Kaupapa Whakarākei Anō i Spring Hill me Rolleston
Kei te whakakaha a Kāinga Ora me Te Ara Poutama Aotearoa i tō rāua pātuitanga hanga mā te hanga i ngā kāinga hou neke atu i te 100 i roto i ēnei tau e rima nei.
Kua oti i ngā tari kāwanatanga e rua te whakarato kāinga mā tētahi pātuitanga e whiwhi ai ngā mauhere i ngā pūkenga me ngā tohu hou me te whakahou i ngā kāinga kua tūkinohia, tawhito hei kāinga maroke hou mō ngā kainoho o ngā kaireti a Kāinga Ora me ō rātou whānau.
Kua hīkina te taumata o tēnei kaupapa mā te whakaae tahi a ngā tari e rua ki te hanga whare hou mā roto i tēnei mahi tahi.
He āhuatanga hira tēnei o tētahi Whakaaetanga Taumata Ratonga i waitohu, ā, ka whakaratoa tēnei kaupapa i ngā whare herehere o Spring Hill me Rolleston.
Ko ngā kāinga me ngā pūkenga hou nā te mahi ngātahi i waenga i a Kāinga Ora me Te Ara Poutama Aotearoa i Waikato.
I roto i te kaupapa whakahou whare i Spring Hill, kua iwa tau nei e haere ana, ka whai ngā mauhere e tirotirohia ana i tētahi tohu ringarehe hei āwhina ki te whakahou me te hangahou anō i ngā whare tawhito ake kia huri hei kāinga hou, mahana, maroke me te hauora mō ngā kaireti whare noho kāwanatanga me ō rātou whānau.
I ia tau, neke atu i te 60 mauhere ka whai wāhi ki te ako me te whakapakari pūkenga hou mō rātou ina tukuna mai rātou ki te hapori.
Ko te kāmura te ringarehe matua i tohua engari arā anō ētahi atu e wātea ana pērā i te tapitapi i roto, te whakamau papa gib, te peita me ngā mahi paipa.
Ka mahi tahi a Te Ara Poutama me Building and Construction Industry Training Organisation (BCITO), ka haere atu rātou ki te iāri hangatanga o te whare herehere ki te aromatawai i ngā mauhere mō ō rātou pūkenga ringarehe e whiwhi tohu ai rātou hei āwhina i a rātou ki te kimi mahi i te putanga mai.
E whai ana te kaupapa ki te whakarato i ngā kāinga 10 ka whakahoutia i ia tau pūtea. I tēnei tau, e rima ngā kāinga kua kawea atu ki ngā wāhi hou, ā, e toru atu anō ka kawea atu ki ngā wāhi hou i te Maehe. E rua atu anō ngā whare ka kawea atu ki ngā wāhi ki ngā wāhi hou i mua i te mutunga o te tau pūtea o te Hune 30, 2019.
Kua kawea atu te whare o Spring Hill
Ngā mahi whakaoti i tētahi whare o Spring Hill
Kua nekehia ngā whare i Spring Hill ki ngā tekihana hou
He hoa mahi ngātahi a Kāinga Ora me Te Ara Poutama Aotearoa i roto i tētahi kaupapa e whiwhi ai ngā mauhere i ngā pūkenga hou me te ngākau titikaha mā te hanga me te tapitapi i ngā whare kāwanatanga kua tūkinohia i te iāri hangatanga o Te Whare Herehere o Rolleston.
Ko te kaupapa Rolleston Construction Yard, e kīia ana ko te kaupapa Second Chance, he kaupapa mahi ngātahi i waenga i a Kāinga Ora me Te Ara Poutama e tuku tohu ana me ngā pūkenga mahi ki te hunga hara o te hapori me ngā whare herehere, he whakahou i ngā whare noho kāwanatanga e taea ai e te hunga hara te tautoko i te waihanga anō i a Waitaha.
Ina oti i te iāri, ka kawea atu ngā whare ki ngā wāhi puta noa i te tāonenui me te tuku anō ki ngā kaireti hei rēti anō.
Kua mau ngā papapātū hou, ngā waea hou me ngā paipa hou me te whakauru ārai mātao ki ngā pātū me ngā tuanui, ā, ka whakamaua ngā ārai mātao ki raro i ngā papa ina tae atu ki te wāhi. He hou ngā rūma horoi, ngā wharepaku me ngā kāpara wai wera o ngā whare, kua whakahoutia ngā kīhini kia hou te āhua me ngā papanga papa hou. He pāpāuka ā-roto hou kei runga, kua peitahia i roto me waho, ā, i horoia ngā tuanui ki te pēhanga wai kaha ka peitahia anō.
I puta te ingoa o te kaupapa Second Chance i te tau 2013 i te wā e arotake ana a Kāinga Ora (ko te Kaporeihana Whare o Aotearoa i mua) i te anamata o ngā whare mai i te Rohe Whero o Ōtautahi, ā, i te kimi Te Ara Poutama o Waitaha i tētahi kaupapa e whaitake ai te tautoko a ngā mauhere ki te waihanga anō i te tāonenui me te hapori.
E 2 ngā iāri hangatanga hou o te kaupapa i hangaia i Te Whare Herehere o Rolleston, i te tonga o Ōtautahi, te neke i ngā whare ki te wāhi, ngā mahi tapitapi me te whakahou kātahi ka kawea atu ngā whare ki ngā wāhi hou i te tāonenui kia kuhu ai ngā kaireti roto.
He tata ki te 140 ngā kaireti me ō rātou whānau kei roto i tētahi whare e noho ana i whakahoutia mā te kaupapa.
E ai ki a Te Ara Poutama e hia rau tāngata i mahi i roto i te kaupapa. I te iāri, i ako rātou, me te ako haere tonu, i ngā pūkenga ringarehe mahi, tae atu ki te peita, mahi pāpāuka, kāmura, me te hono papa.
E whakaatu ana ngā rangahau he kaha te hono i waenga i te whai mahi me te noho kore kara.
Te whare i mua i te tapitapitanga
He whare i runga i tētahi taraka e nekehia ana
Kua oti wāhanga o te whare
Kua whakamahia te whare, ā, kua nekehia ki tētahi wāhi hou
Kua whakahoungia te whārangi: 31 Whiringa-ā-nuku 2019