Ngā kaupapa whanaketanga ā-tāone nunui
Kua whakaritea e Kāinga Ora neke atu i te 40,000 ngā kāinga hou, mahana, maroke puta noa i te motu i roto i ana kaupapa whanaketanga ā-tāone tino nunui. Kei roto ko ngā kāinga pāpori, mākete me te utu ngāwari ka hangaia i roto i te 20 tau e heke nei.
Neke atu i te 40,000 ngā kāinga hou, mahana, maroke kei te hangaia e Kāinga Ora i roto i ā mātou kaupapa whanaketanga ā-tāone nunui me te papa kākāriki – ko ētahi he kāinga tūmatanui, mākete, utu ngāwari (pērā i a Kiwibuild) ka hangaia i roto i te 20 tau e whai ake
Kia taea ai tēnei, ka mahi tahi a Kāinga Ora me ngā kaiwhakawhanake, ngā iwi, me ngā tari kāwanatanga hei whakarato i ngā kaupapa whanaketanga ā-tāone o ngā rahinga katoa.
Kei te ārahi mātou i te whakaratonga o ngā kaupapa whanaketanga nunui e ono i tēnei wā i Tāmaki Makaurau - Hobsonville Point, Northcote, Roskill, Oranga, me Māngere, me tētahi kaupapa nunui i Porirua. He whanaketanga kākāriki nunui hoki ā mātou i Te Kauwhata, Waikato me Tauriko i Tauranga.
Kei te mahi tahi a Kāinga Ora i te taha o te Tāmaki Regeneration Company kia nui ake ai ngā kāinga i Point England, Panmure, me Glen Innes i te rāwhiti i Tāmaki Makaurau. Kei te mahi tahi anō mātou me Ngāti Toa me Te Kaunihera o Porirua ki te whakarato i tētahi whanaketanga i te Rāwhiti o Porirua.
I tua atu i te whakanui ake i te maha o ngā kāinga kounga hou, tae atu ki ngā kāinga utu ngāwari atu anō pērā i a Kiwibuild, ka puta i ēnei kaupapa ko ngā tūāhanga pai ake, he nui ake ngā hapori honohono, me ngā ratonga tukuora.
E āhukahuka ana tā mātou aronga mō te whanaketanga ā-tāone ehara i te mea he mea hanga noa ngā wāhi, ngā tāonenui me ngā tāone. Me mātua kauawhi te hoahoa tāone pai i te onamata, te whakanui i te ahurea o te hunga e noho ana i reira me te whakarei ake i te taiao. Koirā te take e mahi tahi ai mātou me ngā hapori me ngā rōpū onāianei ki te whakarite ka tino whānui te pānga o ō mātou pānga whanaketanga me te tautoko i te matakitenga a Kāinga Ora o te hanga kāinga, hapori, ao pai ake, pūahoaho ake.
Tikiake Ka nui ake ngā kāinga mō ngā tāngata o Aotearoa [PDF, 6.1 MB]
Ngā wāhi Whanaketanga ā-Tāone
Kei runga a Hobsonville Point i tētahi kūrae 167ha i te whanga whakarunga o Waitematā, he 20 meneti anake te taraiwa i te māuru o Tāmaki Makaurau. He papa nō Te Ope Kātua o Aotearoa te whenua mō te 80 tau, ā, ka kitea tonutia tōna hitori mā te kōtuinga rori onāianei, ngā whare tuku iho me ngā rākau pakeke. Ka taea te wāhi mā ngā huanui e rua, ā, he ratonga waka kōpaki ki te CBD kei reira.
Wā o te kaupapa: Ka oti te kaupapa i te takiwā o te 2025/2026
- Tata ki te 4,500 ngā kāinga mō ngā kainoho 11,000 i te otinga
- He nui ngā ratonga tukuora tae atu ki ngā papa rēhia 26 ha, he wāhi taha moana mō ngā whakamahinga rerekē (kei te whakawhanaketia) me tētahi ara hīkoi 5km i te taha moana
- Te ārahi i te whakarahi ake i te noho apiapi ā-tāone i Tāmaki Makaurau
Kei tērā taha a Northcote, i Te Raki Paewhenua, o te Piriti o te Whanga o Tāmaki Makaurau, 15 meneti te roa o te taraiwa mai i te CBD. He pai ngā tūnuku pai, me ngā whakapaitanga atu anō mō ngā pahi. He 10 meneti anake te tapatāone mā te waka mai i te pokapū hokohoko me te manaaki tūtata o Takapuna me te takutai haumaru ki te kaukau. Ko ngā painga o te takiwā mai i ngā pāka maha me ngā papa hākinakina, ā, he kaha te wairua hapori, i poipoitia e ngā whānau kua roa e noho ana i Northcote.
Wā o te kaupapa: Tata ki te toru tau ki te otinga
Ngā whakaritenga whare noho:
- 380 ngā kāinga kāwanatanga onāianei ka whakakapia ki ngā kāinga kāwanatanga hou tata ki te 480
- Tata ki te 1,200 atu anō ngā kāinga utu ngāwari utu me ngā kāinga mākete
- I te otinga he tata ki te 1,700 ngā kāinga hou ka hangaia
He rawe ngā rawa tukuora i Mt Roskill, i te puāwanga o Tāmaki Makaurau, he rawe ngā rawa tukuora me ngā hono tūnuku, ā, he hapori toritori me te kanorau. He 6.5km anake te tawhiti mai i CBD, he wāhi pai tēnei mō te hunga haere ki te mahi. He āhua tata ki Te Taunga Rererangi o Tāmaki Makaurau, he pokapū mahi hira, ā, ka haere te ara rerewē mā te tapatāone. He tino maha ngā kāinga kāwanatanga i te rohe, ā, kua tata te whakahoutia.
Kei roto i te Whanaketanga o Roskill ko ngā takiwā noho o te Tonga o Roskill, Ōwairaka, Waikōwhai me Wesley, ā, kei te whakaaroarohia anō ētahi atu takiwā noho.
Takiwā Noho o Te Tonga o Roskill
Ko Roskill South tētahi o ngā hapori mātāwaka tino kanorau o Tāmaki Makaurau, ā, he tamariki ake e ai ki te rohe e pae ana. Kei te takiwā noho nei ko May Road Primary School, Turner Reserve, Winstone Park me Freeland Reserve. Ka taea te hīkoi atu ki Mt Roskill Grammar me Mt Roskill Intermediate School.
Wā o te kaupapa: Tata ki te rima tau ki te otinga
Ngā whakaritenga whare noho:
- 290 ngā kāinga kāwanatanga tawhito ka whakakapia ki ngā kāinga kāwanatanga hou tata ki te 330
- Tata ki te 600 atu anō ngā kāinga utu ngāwari utu me ngā kāinga mākete
- I te otinga he tata ki te 1,000 ngā kāinga hou ka hangaia
Takiwā Noho o Ōwairaka
He 8km anake a Ōwairaka mai i te pokapū o te tāonenui, ā, he uru māmā ki te CBD mā te tūnuku tūmatanui.
He haere anō te hononga o Waterview (SH20) mā te takiwā nei, e taea māmātia ai e ngā kainoho Te Taunga Rererangi o Tāmaki Makaurau me ētahi atu ara tūnuku matua. He rawe te toro atu a te hapori ki ngā ratonga paetata, ngā kura me ētahi atu rawa tukuora, me ngā papa rēhia maha, ngā whenua rāhui me ngā papa hākinakina i te takiwā.
I te tīmata te whanaketanga whare noho tuatahi i ngā tau o te 1950, ā, he tata ki te 200 ngā kāinga i hangaia i konei. He tata ki te 60% ngā kāinga i Ōwairaka nō Kāinga Ora.
Wā o te kaupapa: Tata ki te rima tau ki te otinga
Ngā whakaritenga whare noho:
- 225 ngā kāinga kāwanatanga tawhito ka whakakapia ki ngā kāinga kāwanatanga hou tata ki te 280
- Neke atu i te 900 atu anō ngā kāinga utu ngāwari utu me ngā kāinga mākete
- I te otinga he tata ki te 1,200 ngā kāinga hou ka hangaia
Takiwā Noho o Waikōwhai
He hapori kanorau ahurea a Waikōwhai neke atu i te 5,000 ngā tāngata, kei te taha tonga o te CBD i te pito o Dominion Road i Mount Roskill. He pai ngā kura, ngā papa rēhia, ngā whakanōhanga hākinakina me te tūnuku tūmatanui o te takiwā noho, me ngā painga mai i tētahi whakahaere hapori kaupapa aroha e kīia ana ko te pokapū Oasis.
Ka tūtaki te rohenga o te tonga ki te Whanga o Manukau i Waikōwhai. Ko Waikōwhai Park me Wattle Bay Reserve e tūtata ana ngā ngahere māori o te tāone nui rawa i te Tāonenui o Tāmaki Makaurau, e haerehia ai e te tāngata te ara ngahere me te takutai 10km o te Ara Hīkoi o Waikōwhai. E whā ngā kura i Waikōwhai: Te Kura o Hay Park, Te Kura Katorika o Monte Cecilia, Te Kura Tuatahi o Waikōwhai me Te Kura Takawaenga o Waikōwhai, ā, he maha atu anō i ngā tapa tāone tūtata.
He wāhi tino rawe a Oranga tē tino mōhiotia i te pokapū o Tāmaki Makaurau, 9km ki te taha paeroa o te CBD e tata ana ki ngā wāhi mahi o Greenlane me Penrose. He tata ki te pokapū tāone o Onehunga, ā, he pokapū tino honohono tēnei, ā, e whakaritea ana ngā hono tūhono whānui ā tōna wā. He tata hoki ki ngā pokapū nohoanga o Maungakiekie, Greenlane, Ellerslie, me Royal Oak, ā, he pokapū papakāinga katoa ō ēnei. He 2 meneti te tawhiti o te taraiwa, he 15 meneti rānei te hīkoi mai i Oranga ki te papa rēhia tiketike o Tāmaki Makaurau, a Cornwall Park, i Maungakiekie.
He mea hanga a Oranga i te tuatahi hei takiwā whare kāwanatanga e ai ki te mahere matua o tētahi tiriti keremutu tāone. Ko te nuinga o ngā kāinga he mea hanga i ngā tau o te 1940 me ngā whanaketanga atu anō i ngā tau o te 1980, 90 me te 2000.
Wā o te kaupapa: Tata ki te waru tau ki te otinga
Ngā whakaritenga whare noho:
- 400 ngā kāinga kāwanatanga tawhito ka whakakapia ki ngā kāinga kāwanatanga hou tata ki te 500
- Neke atu i te 600 atu anō ngā kāinga utu ngāwari me ngā kāinga mākete
- I te otinga he tata ki te 1,100 ngā kāinga hou ka hangaia
Kei te taha tonga o te tāonenui, ko te pai o Māngere he māmā te tae atu ki ngā wāhi mahi nui maha, pērā i te Pokapū o Māngere, Te Taunga Rererangi o Tāmaki Makaurau i te tonga, Ōtāhuhu i te rāwhiti me te Pokapū o Manukau i te taha paeroa. E rua ngā whare wānanga tūtata: MIT i te Pokapū o Manukau me AUT South Campus i Ōtara.
I te tīmata te whanaketanga whare noho Māngere i ngā tau o te 1960, ā, he tata ki te 20,000 ngā kāinga kāwanatanga i hangaia i te takiwā. I tēnei rā, neke atu i te kotahi te kāinga i roto i te rima nō Kāinga Ora i roto i te takiwā. Kei roto i te Whanaketanga o Māngere ko Mangere West me Aorere, ā, e whiriwhiria ana ētahi atu takiwā noho ā muri ake.
Takiwā Noho o te Uru o Māngere
He takiwā noho ahurea maha a te Uru o Māngere, ā, he nui te hapori Pasifika. Kei koinei Te Kāreti o Māngere, Moyle Park me tētahi kōawa: Te Ara-rata. He wāhi ka taea noatia, he tata ki te 6km a te Uru o Māngere mai i te Taunga Rererangi o Tāmaki Makaurau, ā, he iti iho i te 2km mai i te South-Western Motorway me te Pokapū Tāone o Māngere.
Wā o te kaupapa: Tata ki te rima ki te whitu tau ki te otinga
Ngā whakaritenga whare noho:
- 230 ngā kāinga kāwanatanga tawhito ka whakakapia ki ngā kāinga kāwanatanga hou tata ki te 340
- Neke atu i te 600 atu anō ngā kāinga utu ngāwari me ngā kāinga mākete
- I te otinga he tata ki te 950 ngā kāinga hou ka hangaia
Takiwā Noho o Aorere
He takiwā noho pai mō ngā whānau, he maha ngā whare karakia o Aorere me ngā kaiwhakarato mātauranga tūtata, ā, he tata te hīkoi atu ki Te Kāreti o Aorere. Ka whai hua anō ngā kainoho mai i ngā tūmomo ara tūnuku matua rerekē me ngā rawa tukuora e paetata ana,
tae atu ki Aorere Park me te Pokapū o Tāone o Māngere.
Wā o te kaupapa: Tata ki te rima ki te whitu tau ki te otinga
Ngā whakaritenga whare noho:
- 137 ngā kāinga kāwanatanga tawhito ka whakakapia ki ngā kāinga kāwanatanga hou tata ki te 160
- Neke atu i te 340 atu anō ngā kāinga utu ngāwari utu me ngā kāinga mākete
- I te otinga he tata ki te 500 ngā kāinga hou ka hangaia
12km te tawhiti o Tāmaki mai i te CBD o Tāmaki Makaurau, me te pai o te tūnuku tūmatanui me te tūāhanga.
He whakamīharo ngā āhuatanga tūturu o tōna hora ānō he taiwhanga porohita tūturu me ngā tirohanga tino pai puta noa i te awa o Tāmaki me Mt Wellington. Kua kapi i te whakahounga tapatāone o te tāonenui rawa o Aotearoa ngā heketea 900 puta noa i ngā tapatāone ā-roto o te rāwhiti o Tāmaki Makaurau o Glen Innes, Point England me Panmure.
Kei roto a Porirua ki te Rāwhiti i te tāonenui o Porirua, 24km whakateraki mai i Te Whanganui-a-Tara. Koinei tētahi o ngā wāhi nui rawa ngā whare tūmatanui i Aotearoa, ko te nuinga o ngā kāinga i hangaia i te ngā tau o te 1960 me te 1970.
Ko te maha o ēnei he tawhito, kua kore e pai, ka mutu he pakupaku rawa, kāore e tika mō ngā whānau o Porirua ināianei, ā, haere ake nei. Nā te whakatuwheratanga o Te Aranui o Te Rangihaeata, te whakahounga o te Mahere Takiwā a Te Kaunihera o Porirua, ā, ko te matapae ka tino tipu te taupori o te takiwā i roto i ngā tau maha nei koinei te wā tika mō ngā whakaaro hao nui me pēhea tā tātou tautoko i te tipuranga e tipu ai ngā hapori — mai i tēnei reanga ki tērā e heke iho.
Nā ngā rori kua māmā te tae atu ki Tāmaki Makaurau me Kirikiriroa, ka noho tonu te whanaketanga o Lakeside i Te Kauwhata i te taha tonu
o te ākau o te moana o Waikare.
- Tata ki te 1,650 ngā kāinga tū motuhake me te weherua i roto i te waru ki te tekau tau e heke iho nei
- Tata ki te 20% o ngā kāinga kei te wāhanga utu ngāwari, he $650,000 i tēnei wā mō tētahi kāinga e toru ngā rūma moe.
- Tata ki te 75ha ka wehea mai hei whenua rāhui me te repo.
- Ono kiromita ngā ara hīkoi me te pahikara
- E 223 katoa ngā kāinga kua hangaia, kei te hangaia rānei.
- Kua hokona kēhia ngā kāinga 70 tuatahi kua oti.
Kua tīmata kē te hanga i te pokapū takiwā noho o Lakeside, ka uru ki te papakāinga ko tētahi toa kawhe rawe, he kura tuatahi hou, he papa tākaro, he tari me ngā wāhi hokohoko me ngā tūnga waka maha. Ka mutu, kāore e tawhiti atu te hapori o Te Kauwhata mā te torohanga o Rimu Street, i whakatuwherahia i te Āperira 2022.
Te mahi tahi me Kāinga Ora – Whakaratonga Whanaketanga ā-Tāone
Ko te mutunga atu o ā mātou mahi nui ko ngā arawātea atu anō me te auahatanga i roto i te mākete hanga kāinga.
Kei te rapu a Kāinga Ora ki te hanga takiwā noho toitū i āta hoahoatia, hangaia hoki, me ngā whare me ngā ratonga tukuora tino kounga. Neke atu i te 1,200 ngā wāhanga whenua ka wātea mai i roto i te 15 tau e whai ake hei whakarato i ngā kāinga neke atu i te 40,000.
Kei te rapu mātou i te hunga e hiahia ana ki te whakauru mai ki te Rōpū Kaihanga/Kaiwhakarato Whare e hiahia ana ki te whiwhi whenua me te whakawhanake e ai ki te Whakaaetanga Whanaketanga me Kāinga Ora – UDD. E pōhiritia ana te hunga katoa e kaingākau ana, ahakoa te rahi, ki te urupare.
Rapu mōhiohio anō me pēhea tō mahi ngātahi me mātou mā te īmēra ki procurement-UDD@kaingaora.govt.nz.
Kua whakahoungia te whārangi: 19 Whiringa-ā-nuku 2022