Fesoasoani Tupe Muai Fale Faatau
Tagai i faamatalaga e te iloa ai pe faamata e te agavaa ma tuuina mai sau talosaga mo se vaega tupe e oo atu i le $10,000 e faatau ai le uluai fale mo oe.
E te ono agavaa mo se Fesoasoani Tupe Muai Fale Faatau, pe afai ua atoa le tolu tausaga o au saofaga mo lau KiwiSaver. E faalagolago se aofaiga e te maua i tulaga e pei o lau tupe maua ma le ituaiga fale e te manao e faatau mai.
E mafai ona tuuina mai talosaga a o lei maua se fale ua e manao i ai po o le uma ai ona talia o sau tauofoga, ae e fautuaina malosi lou talosaga muamua mo se muai faamaoniga. E taofi ai le taumatemate ma vave faagaioi ai le faagasologa o faia.
O tulaga nei e tatau ona e ausia mo se Fesoasoani Tupe Muai Fale Faatau:
- sili atu ma le 18 tausaga o lou matua
- e itiiti ifo lau tupe maua mai le faatulagana o tupe maua i le 12 masina talu ai
- e lē o se fale po o se fanua, e aofia ai se fale e umia e sou toalua po o se toalua faapouliuli. E lē aofia ai le umia o se fanua Māori
- ua atoa le 3 tausaga pe sili atu o le vaitaimi faatulagaina maualalo o saofaga na faia i le KiwiSaver (po o le complying fund po o le exempt employer scheme)
- faatau mai se fale i le tau faagata faatulagaina o le itumalo e faatau mai ai
- ua e malie e te nofo i lou fale fou mo le umi e le itiiti ifo ma le 6 masina.
E tatau foi ona e faamautinoa le ausia o tulaga moomia mo meatotino mo le fale po o se fanua ua e manao e faatau mai. E te maua nisi faamatalaga i le vaega ‘O le ā le ituaiga fale e mafai ona ou faatauina mai?’ i le itulau o le tafailagi lea.
Afai sa fai au saofaga i se superannuation scheme e ese mai le KiwiSaver, ona e faafesootai mai lea i le 0508 935 266 e te iloa tonu ai pe faamata e agavaa ai le vaega o e fai saofaga i ai.
Tulaga moomia o tupe maua
I le 12 masina talu ai a o lei faia sau talosaga, e tatau ona e maua se totogi e:
- $95,000 pe itiiti ifo a o lei toesea le lafoga mo se tagata faatau toatasi
- $150,000 pe itiiti ifo a o lei toesea le lafoga mo se tagata faatau toatasi ma e toatasi pe toatele atu tagata ola faalagolago ia te ia
- $150,000 pe itiiti ifo a o lei toesea le lafoga mo le toalua pe toatele atu tagata faatau, ma e le faitaulia ai le aofaiga o tagata ola faalagolago.
O se tagata o tausia isi e ola faalagolago ia te ia ma e nafa ma le tausiga faavaitaimi po o le tausiga tumau o se tamaitiiti, tamaiti, po o isi tagata matutua o ola faalagolago ia te ia o nonofo faatasi e le o mafai ona ola tutoatasi. Afai ua atoa le 18 tausaga le matutua pe ua matutua atu ē o ola faalagolago ia te oe, ona e faailoa mai lea o mafuaaga e faalagolago ai le tausiga o i latou nei ia te oe. E le avea le tuuina mai o faamaumauga e lagolagoina ai tulaga tau tupe o le a ausia ai le faaupuina o se matafaioi mo le tausiga o tagata e ola faalagolago.
Tulaga moomia saofaga KiwiSaver
E tatau ona e toaga e fai au saofaga mo le KiwiSaver mo le umi faatulagaina maualalo e 3 tausaga.
- O le saofaga maualalo faatulagaina o iai nei e 3% o le aofaiga atoa o lau tupe maua po o se aofaiga e le itiiti ifo ma le $1,000 i le tausaga (o fea lava e maualalo atu).
- E le moomia le sosoo o tausaga e 3, pau lava le mea ia atoa le 3 tausaga o au saofaga uma na fai. Mo se faataitaiga, afai ua atoa le 3 tausaga na e fai saofaga ai i le KiwiSaver ae leai se tupe teu na faia mo le 6 masina, o lona uiga e te le agavaa mo se Fesoasoani Tupe Muai Fale Faatau seia atoa le isi 6 masina o au saofaga na fai.
- E tatau ona toesea saofaga mai galuega uma o maua ai au tupe maua, ae lē na o le galuega autu o maua ai tupe maua.
- Afai e leai sau galuega e maua ai se tupe maua, e moomia ona e faia saofaga e le faamalosia e le itiiti ifo ma le $1,000 i le tausaga, mo tausaga taitasi e leai se tupe maua na maua ai.
- Afai o e faigaluega mo oe lava po o e maua se penefiti ma o faia saofaga e le faamalosia, e moomia ona e faia saofaga faatasi i le tausaga mo tausaga e 3 e le itiiti ifo ma le 3% o lau tupe maua faaletausaga po o se vaega tupe e le itiiti ifo ma le $1,000 i le tausaga (o fea lava e maualalo atu).
- Afai na e tuufaatasia saofaga e toesea sa‘o mai au tupe maua faatasi ma saofaga e le faamalosia, e moomia na maua ai se aofaiga atoa e le itiiti ifo ma le 3% o le aofaiga atoa o au tupe maua faaletausaga po o se vaega tupe e le itiiti ifo ma le $1,000 i le tausaga (o fea lava e maualalo atu).
Aiaiga o tupe faamau
E tatau ona e tuuina mai faamaoniga o tupe faamau e le itiiti ifo ma le 5% o le tau e faatau mai ai le fale ua e manao e faatau po o le tau e fau ai se fale.
E mafai ona aofia ai tupe:
- mai lau KiwiSaver mo le muai faatau o se fale
- o se Fesoasoani Tupe Muai Fale Faatau ua faamaonia/muai faamaoniga
- o faaputu i le faletupe
- na totogi ai le meatotino
- faameaalofa atu ai se isi o lou aiga.
E tatau ona e tuuina mai se tautinoga atoa, pe afai o e faaaogaina tupe na faameaalofa atu.
Tautinoga foai faameaalofa Fesoasoani Tupe Muai Fale Faatau [PDF, 26 KB]
Afai sa e umia muamua se meatotino
E ono mafai i ē sa umia muamua fale i Niu Sila po o atunuu mamao ona talosaga mo le Fesoasoani Tupe Muai Fale Faatau. Na o le faatasi lava ona mafai ona e maua le Fesoasoani Tupe Muai Fale Faatau po o le faiga na faia muamua, le fesoasoani tupe KiwiSaver HomeStart po o le saofaga tupe teu KiwiSaver.
Afai na e umia muamua se fale ma ua e manao i le Fesoasoani Tupe Muai Fale Faatau, e moomia ona e ausia tulaga e agavaa ai, ma e tatau ona faamalieina tulaga nei:
- e leai ma se vaitaimi muamua na e maua ai le Fesoasoani Tupe Muai Fale Faatau po o le fesoasoani tupe KiwiSaver HomeStart / saofaga tupe teu KiwiSaver
- leai ni aseta mautinoa e sili atu ma le 20% le tau aogā o le aofaiga e faagata ai le tau o fale o iai nei i le vaipanoa o e manao e faatau mai ai.
Mo se faataitaiga, afai o e faatauina mai se fale i se vaipanoa e faagata le tau i le $400,000, e le mafai ona sili atu ma le $80,000 le tau aogā o au aseta mautinoa.
E faamatala aseta mautinoa o au meatotino e mafai ona faatauina atu e faatupe ai se fale o fia faatau mai, e aofia ai:
- teugatupe i faletupe (e aofia ai tupe teu tumau ma tupe teu faavaitaimi)
- sea, oloa ma noataga
- tupe teufaafaigaluegaina i faletupe po o isi faalapotopotoga tau tupe
- faatuputeleina ai sea a se sosaiete
- vaa po o kalaveni e sili atu ma le $5,000 le tau aogā
- isi taavale (e pei o ituaiga uilaafi tuai po o taavale e le masani na e fealuai ai)
- o isi aseta taitasi e sili atu ma le $5,000 le tau aogā
- tupe faamau na totogi ai le sui lesitala fanua faatau.
E le mafai ona avea le KiwiSaver ma aseta mautinoa.
E mafai ona faaaoga le Fesoasoani Tupe Muai Fale Faatau e faatau ai se fale fou po o se fale o iai nei e oo atu le tau aogā i le tau e faagata ai le tau o fale i le tou itumalo.
E aofia i fale fou ituaiga fale nei:
- fale faatoa uma na fau po o se fale na fesiitai e faatu i se isi nofoaga ma e lei atoa le 12 masina talu ona avatu se tusi faamaonia o tulafono laiti a o lei faia se talosaga mo le Fesoasoani Tupe Muai Fale Faatau
- fasi fanua tuufua o fuafua e fau ai se fale
- faatauina mai fuafuaga faatino o se fale ma fanua po o se apitaga i totonu o se nofoaga tele.
Tau faagata o fale
E faagata le tau e faatau atu ai se fale i le tau pito maualuga mo se fale fou po o se fale o iai nei/fale tuai ma e faalagolago i le itumalo o maua ai le fale. E faalagolago itumalo uma i le Tuaoi Pulega Faaitumalo.
Tagai i faatulagana o tau faagata o fale
Tulaga moomia mo meatotino
E tatau ona faatulaga le tau o le fale i le tau faagata faatulagaina o le itumalo e faatau mai ai.
E tatau ona e nofo ai pea i lou fale mo le umi ia lē itiiti ifo mai le 6 masina mai le:
- aso na e faatauina mai ai lou fale (o le aso na aloaia ai), po o le
- aso na tuuina atu ai se tusi faamaonia o tulafono laiti mo le fale, pe afai o se fale fou.
E lē tatau ona e umia se isi fanua po o se fale i le taimi nei. E aofia ai se fanua o umia e lou toalua po o se toalua faapouliuli o mafaufauina lou nofo ai po o le faatauina atu. E lē aofia ai le umia o se fanua Māori.
Afai o tou faatauina faatasi ma isi tagata se fale, e tatau ona tutusa lelei le aofaiga e faatau e tagata taitasi.
Afai e te faatauina mai i se faiga tumaoti (e lē auala atu i se sui lesitala fanua ma fale), e ono moomia lou tuuina mai o faamaoniga e iloa ai na e totogia se aofaiga e sa‘o ma tau o faatau atu ai fale i le maketi, mo se faataitaiga o se tau fuafuaina faamauina.
Afai o e faatauina mai se fale o iai nei
E faamatalaina fale o iai nei o soo se fale ua silia ma le 12 masina talu ona uma na fau ma faamaonia.
E mafai ona e maua le $1,000 mo tausaga taitasi o tausaga e 3 (pe sili atu) na e fai saofaga ai, pe afai o e faatauina mai se fale o iai nei. E $5,000 le telē o se aofaiga e te maua mo le 5 tausaga pe sili atu.
O fale uma ua silia ma le 12 masina talu ona tuuina atu i ai se tusi faamaonia o tulafono laiti a o lei faia se talosaga mo se Fesoasoani Tupe Muai Fale Faatau e faatulaga i le vaega o faamauina ai fale o iai nei.
E tatau ona aofia tulaga nei mo se fale:
- e le o sili atu ma le tau pito maualuga e faagata ai le tau e faatauina atu ai mo fale tuai/fale o iai nei
- mafai ona nofoia mai le aso na aloaia ai
- o le fale lea e avea ma ou nofoaga tumau mo le umi e le itiiti ifo ma le 6 masina mai le aso na aloaia ai.
Afai o lo o e faatauina mai se fanua e fau ai se fale
E mafai ona e maua le $2,000 mo tausaga taitasi o tausaga e 3 (pe sili atu) na e fai saofaga ai, pe afai o e faatauina mai se fale fou po o se fanua e fau ai se fale. E $10,000 le telē o se aofaiga e te maua mo le 5 tausaga pe sili atu.
E tatau ona e maua se muai faamaoniga mo se Fesoasoani Tupe Muai Fale Faatau a o lei faatauina mai se fanua.
E tatau ona e:
- tuuina mai lau talosaga i totonu o le 4 vaiaso a o lei aulia le aso e aloaia ai le umia o se fanua
- faia se fuafuaga e fau se fale pe fesiitai se fale e faatu i le fanua i le taimi lava ua maua ai se muai faamaoniga
- tauaaoina le faamaumauga sainia o le maliega faatauina atu ma faatauina mai
- tuuina mai se konekarate sainia o le tau faatulagaina o le fale e iloa ai tupe alu mo le galuega e fau ai ma aso o fuafuaina e amata ma faauma ai le galuega
- tuuina mai kopi o faamaumauga uma e fesootai i ai e pei o fuafuaga faatino o le fale ma faamatalaga patino
- lava tupe e faauma ai le galuega e fau ai le fale ma e le silia ma le tau talafeagai faagata o le fale.
Afai e leai se tau faatulaga mo se galuega e fau ai talu ai o lena e te fuafua e fau e oe lava po o le fau o se vaega o le fale, e moomia na e tuuina mai se lipoti a le tagata suesue fanua ma fale o faaali ai le tau atoa e fau ai le fale. Matou te moomia foi se kopi o le Tautinoga Aloaia e pei ona faatulafonoina i le Owner-Builder Status Section 45, 87A & 90D o le Building Act 2004, e maua atu mai le tou Pulega faalotoifale.
E tatau ona faaaoga le fale:
- o se fale e nofo tumau ai. E le agavaa ituaiga fale e mafai ona fesiitai e pei o fale pipii i se taavale, kalaveni po o se ituaiga tutusa mo le fesoasoani tupe
- avea ma ou nofoaga tumau mo se vaitaimi e le itiiti ifo ma le 6 masina mai le aso na tuuina atu ai le tusi faamaonia o tulafono laiti.
E le silia le aofaiga tuufaatasi o tupe alu mo le faatauina mai o le fanua ma le galuega e fau ai le fale ma le tau talafeagai faagata o le fale.
E tatau ona i ai le fanua i se tulaga e mafai ai ona fau se fale. Afai e leai, e tatau ona aofia tupe alu e faagaioia ai le fanua i se tulaga e mafai ai ona fau se fale.
Afai o fesiitai se fale o iai nei e faatu i se fasi fanua fou
E moomia na e tuuina mai se tusi faamaonia o tulafono laiti mo le fale o le a fesiitai e faatu i le fanua, ma ia lē sili atu ma le 12 masina mai le aso na saini ai a o lei aulia le aso e fai se talosaga mo se fesoasoani tupe.
E moomia ona e tuuina mai faamaumauga nei:
- se kopi o le faamaumauga sainia o le maliega faatauina atu ma faatauina mai
- faamaoniga o le tupe alu na faatau mai ai ma feaveai ai le fale
- se kopi o le tau ua faatulaga e fau ai le fale ma e manino lelei ai le tupe alu atoa ma vaitaimi fuafuaina e faauma lelei ai le galuega i tulaga e talia ma talafeagai ai i le nofo
- se tusi faamaonia o tulafono laiti pe a mavae le aso na fesiitai ai le fale e faatu i le fanua.
Afai o e faatauina mai se fale i luga o le fuafuaga faatino
E tatau ona e:
- nofo ai i le fale po o le apitaga i totonu o se nofoaga tele mo le umi e le itiiti ifo ma le 6 masina talu mai le vaitaimi na faauma lelei ai se galuega e tusa ma aiaiga e tatau ona tausisia ma le aso na aloaia ai
- tuuina mai kopi o fuafuaga faatino o le fale ma tulaga patino o le fale
- tuuina mai se kopi o le konekarate ua sainia o faaali ai tulaga nei:
- faamatalaga auiliili o le fale o fuafuaina
- o le tau e faatau mai ai
- aso fuafuaina e amata ma faauma ai se galuega e fau ai, e aofia ai ma le aso e faalēaogāina ai.
A e faatauina mai i luga o fuafuaga faatino o se fale, e ono mafai ona matou totogi atu le fesoasoani tupe a o lei aulia le aso e aloaia ai e fesoasoani i se uluai tupe o fia totogi po o le faagaioia o se tupe totogi. O tulaga faapenei, e tatau ai ona taofia le fesoasoani tupe i se tausi mavaega, se faamaumauga aloaia o teu i se isi paaga po o se faiga tai tutusa, ae totogi na o le tupe i le fai atinae faufale i le aso e aloaia ai. O tulaga nei e tatau ona e faatalanoa ma lau loia ma le fai atinae faufale.
Afai o fau se fale i fanua e umia e Māori
E moomia ona e tuuina mai se kopi e faamaonia ai lau aiatatau e nofoia ai le fanua Māori.
E mafai ona e faatalosagaina le tasi o ituaiga faamaoniga nei:
- o se muai faamaoniga a o lei amata sue se meatotino e faatau mai – o se avanoa e te iloa ma le mautinoa ai tulaga o lou agavaa ai ma se aofaiga e mafai ona e maua;
- faamaoniga o le fesoasoani tupe pe afai ua e maua se meatotino ma ua e sainia se maliega faatauina atu ma faatauina mai.
Tuuina mai lau talosaga i le itulau lea
E imeli atu se faamaoniga ua matou maua lau talosaga. E fa vaiaso le umi o le a matou taumafai e iloilo ai talosaga uma – e faafesootai atu pe afai o moomia na e faailoa mai nisi faamatalaga, e faafesootai atu i totonu o le vaitaimi o iloilo ai talosaga.
Afai na e talosaga mo se muai faamaoniga
Afai na e talosaga mo se muai faamaoniga, ona matou imeli atu lea pe afai ua faamanuiaina lau talosaga.
E 6 masina le umi e aogā ai muai faamaoniga na taliaina – e ono moomia ona e toe talosaga pe afai e te lei faatauina se fale i totonu o le vaitaimi lea.
O tulaga e tatau na faatino pe a faatau mai se fale
Afai ua e maua se muai faamaoniga, e moomia ona e faia atoa faamatalaga ma toe faafoi mai le laupepa o faapipii i lau tusi mo se muai faamaoniga pe a e faatauina mai se meatotino. E moomia foi ona e lafo mai faamaumauga nei:
- o le maliega faatauina atu ma faatauina mai, ma le
- faamaoniga o le 5% o lau tupe faamau.
Afai na e talosaga mo se faamaoniga atoa
Afai ua faamanuiaina lau talosaga, ona totogi lea o le fesoasoani tupe i le teugatupe tausi mavaega a lau loia i le taeao o le aso e aloaia ai.
Afai ua le faamanuiaina lau talosaga
Matou te imeli atu tulaga ua e le ausia ai aiaiga e agavaa ai. E iai tulaga e ono mafai ai ona e toe faia se isi talosaga i se isi taimi pe afai ua iai se suiga o tulaga e patino ia te oe faapea ma lou ausia o tulaga moomia.
Afai ua suia tulaga e patino ia te oe
Faafesootai mai, pe afai ua iai se suiga i le uma ai ona e faia o se talosaga mo le Fesoasoani Tupe Muai Fale Faatau. E moomia lau numera faamauina tagata faaaogaina auaunaga.
- 0508 935 266
- firsthome.enquiries@kaingaora.govt.nz.
O nisi nei o suiga e ono afaina ai tulaga e te agavaa ai mo se fesoasoani tupe:
- e lei taunuu na faatau atu le fale
- ua le mafai ona e nofo i le fale mo le 6 masina talu mai le aso na aloaia ai (e ono moomia ona e toe totogi mai le fesoasoani tupe faatasi ma se tului)
- ua sui le aso e fau ai lou fale fou.
Uma na faafou le itulau: 13 July 2023