Ā mātou pūranga - Tirohanga whānui
E puritia ana e Te Rua Mahara o te Kāwanatanga ngā pūkete tini mano e pā ana ki ngā āhuatanga o ngā whare noho, tae atu ki ērā e pā ana ki ngā whare noho i raro i te kāwanatanga i tētahi wā.
Ka taea e koe te uru ki ēnei pūkete mā tā rātou paetukutuku, Archway(external link).
He mea whakahaere ngā whare kāwanatanga i Aotearoa e ngā tari maha rerekē i roto i ngā tau, ā, e whakaata ana ngā pūkete i tēnei. Kei reira ngā mea mai i te Wāhanga Whare o Te Manatū Mahi, State Advances Corporation, Te Kaporeihana Whare o Aotearoa me Housing New Zealand Ltd.
Ko ētahi atu tari pērā i Ngā Pirihimana, Te Tāhuhu, Te Tari Māori, Post Office, Te Ara Poutama me ētahi atu i whiwhi whare i whakahaerehia e ngā tari rerekē o Te Kaporeihana Whare o Aotearoa.
Mēnā ka kitea e koe tētahi mea e hiahia ana koe ki te whakamahi me whakapā atu ki Te Rua Mahara o te Kāwanatanga(external link).
He pūkete anō ā mātou e kimihia ana e ngā tāngata e hiahia ana ki te rapu mōhio anō mō ngā papanoho tauwhāiti.
Kei roto i te kohinga ko ngā mahere me ngā whakaahua o ngā whare me ngā manga. E kaingākautia ana ēnei mōhiohio e ngā kaunihera, ngā rangatira o ngā whare me ngā kaitapitapi. Kei runga te nuinga o ēnei i ngā kāri puare kiriata mōkito, ahakoa e wātea ana ētahi mahere tā.
Ko ētahi o ngā mahere whare kei ngā kiriata mōkito, me ngā mahere manga iti noa, i matawaitia, ā, e wātea tāhikotia i runga i te tono, kāore he utu. Kāore anō kia matawaitia he mahere tā.
Kāore e taea te tautuhi te mahere ka whakamahia mō tētahi papanoho tauwhāiti. Hei āwhina i a mātou ki te āwhina i a koe, me pānui i ngā mōhiohio e whai ake i mua i te whakapā mai mō tētahi papanoho.
Ngā wā kua kapi i ngā mahere
Kei waenga i te 20,000 me te 30,000 ngā mahere kiriata mōkito kei a mātou. Kei roto i te kohinga kiriata mōkito ko ngā mahere o ngā kāinga i hangaia i waenga i te 1937 me te 1987. Ko te nuinga o ngā mahere e hāngai ana ki ngā whare tokoiti noa, ahakoa i ētahi āhuatanga ka whakamahia pea he mahere i ngā wāhi maha puta noa i te motu:
- 6 ngā mahere i whakamahia i ngā wā neke atu i te 100
- 10 ngā mahere i whakamahia i ngā wā 80
- 80 ngā mahere i whakamahia i ngā wā 40,
- engari 6,200 ngā mahere i whakamahia i ngā wā iti iho i te 10.
Kāore he mahere mō ngā kāinga i hangaia i muri i te tau 1987 kei runga kiriata mōkito.
Ka taea e koe te whakamōhio mai nōnahea i hangaia ai tōku kāinga?
I te nuinga o te wā ka tautuhia e mātou te tau i hangaia te kāinga. I ētahi atu wā, ka taea pea e mātou te whakaatu te rā i tuhia he whare ki ā mātou mahere, engari tē taea te tango ngā mōhiohio tika mō te rā i hangaia.
He pūkete āu mō ngā mahi tautiaki i taku whare?
Me kī, kāore e puritia ngā pūkete tautiaki kia roa atu i te whitu tau. Te āhua nei kāore i a mātou he mōhiohio e hāngai ana ki a koe.
E hia te roa e whiwhi ai i tētahi mahere
Mēnā ka taea te tautuhi te mahere mō tētahi kāinga, ā, i matawaia te mahere, he poto noa iho te wā ki te īmēra atu ki a koe.
Mēnā kāore i matawaia te mahere engari, ā, he māmā te tautuhi me te kimi, ka taea te matawai me te īmēra atu te mahere, te tā ka mēra atu, i roto i ētahi rā.
Kei roto i ētahi tari ngā mahere kiriata mōkito, ā, i ētahi wā ka tautuhia anake mai i ngā taupū kāri e puritia ana i aua tari. I ētahi atu āhuatanga, ka roa pea ki te tautuhi i te mahere i whakamahia, te kimi rānei i tētahi kape o te mahere hāngai kia matawaia. I aua āhuatanga ko te mea pai rawa e hia wiki pea kātahi anō ka whakaratoa te mahere. Ka roa ake pea te whakarato i ngā mahere i te kape mārō.
Ngā takiwā e puritia ana e mātou ngā mahere
Ka puritia ngā mahere mō ngā takiwā katoa i Aotearoa. Engari he iti noa ā mātou mōhiohio mō ngā papanoho i:
- Manawatū,
- Taranaki,
- Waikato me
- Te Moana-a-Toi.
I aua takiwā kāore e tino taea te tautuhi ngā mahere i whakamahia.
He rite tōku kāinga ki ētahi atu i roto i te tiriti - ka āwhina tērā ki te tautuhi i te mahere?
Ahakoa ka ōrite pea te āhua o ngā whare mai i waho, kāore e kore he āhua rerekē pea, engari he nui tonu, i roto i te hangatanga. He tino rerekē te whakamahi i te mahere ōrite mō ngā whare maha ki te tiriti kotahi. Nā ērā āhuatanga, kāore e tukua e mātou te mahere kei raru mātou i te tuku mōhiohio hē.
Ngā mōhiohio me tuku koe kia whiwhi ai i tētahi mahere
I te nuinga o te wā ko te wāhi noho o te whare anake tā mātou e hiahia. I ngā āhuatanga he uaua te tautuhi i tētahi mahere, ka āwhina pea ngā mōhiohio mō ngā mahere manga e puritia ana e te kaunihera. Mēnā e puritia ana e te kaunihera tētahi mahere manga, he tau tohutoro mahere kei roto, kei te taha rānei o te paetuhi o te whare kei te mahere manga. Ka taea pea e mātou te whakamahi tēnei tau hei āwhina ki te kimi mōhiohio mēnā kāore ā mātou pūkete ake mō te papanoho.
Ka puta pea ngā raruraru mēnā kua huria te ingoa tiriti, he tau hou rānei kei te papanoho. Ahakoa ka taea tēnei te whakarite, ka roa ake pea te wā mō te whakatutuki i ngā tirotiro tika. Mēnā kei te mārama koe ki aua huringa, me whakamōhio mai ina tonoa e koe he mahere.
I kī mai te kaunihera kāore he whakaaetanga o te whare - he aha i pērā ai?
I te tau 1991 i whakaurua mai te Building Act, nā tēnei i whakakotahi ngā wāhanga nui maha ki te ture kotahi. I mua tonu o te tau 1991, kāore i herea ngā tūmomo māngai hanga whare mā te Karauna e te ture ki te whai whakaaetanga/whakaae hanga whare. Engari, i riro mai ngā whakaaetanga me ngā whakaae mahere me te manga. I mua o te Building Act 1991, i hangaia ngā whare kāwanatanga i raro i ngā mana ā-ture me te kore whai i tētahi whakaaetanga mai i te kaunihera. I muri i te tau 1991, me whiwhi whakaetanga. Kāore pea i te kaunihera ngā mōhiohio mō ngā kāinga tawhito ake, engari ehara i te mea he takahi ture.
He tino hira ki te Kaporeihana Whare - i whakatūria i te tau 1974 - ōna herenga. He mea whakahaere ngā whare kāwanatanga katoa e ngā kaitirotiro hanga whare matatau me ngā kaiwhakahaere hanga whare. I hangaia, i tiakina ngā whare kāwanatanga ki tētahi paerewa teitei, ahakoa kāore i tuhia tēnei e ngā kaunihera.
He kohinga tā mātou mō ngā whakaahua tawhito e kapi ai ngā whare kāwanatanga, ngā mahi wāwāhi whenua, ngā hangatanga whare noho me ngā mahinga hāngai. He whakaahua kaimahi hoki ā mātou, ngā whakaahua rōpū, i roto i ngā tari me ngā kaupapa kaingākau o ngā tāngata e kaingākau ana ki te hītori o ngā tari kāinga kāwanatanga o Aotearoa.
Ka hiahia pea koe ki te tiro i ēnei pikitia mēnā kei te rangahau koe i te hītori ā-iwi, ngā mahi ahumahi hangatanga me ngā whanaketanga, te whakapapa rānei.
Mēnā he whanaunga tōu i mahi mā tētahi o ēnei tari e whakahaere ana i ngā kāinga kāwanatanga, me whakapā mai ka tono kia kōrero ki tētahi mai i tētahi o tō mātou Rōpū Pūkete kia kite ai mēnā he whakaahua kei reira. Mō ngā whakaahua e whakaatu ana i ngā tāngata me whiwhi tono ā-tuhi mātou e whakaatu ana i tō hononga ki te tangata.
We Call It Home
I te tau 2005 - te rau tau o ngā whare noho kāwanatanga - i te whakaputaina te pukapuka a Tākuta Ben Schrader We Call it Home - A History of State Housing in New Zealand.
He mea whakahau e Te Manatū Taonga me ngā tautoko a Te Kaporeihana Whare, e hopu ana te pukapuka i ngā kōrero ā-tangata o ngā kāinga kāwanatanga me tana tautoko i te ao o te motu.
He whakaata i te hunga i noho i roto i ngā kāinga kāwanatanga, ō rātou wheako, te whanaketanga o te hoahoa kāinga kāwanatanga, ngā hiahia hurihuri o ngā kainoho me ngā kitenga o ngā takiwā kāinga kāwanatanga i roto i ngā tau.
Ka kitea e koe ētahi kōrero anō mō te pukapuka i te paetukutuku NZHistoryNet(external link).
E wātea ana a We Call It Home i te nuinga o ngā toa hoko pukapuka.
State Housing in New Zealand
State Housing in New Zealand – nā Cedric Firth ngā tuhinga, nā Gordon F Wilson i tīpako ngā pikitia. He mea whakaputa e Te Manatū Mahi, Te Whanganui-a-Tara. Ka hopu tēnei i ngā kāinga kāwanatanga i te tau 1949. He mea whakakī ki ngā mahere papa me ngā whakaahua.
Kupu Whakataki
He raru nui te whare noho i tēnei rā. He tino tika tēnei mō Aotearoa pērā i ētahi atu whenua maha. Kāore i pēnei rawa te hohoro o te hiahia ki ngā kāinga maha rawa. Kāore i pēnei rawa te uaua o tēnei raruraru.
E mārama ana te hono tata i waenga i te hari, te hauora me te whare noho, ā, ko tētahi o ngā tūmahi matua o ngā tau tekau e whai ake ko te whakaratonga o tētahi whare noho kāwanatanga mō ia whānau i Aotearoa. He mahi nui tēnei, engari ina whāia te hanga mahere mā ngā mahi e pā ana ki te Kāwanatanga me te ahumahi tūmataiti kei reira tētahi tūponotanga tōtika ka eke te whāinga.
Me mihi te ahunga mai o tēnei pūrongo ki ngā uiui i whiwhi mai i pūtake i tāwāhi me konei e pā ana ki ngā mahi a te Wāhanga Whare o Te Manatū Mahi.
Building the New Zealand Dream
Ka kitea hoki e koe ngā mōhiohio tawhito mō ngā whare noho i Building the New Zealand Dream, nā Gael Ferguson (ISBN 0-86469-191-2).
Ngā Pūrongo Mākete Whare Noho
I whakaputaina e mātou Ngā Pūrongo Mākete Whare Noho i waenga i te Hune 2003 me te Tīhema 2005.
I toro ngā pūrongo i ngā raraunga mai i ngā tūmomo whakahaere, ā, i kapi i ngā mea pērā i ngā ia o te whakapikinga utu o ngā whare, ngā rahinga mino, te maha o ngā tauwhitinga, ngā rēti rāngai tūmataiti me ngā mākete mahi.
I roto anō i ēnei ko ngā āhuatanga kāore e kore ka whai pānga ki te ahunga anamata o te mākete whare o Aotearoa.
I whakakapihia ēnei pūrongo e tētahi Pūrongo Mākete Whare Noho ā-Motu, i whakaputaina e Hīkina Whakatutuki(external link).
He rōpū rangahau whare noho motuhake i Aotearoa?
Āe. The Centre for Housing Research Aotearoa New Zealand (CHRANZ(external link)).
He pēhea te whakamahi a Te Kaporeihana Whare i te rangahau i ngā rangahau mō āna ake kaupapa?
He mea hira te rangahau me te arotake i te aronga a Te Kaporeihana Whare mō te tuku kaupapa e tōtika ai te urupare ki ngā hiahia whare noho. E rarangi ana ngā mahi rangahau me ngā arotake ā-roto i ia tau i roto i te Tauākī Whakamaunga Atu, ā, i pūrongotia i roto i te Pūrongo ā-Tau.
Kua whakahoungia te whārangi: 13 Whiringa-ā-rangi 2019