Hiki atu

Kapau ‘oku ke mavahe atu mei ho ‘api Kāinga Ora, te mau fiema‘u ke ke ‘omai ha tohi fakatokanga ‘aho ‘e 28.

‘E lava ke ke fai eni ‘aki hono fakafonu pea ‘omai ‘a e foomu ko ení: Notice to End Tenancy Agreement (Fanongonongo ‘o e Fakangata ‘o e Aleapau Nofo Totongí) [PDF, 500 KB].

Hiki atu ki ha ‘api Kāinga Ora ‘e taha

Kapau ‘oku ke loto ke hiki atu ki ha ‘api Kāinga Ora ‘e taha, ko e me‘a lelei taha ke fuofua fakahokó ko e fetu‘utaki ki he ‘emau Customer Support Centre (Senitā Tokoni ki he Kasitomaá) ‘i he 0800 801 601. Te tau talanoa fekau‘aki mo ho tūkungá, pea vakai‘i ha ngaahi ‘api ‘oku ‘atā ‘i ho feitu‘ú ‘oku ne fakalato ho‘o ngaahi fiema‘ú. ‘Oku fakafehoanaki ‘a e ngaahi ‘api Kāinga Ora kotoa ki he kau nofo totongí ‘o makatu‘unga ‘i he ‘enau ngaahi fiema‘ú, pea ko e lahi taha ‘a e ngaahi feitu‘ú ‘oku ‘i ai ‘enau lisi talitali, ko ia ai ‘e ‘ikai ke mau lava ‘o palōmesi atu te ke malava ‘o hiki hangatonu leva.

Kapau te mau ma‘u ha ‘api ‘e taha ma‘á u pea ke hiki atu ‘oku ma‘a, maau, ‘ikai maumau ha m‘ea ‘i ho ‘apí pea totongi kotoa ho‘o ngaahi totongi nofó, te mau kole ki he Ministry of Building, Innovation and Employment(external link) ke fakahiki atu ‘a ho‘o totongi malu‘i lolotongá ki ho ‘api fo‘oú. Te mau toe fokotu‘utu‘u foki ke fakahiki atu (transfer) ha totongi nofo na‘a ke ‘osi totongi tōmu‘a, ki ho ‘api fo‘oú. ‘E fiema‘u ke ke fokotu‘utu‘u hono ‘ave ‘o ho‘o nāunau falé pea ke hoko ho‘o telefoní mo e ‘uhilá.

Hili ho‘o ‘omai ha fanongonongó

‘I loto ‘i he houa ‘e 48 mei hono ma‘u ‘o ho‘o fanongonongó, te mau ‘oatu ha lisi ke fakakakato ke tokoni atu ki he hikí pea mo fokotu‘utu‘u ha ‘a‘ahi faka‘osi ki he ‘apí ke mau vakai‘i ai ‘a e Property Condition Report (Līpooti ki he Tu‘unga ‘o e ‘Apí) meí he taimi na‘á ke hiki ai ki aí. Kapau ‘oku fiema‘u ke ke totongi ha fa‘ahinga monomono/fakalelei ki he ‘apí, ‘e lava ke mau tokoni atu ke fokotu‘utu‘u ha totongi fakafoki ‘oku fe‘unga mo ho‘o patisetí koe‘uhi ke ke lava ‘o totongi ‘osi ia ‘i ha vaha‘a taimi.

Kapau ‘oku ke loto ke mavahe kimu‘a ‘i he ngata ‘a ho vaha‘a taimi fakatokanga ‘aho ‘e 28, fetu‘utaki mai he vave taha te ke ala lavá. ‘I he ngaahi feitu‘u ‘oku fiema‘ua ai ‘emau ngaahi ‘apí, ‘e ala malava ke ke mavahe vave ange kapau ‘oku ma‘a mo maau ho ‘apí, pea mau tali ke fakangata tōmu‘a ‘a ho‘o nofo totongí. ‘I he hoko iá, ‘e fiema‘u ke ke totongi pē ‘a e totongi nofó kae‘oua kuo hiki mai ‘a e tokotaha nofo totongi fo‘oú.

Kapau te ke liliu ho‘o fakakaukaú

Kapau te ke liliu ho‘o fakakaukaú ‘o ‘ikai ke ke toe fie hiki, te mau ala lava pē ‘o fakangofua ke ke nofo kapau ‘oku te‘eki ai ke mau fakahoko ha ngaahi fokotu‘utu‘u kehe, hangē ko ha lēsisista mai ha tokotaha nofo totongi fo‘ou. ‘Oku mau ‘i heni ke tokoni, ko ia ai fetu‘utaki mai kiate kimautolu ‘i he vave taha te ke ala lavá kapau ‘e liliu ho tūkungá.

Kapau ‘e fakangata ‘e he Kāinga Ora ho‘o nofo totongí

Kapau ‘e fiema‘u ‘e he Kāinga Ora ke fakangata ha nofo totongi, te mau ‘oatu ha tohi fakatokanga ‘oku ‘ikai toe si‘isi‘i hifo ‘i he māhina ‘e tolu (‘aho ‘e 90), tukukehe kapau ‘e tu‘utu‘unia ‘e he Tenancy Tribunal (Fakamaau‘anga ki he Nofo Totongí) ke tali ke fakangata.

‘I he taimi te mau ‘oatu ai ha fakatokanga, te mau fokotu‘utu‘u ha taimi ke ‘a‘ahi ai ki he ‘apí ke vakai‘i ‘a e ngaahi monomono/fakalelei ‘oku fiema‘u ke fakahokó pe ko e ngaahi maumau kuo ‘osi fakalelei‘í kimu‘a ke ke mavahe.

Kapau na‘a ke fuofua hiki mai ki ha ‘api Kāinga Ora kimu‘a ‘i he ‘aho Sāpate 7 ‘Epeleli 2019, ‘e ‘osi pau pē na‘a ke totongi ha totongi malu‘i. Kapau na‘a ke fai pehē, te mau kole ki he Ngaahi Kautaha Nofo Totongi ‘a e Potungāue Ministry of Business, Innovation and Employment(external link)ke totongi fakafoki atu ia ‘i he taimi te mau fakapapau‘i ai ‘oku ‘i ha tu‘unga lelei ho ‘apí pea kuo totongi kotoa ho totongi nofó.

Kole ‘o ha tohi fakamo‘oni nofo totongí

Kapau ‘okú ke hiki atu meí ho ‘api Kāinga Ora ki ha nofo‘anga totongi fakatāutaha te ke lava ‘o kole ha tohi fakamo‘oni nofo totongi meiate kimautolu.

‘Oku tokoni ‘a e tohi fakamo‘oni nofo totongí ki he kau lenilooti fakataautahá ke fakapapau‘i ‘oku nau fili ha tokotaha lelei ke nofo ‘i honau ‘apí. Ko e ngaahi tohi kole ki he nofo totongí ‘oku kau ki ai ‘a e ngaahi fakamatala fakafo‘ituitui ko ia ai ‘e toki lava pē ke ‘ave hangatonu ia ki he kasitomā ‘a e Kāinga Ora. Kapau ‘e ‘eke atu ‘e ho‘o lenilootí pe pule falé ha tohi fakamo‘oni ki he nofo totongí, ‘e fiema‘u ke ke kole mai ia kiate kimautolu pea toki ‘ave atu kia kinautolu.

Ko e tohi fakamo‘oni nofo totongí ko ha tohi ia meí he Kāinga Ora ‘oku kau ki ai ‘a e ngaahi me‘a hangē ko e:

• Lōloa ‘o ho‘o hoko ko e kasitomā ‘a e Kāinga Ora.
• Pe na‘á ke tauhi ‘a e ‘apí ke ‘i ha tu‘unga ma‘a mo maau.
• Pe ‘oku lolotonga ‘i ai ha‘o mo‘ua ‘oku te‘eki ai ke totongi ki he Kāinga Ora.

Ko e founga ‘eni ke kole ai ha tohi fakamo‘oni nofo totongí:

1. ‘Alu ki he ‘emau foomu ‘Ngaahi faka‘eke‘eke mo e fakamatala tokoní (Enquiries and feedback)’
2. ‘I he ‘Fa‘ahinga ‘o e faka‘eke‘eké (Types of enquiry)’ lomi‘i ‘a e ‘Me‘a kehe (Other)’
3. ‘I he ki‘i puha ki he leá (text box) fakahaa‘i mai ai ke mau ‘ilo‘i ‘okú ke kole ha ‘Tohi Fakamo‘oni Nofo Totongi’
4. Fakapapau‘i ke fakakau ho‘o hingoa kakató, tu‘asila Kāinga Ora, mo e tu‘asila ki he lī tohí pe tu‘asila ‘īmeili ke mau ‘oatu ki ai ‘a e tohi fakamo‘oni nofo totongí.

Ngaahi kole ‘a e fa‘ahi hono tolú (third party) ke talanoa‘i ha tohi fakamo‘oni nofo totongi

Kapau ‘e fiema‘u ‘e ha fa‘ahi hono tolu (hangē ko ho‘o lenilootí pe pule falé) ke talanoa‘i ho‘o tohi fakamo‘oni nofo totongí mo e Kāinga Ora, ‘e fiema‘u ke nau ‘uluaki ma‘u ho‘o fakangofuá.

Ke fokotu‘utu‘u hono ‘ave ho‘o fakangofuá ki ha fa‘ahi hono tolu, kātaki ‘o muimui ‘i he ngaahi sitepu ko ‘ení:

1. ‘Alu ki he ‘emau foomu ‘Ngaahi faka‘eke‘eke mo e fakamatala tokoní (Enquiries and feedback)’
2. ‘I he ‘Fa‘ahinga ‘o e faka‘eke‘eké (Types of enquiry)’ lomi‘i ‘a e ‘Me‘a kehe (Other)’
3. ‘I he ki‘i puha ki he leá fakahaa‘i mai ai ‘okú ke ‘loto ke ‘oatu ho‘o fakangofuá ki ha fa‘ahi hono tolu ke talanoa‘i ho‘o tohi fakamo‘oni nofo totongí mo e Kāinga Ora’. Manatu‘i ke fakakau ho‘o fika telefoní pe tu‘asila ‘īmeilí koe‘uhí ke mau fetu‘utaki atu pea tokoni‘i koe ke fokotu‘utu‘u eni.