Ko hono poupou‘i koe ‘i ho ‘apí

Kapau ‘oku ke fie talanoa mo kimautolu, kātaki ‘o fetu‘utaki mai. Te mau lava ‘o tali ha ngaahi fehu‘i fekau‘aki mo e nofo totongí, ‘oatu ha ngaahi fakamatala mo e tokoni, pe alea‘i ha fakalelei ki ho ‘apí. Te mau tokoni atu ‘i he vave taha te mau lavá ke ke ma‘u ai ‘a e ngaahi nāunau mo e tokoni ‘oku ke fiema‘ú ke ke nofo lelei ai ‘i ho ‘apí mo e komiunitií.

Ko ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá

Ko e tokotaha ia te ke ala ‘ilo lelei taha ‘i he Kāinga Ora. Ko hono fatongiá ‘oku ‘i ai hono hingoa te reo Māori mo e Faka-Pilitānia (English):

• Kaitoko Kāinga / Tokotaha Pule ki hono Tokanga‘i ‘o e Tokoni ki he Ngaahi ‘Api Nofo‘angá
• Kaitoko Kāinga Matua / Tokotaha Pule Mā‘olunga ki hono Tokanga‘i ‘o e Tokoni ki he Ngaahi ‘Api Nofo‘angá

Ko ‘emau taumu‘á ke ke ongo‘i malu, hao mo poupou‘i lelei koe ‘i ho ‘apí, fehokotaki ki ho komiunitií pea pule‘i lelei ho‘o mo‘uí mo e tu‘unga lelei ho‘o mo‘uí. ‘Oku tokangataha ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá ki hono tokoni‘i koe ke ke a‘usia eni, pea ‘i hono langa hake ha vā fefalala‘aki mo koe.

Fengāue‘aki fakatahá

‘Oku mau fakatauhoa ‘a ho‘omou Tokotaha Tokanga‘i ‘o e Tokoni ki he Ngaahi ‘Api Nofo‘angá mo koe mo ho fāmilí ‘o makatu‘unga ‘i he ‘ene ngaahi pōto‘í, taukeí mo e ‘ilo fekau‘aki mo e komiunitií, kae ‘ikai ko e fale ‘oku ke nofo aí. ‘Oku ngāue fakataha ‘emau kau Tokanga‘i ‘o e Tokoni ki he Ngaahi ‘Api Nofo‘angá takatakai ‘i he fonuá ke ‘oatu ki he ‘emau kau nofo totongí ha tokoni mo ha poupou totonu.

‘E ala ‘uhinga eni ‘e ‘ikai ke tatau ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá mo ho kaungā‘apí, ka ‘oku nau ngāue fakataha ko ha konga ‘o e kulupu tatau pe Awhi Rito. ‘I he taimi hono kotoa, ‘oku ‘i heni ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá ke tokoni – fetu‘utaki kiate ia kapau ‘oku ke fiema‘u ia.

Ko ho halafononga mo e Kāinga Ora

Pe ‘oku ke toki hiki atu, pe lolotonga nofo ‘i ha ‘api ‘a e Kāinga Ora, pe ‘oku ke teuteu ke hiki atu mei ai, manatu‘i ‘oku mau ‘i heni ke tokoni. ‘Oku mau tukupā ke tokoni‘i mo poupou‘i koe ‘i ho halafononga mo kimautolú pea ngāue mālohi ke hoko ‘a ho‘o a‘usia mo kimautolú ko ha a‘usia lelei.

‘Oku fakahoko ‘e ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá ha fatongia mahu‘inga ‘i hono a‘usia ení – ‘i ho‘o fuofua hoko ko ha kasitomā ‘a e Kāinga Ora, te ne faingamālie atu ke fakapapau‘i ‘oku ke ma‘u ‘a e me‘a kotoa ‘oku ke fiema‘ú ke ke hiki lelei mai ki ho ‘apí, ngaahi kaungā‘apí mo e komiunitiíi.

Te ne toe hokohoko atu foki ke ‘oatu ha poupou ke tokoni‘i koe ke ke nofo lelei ‘i ho ‘apí. Te ne hanganaki fetu‘utaki atu kiate koe mo fakafaingamālie‘i ia ke tokoni‘i koe mo ho fāmilí, kapau ko e me‘a ia ‘oku ke fiema‘ú. Kapau ‘okú ke fiema‘u ha me‘a, ‘oku ‘i ai ha ngaahi founga kehekehe ‘e ni‘ihi te ke lava ‘o fetu‘utaki mai ai.