Kāinga Ora e mahi ana ki a KiwiSaver

• Kei te whakahaere ia i te Takuhe Whare Tuatahi mō te Kāwanatanga; ā,
• Kei te whakatau ia mēnā rānei ko tētahi tangata kua whai papanoho i mua, engari kāore i te pērā tonutia, ko tētahi tangata e māraurau ana, ā, nō reira e āhei ana ki te tono ki te tango i ā rātou tahua KiwiSaver hei āwhina ki te hoko i tētahi papanoho

Mō te hunga e hiahia ana ki te Takuhe Whare Tuatahi, me tono tōtika atu ki a Kāinga Ora, i roto tonu i ngā angawā e tohua ana. Arā ētahi paearu me whakatutuki kia māraurau mai, heoi ka taea te ako atu anō mō tēnei, mō te ara kia tono, ki te haere koe ki ngā whārangi Takuhe Whare Tuatahi.

Kotahi anake te tūranga o Kāinga Ora ki te tangohanga whare-tuatahi, arā ko te arotake i te tūnga pūtea o ngā kaihoko whare o mua hei whakatau i ō rātou māraurau. Mēnā he kaihoko whare o mua koe, me whakaoti koe i tētahi tono(external link) mō te whakatau me te tuku ki a Kāinga Ora. Kātahi ka arotake mātou i tō tono hei whakatau mēnā rānei kei te tūnga pūtea ōrite koe ki tētahi kaihoko whare tuatahi, e ai ki te nui o ngā rawa ka taea te hoko atu kei a koe.

Mēnā e hoko ana koe i tō whare tuatahi, ā, kore rawa koe i whai i tētahi pānga ki te papanoho i mua, ā, e hiahia ana koe ki te tango i ō takoha KiwiSaver, kāore he take o te tono ki a Kāinga Ora. Ko tāu anake he tono tōtika ki tō kaiwhakarato kaupapa KiwiSaver.

E tūtohu ana mātou, i mua i tō tono ki te Takuhe Whare Tuatahi, ki te tangohanga whare-tuatahi rānei, kia waia anō koe ki a KiwiSaver.

He mea āwhina te hihira ko tēhea momo kaupapa e whai wāhi atu ana koe, ko wai tō kaiwhakarato kaupapa, ā, e hia te roa kua takoha koe ki te kaupapa, ā, e hia te nui o ō takoha. Ka āwhina tēnei i tō tono ki tētahi Takuhe Whare Tuatahi me te tangohanga whare-tuatahi KiwiSaver.

Ka māraurau hoki pea ngā mema o ngā tahua tautuku me ngā kaupapa kaitukumahi awere ki te Takuhe Whare Tuatahi.

Ka taea e koe te kōrero atu ki tō kaitukumahi, te hihira i ngā tauākī kua riro i a koe i tō kaiwhakarato, te kōrero atu rānei ki Te Tari Taake ki 0800 549 472.

Mēnā ehara koe i te mema o KiwiSaver, ā, kei te hiahia koe ki te tūhono atu, waea ki 0800 549 472 torohia rānei www.ird.govt.nz/kiwisaver(external link) haere rānei ki www.sorted.org.nz(external link) mō ētahi mōhiohio anō mō KiwiSaver.