atoatoa le fausaga, e maua ai fale tulaga ese le lelei ma nofoaga mo tafaoga. O le a maua nofoaga tetele e silia ma le 1,200 i le isi 15 tausaga o sosoo ai auā le faataunuu o le faamoemoe e fau ai fale e 40,000 ma ona tupu.
E iai le vaega ua ta‘ua o le Developer/Housing Provider Group mo paaga e aiaina atinae e lesitala ai aemaise pe afai o fia maua fanua mo galuega tau atiae e tusa ai ma le Development Agreement na faia ma le Kāinga Ora – UDD. E tatala avanoa i paaga uma o aiaina atinae e lesitala, ma e le afaina le telē po o le laitiiti o lau kamupani.
Mo nisi faamatalaga i auala e mafai ai ona tatou galulue faapaaga, imeli mai i le procurement-UDD@kaingaora.govt.nz.
Uma na faafou le itulau: 19 October 2022