Auahatanga
Kei te takahuri a Kāinga Ora i ana mahi hangatanga kia kakama ake, kia whaihua, ā, kia toitū.
Ka mahi tahi mātou mō tā mātou whanaketanga me ō mātou hoa mahi ngātahi ki te hanga aronga auaha hei whakapiki i te kounga me te tere o te whakarato i ngā kāinga hou me te ū ki te utu ngāwari me te whakarite kei te mau tonu ngā painga hauora me te oranga mō ngā kainoho.
Kua mahi tahi kē ō mātou rōpū auaha me Scion, BRANZ, Callaghan Innovation me ētahi atu kaihautū ahumahi. Ko ngā arawātea e mahi tahi ana mātou mō ngā hangarau, ngā hātepe me ngā hua hou ka taea pea te whakahou ko:
- Ā mātou ake rangahau me ngā kaupapa whanaketanga mō ngā papanga me ngā pūnaha hangahanga
- Tētahi pūhara GIS kia kite ai i ngā rohe waipuke, hangarau ā-nuku me te whakamahere mā ngā atahanga amiorangi ahutoru, e taea ai te tātaritanga whaihua o ngā ariā hanga ahutoru
- Te whakakapi i ngā kirimana hanga takitahi ki ngā Whakaaetanga Mahi Ngātahi Hangatanga tau-maha, e auaha, e whakarahi ai ō mātou hoa mahi ngātahi i runga i te tūturutanga
- Te whakahohoro ake i ngā wā tuku whakaaetanga rawa mā ngā hoahoa arowhānui, tukurua me te whakaae-tōmua kua whakatauria e Lifemark me Homestar
- Te mahi ngātahi me Piritahi kia ōrite ai ngā mahi kari whenua e hiahiatia ana kia rite ai te whenua mō te hanga whare i ā mātou whanaketanga nunui.
Kei te whakawhānuitia e mātou te whakamahi i te hanga i wāhi kē hei tikanga waihanga, me te whakamahi i ngā hoahoa tārai rite me ngā papanga hangatanga hangarau tiketike, pērā i ngā papa kua whakapiria.
Ko te maha o ō mātou kāinga tawhito ake he haukū, he uaua ki te whakamahana. Kei te whakahoutia e mātou ō mātou whare onāianei me te hanga whare hou he tōtika ake te pūngao me te whakamahi wai. Mā tēnei ka hauora ake ō mātou whare mō ngā rangatira o ngā whare me Papatūānuku. Kei runga atu ō mātou kāinga i ngā whakaritenga o te Tikanga Hangatanga. Nā ngā rama tōtika, ngā whakamaunga wai tōtika, ārai mātao, me ngā wini paparua ka mahana ake o mātou kāinga me te iti ake o te utu ki te noho i roto.
I te mea ko Kāinga Ora te kaiwhakarato nui rawa o Aotearoa, nō te kāwanatanga tōna mana ki te ārahi huringa. Arā, mātua ko mātou ki mua rā anō o te auahatanga me ngā mahi anga whakamua kia nui ake ngā kāinga ka hangaia.
He tikanga te hanga i wāhi kē (OSM) kei te nui haere ake te whakamahia e mātou puta noa i tā mātou kaupapa hanga kia nui ake ai ngā kāinga kounga ka whakaratoa kia tere ake, ā, me ngā putanga pai rawa mō ngā tāngata me ngā whānau, hapori me te ahumahi hangatanga.
Ko te Kāinga Hāneanea he mahinga ā-paerewa, ā, he mea tuatahi, mātāmua hoki mō te whakatutuki i tētahi oati: he kāinga āhuru, tino hauhau, he iti hoki te pūngao e hiahiatia ana.
Ka whakahaerehia e ēnei kāinga te pāmahana mā te hoahoa atamai, te whakamahi i ngā papanga hangatanga tino tiketike, me tētahi pūnaha hauhau pūkahakaha me te pupuri mahana.
Mō ā mātou kiritaki, he utu ngāwari te āhua o te noho i tētahi Whare Hāneanea, te kounga hau ā-roto hou me ngā pāmahana āhuru me te hauora puta noa i te tau. Mō te taiao, ko te tikanga kei te whakarato mātou i ngā kāinga mahinga tiketike me te tino iti ake o ngā tukunga waro whakahaere.
He āhuatanga tino hou tonu te Whare Hāneanea i Aotearoa, ā, he rōpū hoahoa motuhake hei whakatutuki i te paerewa Whare Hāneanea, he mahinga ōrite rānei.
Pānuitia ētahi atu kōrero mō Ngā Whare Hāneanea me te Kaupapa Tauira Whare Hāneanea a Bader Ventura
Nā te nui o te kaupapa hanga, me te mana ki te whakarato kāinga pai ake ki ā mātou kiritaki, e pūmau ana a Kāinga Ora ki te ine i te mahinga a ētahi o ō mātou kāinga hou ina hangaia, ā, ka nōhia.
Mā te mahi tahi me ngā kiritaki kei te whakaae, kei te tīmata mātou ki te kohikohi raraunga, ā, he whakaatu ki a mātou he pēhea te mahinga a ngā kāinga e ai ki te pai o te noho ā-mahana nei me te mahinga pūngao. Ka whakakotahitia e mātou ēnei mōhiohio me te rangahau i ngā whakaaro o ngā kiritaki, kia whānui ai tō tātou tirohanga o te noho āhuru me te mahinga a te kāinga.
Ko te kohikohi i ēnei mōhiohio tō mātou pūmau kia mutunga kore te whakapai ake, me te whakarato i ō mātou mātāpono toitūtanga. Ka āwhina tēnei i a mātou ki te tautuhi whai wāhitanga kia pai ake, ā, ka whakamōhio i ā tātou paerewa hanga anamata kia āhei atu ai ngā kiritaki katoa a Kāinga Ora ki ngā kāinga mahana, maroke me te hauora he tōtika te utu ki te whakamahana me te whakamātao.
Kua tīmata kē ngā rangahau 'tauira' tuatahi i Porirua, me ngā mahere ki te whakaroha i te kaupapa puta noa i te motu.
I ngā tāonenui, kei te nui haere atu ngā whaitua noho toru papanga whai arapiki i hangaia mai i ngā papa kua whakapiria (CLT). He rite te kaha hanganga o tēnei papanga hou ki te raima, te maitai rānei, ā, ka taea te hanga ngā papa kua hangaia kētia i tētahi wheketere – ka whakapoto tēnei i te wā hangatanga i te wāhi.
Mātakina tēnei ataata takanga wā kia kite ai ka pēhea te tere, te mārire me te tōtika o te whakaoti i tētahi whare whaitua noho CLT iti i ngā tapatāone tūroa pērā i a Ponsonby i Tāmaki Makaurau.
Kua whakahoungia te whārangi: 17 Whiringa-ā-nuku 2022