Whakangungu me ngā mahi pia :: Kāinga Ora

Kaupapa mahi pia

He kaupapa mahi tauira me te mahi pia tā Kāinga Ora e mahi tahi ai me ngā kaiwhakarato whakangungu me te manaaki tauira, ngā hoa hanga, me ngā kaikirimana hei āwhina i ngā tāngata o Aotearoa e rikarika ana ki te uru ki ngā mahi ringarehe hei pia, me te tautoko i a rātou me ō rātou kaitukumahi kia tino eke ai ki te taumata.

Mai i te whakarewatanga o tā mātou kaupapa mahi pia i te tau 2019, neke atu i te 250 ngā tāngata o Aotearoa i puta ō rātou ihu ki ngā mahi tauira me ngā mahi pia me ō mātou hoa mahi ngātahi puta noa i tā mātou kaupapa whare kāwanatanga. Ka rapu haere tonu mātou kia nui ake ngā wāhine, ngā Māori me te Pasifika, me ngā kiritaki hoki, ki ngā mahi pia. I roto i ā mātou tono nui hou, 50% o ngā pia me ahu mai i ēnei rōpū matua.

Mā te āwhina kia maha ake ngā tāngata o Aotearoa ka uru ki ngā mahi ringarehe whaikiko, e whai ana a Kāinga Ora me ōna hoa mahi ngātahi kia nui ake ngā kaimahi ahumahi matatau e puta ana i Aotearoa, me te whakarato kāinga kāwanatanga hou nui atu me te tautoko i te oranga o te iwi me ngā hapori.

Ko ētahi o ō mātou hoa mahi ngātahi ko Building & Construction Industry Training Organisation (BCITO), Te Manatū Whakahiato Ora (MSD), me Te Pūkenga. Ka mahi tahi hoki mātou me ngā kaiwhakarato ratonga, he mahi rātou e tautoko ana i ngā hapori Māori me te Pasifika.

Ngā Kura Hangatanga

Ka mahi ngātahi a Kāinga Ora me ngā kaupapa ako hangatanga i ngā kura, tae atu ki a Te Pūkenga kia nui ake ai te rato o ngā kāinga me te tuku arawātea whakangungu ahumahi ki te hunga taiohi. He tuku ara Te Kaupapa Hangatanga a Te Kura Tuarua o Massey me te Te Kaupapa Hangatanga a Te Kura Tuarua o Dargaville hei tuku ara mō te hunga taiohi kia uru ki ngā mahi ringarehe me te whai wheako ki ngā mahi kāmura, ngā paipa wai me te hiko, me te mahi i raro i ngā tohutohu a ngā kāmura rēhita me ngā kaiako. Ka hangaia ngā kāinga ki ngā kura, kātahi ka kawea atu ki ngā wāhi e hiahiatia ai ngā whare noho.

Ka puta i tā mahi ngātahi me Te Pūkenga ko ngā kāinga e whā hei kawe atu, ā, ka hangaia ēnei e ngā ākonga i te wāhi ako i Mt Albert.

MATES in Construction

Kei te rāngai ahumahi te ōwehenga nui rawa o ngā mate whakamomori puta noa i ngā ahumahi i Aotearoa, ā, e whakapono ana a Kāinga Ora he wāhanga tōna ki te hāpai i te hunga ringarehe e pāngia ana e ngā mate hauora hinengaro ki te whiwhi i ngā āwhina ina hiahiatia ana e rātou. Koinei te take i mahi ngātahi mātou me te kaupapa aroha mō te ārai mate whakamomori me te hauora hinengaro a MATES in Construction i te tau 2020.

Kei te hōrapahia te kaupapa MATES in Construction i ngā wāhi hanga o Kāinga Ora, he kaupapa ārai mate whakamomori i te wāhi mahi e arahina ana e te ahumahi mō te whakahau i ngā kaimahi ki te tiaki i a rātou tētahi ki tētahi me te rapu, te tuku me te whakaae ki ngā āwhina ina hiahiatia. Ko te whāinga ko te whakapakari i ngā pūkenga me te mōhio ki te hauora hinengaro me te whakauru i tēnei ki ngā mahi o ia rā.

Kua whakaaturia a MATES in Construction hei tauira tikanga pai rawa i te ao mō te ārai i te mate whakamomori e te World Health Organisation (WHO) i roto i tā rātou whakaputanga Live Life: An Implementation Guide for Suicide Prevention in Countries(external link).

Construction Plus

Mā Construction Plus, ka āwhina a Kāinga Ora i ngā hapori kua pākahatia e te whanaketanga ā-tāone, mā te tūhono i te tangata ki ngā whakangungu, te whai mahi me ngā arawātea ahumahi puta noa i Tāmaki Makaurau me Aotearoa. Ka hono atu te kaupapa nei i ngā ākonga kura tuarua ki tō mātou hoa mahi kari whenua a Piritahi me te tuku arawātea mō te wheako mahi.

Ka rawe kē ki ngā ākonga Construction Plus a Kāinga Ora te wheako mahi i te wāhi mahi

Kaupapa a Te Ara Poutama

Kei te āwhina tā mātou mahi ngātahi me Te Ara Poutama Aotearoa i a mātou kia nui haere ake te whakarato i ngā whare mahana, maroke hoki.

Kei te mahi tahi a Kāinga ora me ngā whare herehere o Rolleston me Spring Hill i raro i tētahi kaupapa e whiwhi pūkenga hangatanga ai ngā mauhere i a rātou e whakahou haere ana i ngā kāinga kāwanatanga i ngā iāri hangatanga i roto i ngā whare herehere. Kātahi ka nekehia ēnei whare ki ngā whenua o Kāinga Ora hei kāinga mō ā mātou kiritaki. Kua whakawhānuitia tēnei kaupapa kia uru mai anō ko ngā kāinga kāwanatanga hou ka hangaia mā tēnei mahi tahi.

Pānuitia ētahi atu kōrero mō te kaupapa whakahou whare i ngā whare herehere o Rolleston me Spring Hill