Aoaoga tau tomai ma aoaoga faaaperenitisi
E faaaoga le telē o le polokalame mo fale o matou faafoeina e faatuputeleina ai avanoa mo aoaoga tau tomai faufale e auala atu i taumafaiga e pei o le faaaperenitisi ma polokalame faufale.
Polokalame faaaperenitisi
E i ai le polokalame faa-a‘oa‘o ma le faaaperenitisi a le Kāinga Ora e galulue faatasi ai ma auaunaga mo avanoa aoaoga tau tomai ma tausiga faaleagaga, paaga faufale, ma fai konekarate ia faatumauina le maua e Tagatanuu Niu Sila o naunau e auai i aoaoga faaaperenitisi faumea faapitoa, lagolagosua ia latou taumafaiga faapea pule o galuega ia ausia faamanuiaga silisili mo i latou.
Talu mai na faalauiloa le polokalame faaaperenitisi i le 2019, e silia ma le 250 Tagatanuu na faamanuiaina le ulufale ai i polokalame faa-a‘oa‘o ma le faaaperenitisi ma a matou paaga i vaega eseese uma o le polokalame faufale mo fale a le malo. O lo o tau saili le faatoateleina o le faafaigaluega o tamaitai, tagata Māori ma tagata Pasifika, faapea tagata o faaaogaina auaunaga, e auai i polokalame faaaperenitisi. O talosaga mo tauofoga tetele fou, e tatau ai ona maua le 50% o tagata o aoaoina le faaaperenitisi mai ia i latou nei o ave i ai le faamuamua.
E fesoasoani le faatupu o avanoa mo Tagatanuu Niu Sila e faigaluega i matātā faumea faapitoa, e faamanuiaina ai foi taumafaiga ua saunia e Kāinga Ora ma paaga e faatupu le tomai ma le agavaa faufale i Niu Sila, ae e le gata i lea o le a tele ai fale fou a le malo e maua mai ai ma siitia ai le soifua manuia o tagata ma lotoifale o soifua ma ola ai.
O polokalame faufale faaaperenitisi ua matou saunia e aofia ai faiga faapaaga ma le Building & Construction Industry Training Organisation (BCITO), le Ministry of Social Development (MSD), ma le New Zealand Institute of Skills and Technology. O lo o faia foi taumafaiga e galulue faatasi ai ma auaunaga faalotoifale, o lo o lagolagosua i tagata Māori ma tagata Pasifika.
Aoaoga Faapitoa Faufale
E lua aoaoga faapitoa faufale o galulue faapaaga ma Kāinga Ora, faapea ma le Unitec e faatuputeleina le aofai o fale ma saunia avanoa aoaoga tau tomai mo tupulaga. E saunia e le Massey High School Building Academy ma le Dargaville High School Building Academy alafua mo tupulaga o fia aoaoina tomai faumea faapitoa ma maua le agavaa faakamuta, palama ma le faaeletise, e auala atu i galuega o vaavaaia e tufuga ma faiaoga faamauina. E fau fale i lotoā a aoga nei, ona sii lea i nofoaga o moomia ai fale.
O matou galuega faapaaga nei ma le Unitec o le a tino mai ai fale e mafai ona fesiitai o fau e tamaiti aoga i le lotoā a le Mt Albert.
MATES in Construction
E maualuga le aofai o tagata i le matātā galuega faufale na pule i le ola i Niu Sila atoa, ma e i ai le talitonuga i le taua o le pitolaau e faatino e Kāinga Ora e faatupu manatu ai i tomai faumea faapitoa o fetaiai ma faaletonu o le mafaufau ia saili se fesoasoani pe a moomia. O le mafuaaga tonu lena ua matou galulue faapaaga ai ma le faalapotopotoga faameaalofa e ta‘ua o le MATES in Construction talu mai le 2020 e taofi ma foia le pule i le ola.
O lo o faasolo le polokalame MATES in Construction i nofoaga o fau ai fale a Kāinga Ora, ma o se polokalame e faatino i nofoaga tonu o galulue ai ma e faamalosia ai au faufale ma tufuga e tautuana isi ma fetausiai ma saili, ofo atu ma talia le fesoasoani pe a moomia. E faamoemoe e tau atiae le tomai ma le malamalama i faaletonu o le mafaufau ma fai ma tauloto le faasoa o mataupu faapenei i aso uma o faigaluega ai.
Ua iloga i suesuega i le atu laulau le mataina o le MATES in Construction ma na faalauiloa i se lomiga a le World Health Organisation (WHO) Live Life: An Implementation Guide for Suicide Prevention in Countries(external link).
Construction Plus
E auala atu i le Construction Plus, galuega o fesoasoani ai Kāinga Ora i tagata ua aafia i atinaega o le taulaga, ma taumafai e fesootai tagata i aoaoga tau tomai, galuega ma avanoa alamanuia i Aukilani ma Niu Sila atoa. O le polokalame lea e mafai ai e tamaiti aoga i kolisi ona fesootai ma le sui o galuega tetele Piritahi ma maua ai avanoa e faamasani i le ola galue.
Polokalame matagaluega a le Corrections
E fesoasoani foi la matou galuega faapaaga ma le Matagaluega o le Corrections e faaopoopo i luga o le malosi o atinae ua faia e faatuputeleina ai le maua o fale e mafanafana ma matū.
E i ai le polokalamae fai faatasi a le Kāinga Ora ma le Rolleston Prison faapea ma le Spring Hill Corrections e maua ai e pagota avanoa tomai faufale e auala atu i galuega e toe faafou ai fale a le malo o i ai nei o faia i lotoā a falepuipui. O le uma ai na faafou ona sii lea e faatu i fanua a Kāinga Ora e nofoia e tagata o faaaogaina matou auaunaga. Ua faalauaitele le polokalame lenei ia aofia ai ma fale fou a le malo e faaaoga ai galuega soosoo tauau ua faia nei.
Faitau isi faamatalaga i le polokalame e toe faafou ai fale o faia i Rolleston Prison ma Spring Hill
Uma na faafou le itulau: 23 February 2024