Consentium – Ma‘u Mafai ki hono Fakangofua ‘o ha Langa

Ko e Consentium ko e fuofua Ma‘u Mafai fakafonua ia kuo ‘osi laiseni mo lēsisita ki hono Fakangofua ‘o ha Langa, ‘a ia ‘oku ‘ikai ko ha Ma‘u Mafai Fakafeitu‘u. Ko ha kautaha tu‘u mavahe mo tau‘atāina ia ‘i loto ‘i he Kāinga Ora ‘a ia ‘okú ne ‘oatu ha ngaahi sēvesi ki he muimui pau ki he tu‘utu‘uni langá ma‘á e ngaahi ‘api ‘a e pule‘angá ‘oku a‘u hake ki he fungavaka ‘e faá.

‘Oku fakapapau‘i ‘e he Consentium ‘oku fakakakato pe mahulu hake ‘a e ngaahi ‘api fo‘ou ‘a e pule‘angá ‘i he tu‘unga fakalanga angamahení ‘a Nu‘u Sila ‘i he‘ene fekau‘aki mo e palani langá, ngaahi nāunaú, hono langá mo ‘ene fehokotaki atu ki he ngaahi nāunau fakakoló. ‘E fakalōloa atu ‘i ha tu‘unga lahi ange ‘a e vaha‘a taimi ‘e lava ai ‘e he ngaahi ‘apí ‘o hokosia ‘a e fiema‘u ‘a Nu‘u Sila ki ha ngaahi fa‘ahinga fale tuifio kehekehe ma‘á e kakaí.

‘I hono foua ‘o ha founga fakafonuá, ‘oku mau lava ai ‘o fakahokohoko ‘a e ngaahi ngofua langá, ‘o lava ai ke langa vave ange ‘a e ngaahi ‘apí pea ‘i he ngaahi feitu‘u ‘oku fiema‘u lahi taha ai kinautolú.

Ko ‘emau ngaahi sēvesí

Kuo ‘osi laiseni mo lēsisita ‘a e Consentium ki he tu‘unga fakangatangata ko ‘ení:

• Ngaahi fale ‘a e pule‘angá ‘oku a‘u hake ki he fungavaka ‘e fā. ‘Oku fakakau ‘i heni ‘a e ngaahi ngofua langa ki he ngaahi ‘api fo‘oú mo e lolotongá (ngaahi fakaleleí) pehē foki ki ha ngaahi monomono mo ha ngāue tauhi ‘oku fiema‘u ki ai ha ngofua ki he langá. (Fale Nofo‘anga 1, 2 mo e 3 mo e Langa Fakakomēsiale 1 mo e 2).
• Ngāue ki ai mo hono foaki atu ‘o e ngaahi ngofua ki he ngaahi tohi kole ngofua ki he langá
• Sivi ‘o ha ngaahi fale kuo langa lolotonga ‘oku kei ‘aonga ‘a e taimi ‘o ha ngofua ki he langá
• Fakamo‘oni‘i ‘o e faipau ki he tu‘utu‘uni ki he langá (tuku atu ‘o e ngaahi tohi fakamo‘oni ki he faipau ki he tu‘utu‘uni langá)
• Tuku atu ‘o e lisi fakahokohoko ‘o e ngaahi ngāue pau ‘e sivi ke fakapapau‘i ‘a e faipau ki he tu‘utu‘uni ki he langá (compliance schedules)

Vakai ki he uepisaiti ‘a e Consentium(external link) kapau ‘okú ke fie fakahū ha‘o kole ngofua ki he langá pe ke toe ‘ilo lahi ange.