Ko e tauhi ‘o ho ‘apí

Ko e Kāinga Ora te nau:

• fakapapau‘i ‘oku ma‘a mo maau ho ‘apí ‘i he taimi te ke hiki ai ki aí
• tauhi ho ‘apí ke ‘i ha tu‘unga kei mālohi lelei - ‘oku hokohoko atu ‘emau polokalama fakalelei ki he kotoa ‘emau ngaahi ‘apí
• fakahoko ha ngaahi monomono fiema‘u fakavavevave ‘i he vave taha ‘e ala lavá
• vakai‘i pe ‘oku ngāue ho‘o me‘a fakatokanga kohú
• monomono ‘a e ngaahi maumau angamahení ‘i he vave taha ‘e ala lavá.

Kole ki ha fakalelei

Ki ha ngaahi fehu‘i ki ha ngaahi monomono pe fakalelei fakalūkufuá, fetu‘utaki mai kiate kimautolu ‘i he 0800 801 601 pea fili ‘a e 'fili 4 - ngaahi monomono mo e fakaleleí (option 4 - repairs and maintenance)'. Te ke toe lava foki ‘o fakahū atu ha kole ki ha ngāue ‘oku ‘ikai fiema‘u fakavavevave ‘aki hono ngāue‘aki ‘a e MyKaingaOra ‘i ha fa‘ahinga taimi pē, pea fakahoko fiemālie ia mei ho ‘apí. Te ke lava vakai‘i ‘a e tu‘unga ‘o e ngaahi ngāue lolotongá ‘i he konga "Current Maintenance" (ngaahi ngāue fakalelei ‘oku lolotonga fakahokó).

Ko e ngaahi monomono fiema‘u fakavavevavé ko ha ngaahi palopalema ia ‘oku ne uesia ho‘o mo‘ui leleí mo e malu mo e haó. Te mau fakalelei‘i eni ‘i loto ‘i he houa ‘e 4, ‘i he taimi ‘oku malava aí.

‘Oku kau ki he ngaahi monomono ‘oku fiema‘u fakavavevavé ‘a e:

• ngaahi fakatafe, falemālōlō ‘oku mapuni pe ngaahi palopalema ki he fakatafenga vai ‘ulí
• mama ‘a e kasá pe ngaahi mama lahi ‘a e vaí
• mate ‘a e ‘uhilá pe vai mafaná
• ngaahi palopalema faka‘uhila.

Kapau ‘oku ‘ikai ke fakavavevave ‘a e ngāué te mau ‘omai ha tokotaha ngāue (contractor) ‘i loto ‘i he ‘aho ngāue ‘e 10 ke vakai‘i ‘a e me‘a ‘oku fiema‘ú.

Te nau ala pehē ‘oku fiema‘u ke fakahoko ‘a e ngāué ‘i he vave tahá pe ‘e fakakau ‘a e ngāué ‘i he ‘emau polokalama ngāue fakalelei kuo palani‘í. ‘Oku fa‘a lelei ange ke fakahoko ha ngaahi fakalelei, hangē ko e vali pe ngaahi fakalahi ki he ngaahi ‘api lahi ‘i he taimi pē ‘e taha ‘o ‘ikai fakahoko fakatāutaha. Te mau ngāue fakataha mo koe ki he founga fakalelei lelei tahá.

Fakahoko pē ‘e au ‘eku ngaahi fakaleleí/monomonó

Kapau ‘oku ke fiema‘u ke fakahoko ha ngaahi fakalelei ‘i ho ‘apí, ‘uluaki talanoa mai kiate kimautolu ‘i he Customer Support Centre (Senitā Tokoni ki he Kasitomā) ‘i he 0800 801 601 pea fili ‘a e 'fili 4 - ngaahi monomonó mo e fakaleleí' (option 4 - repairs and maintenance).

‘Oku ‘ikai fiema‘u ke ke fetu‘utaki mai kapau ‘oku ke fiema‘u pē ‘e koe ke ke fakahoko ha ngaahi monomono iiki hangē ko e fakama‘u ‘o ha ngaahi sikalu mo e fetongi ha ngaahi fo‘i ‘uhila, ka ‘oku mau lava ‘o tokoni kapau ‘oku ‘ikai ke ke falala te ke lava pē ‘o fakahoko pe ‘oku ‘ikai ke ke ma‘u ‘a e ngaahi me‘angāue totonu ke fakahoko ‘aki ‘a e ngāué ‘i ha tu‘unga malu.

Ke fakapapau‘i ‘oku a‘usia ‘e he ‘emau ngaahi ‘apí ‘a e ngaahi tu‘unga malu mo haó, te mau vakai‘i ha fa‘ahinga ngāue pē te ke fakahoko. Kapau ‘e ‘ikai te ne a‘usia ‘emau ngaahi tu‘ungá pea fiema‘u ke toe fakahoko ‘e ha tokotaha ngāue (contractor) ‘a e ngāué, ‘e ala fiema‘u nai ke ke totongi ‘a e fakamolé.

Fakalelei‘i ‘o ha ‘api ki he kau faingata‘a‘iá

Kapau ko ha tokotaha nofo totongi Kāinga Ora koe pea ‘oku ke ma‘u ha faingata‘a‘ia fakaesino pe fiema‘u ke malava ‘o fenga‘unuaki takai holo ‘a ia ‘e fiema‘u ki ai ha ngaahi fakalelei ki ho ‘apí, fetu‘utaki mai ke tau talanoa ki he founga te mau ala tokoni atu aí. Fetu‘utaki mai kiate kimautolu

Kau ngāue langa ‘osi ma‘u tikite

Ko e kau ngāue konituleki ‘oku ngāue ma‘a kimautolú ‘oku ha‘i kinautolu ‘e ha Tu‘utu‘uni Faka‘ulungaanga (Code of Conduct). ‘Oku fiema‘u ai heni kinautolu ke:

• fetu‘utaki atu kiate koe ke alea‘i ha taimi ke fakahoko ai ‘a e monomonó - tukukehe kapau ‘oku fiema‘u fakavavevave ‘a e ngāué ‘o mahino kiate kimautolu te ke ‘i api pē.
• tuku atu honau hingoá, tu‘asilá, fika telefoní, ‘ahó, taimí mo e ‘uhinga ‘enau fetu‘utaki atú kapau ‘oku ‘ikai ke ke ‘i ‘api ‘i he ‘enau fetu‘utaki atú
• fakahā atu honau ‘ilo‘angá kimu‘a ke nau hū atu ki ho ‘apí
• ngaohi ke malu ho falé, ma‘a mo maau ‘i he faka‘osinga ‘o e ‘aho ngāue kotoa, pea to‘o atu ‘enau vevé
• faka‘apa‘apa‘i ho tu‘unga fakafo‘ituituí pea tokangaekina ho ‘apí mo e ngaahi koloá
• ‘ai ha vala taau pea mo angalelei atu kiate koe ‘i he taimi kotoa.

Te ke lava ‘o tokoni ‘aki:

• ho‘o ‘i ‘api ‘i he taimi na‘e alea ki aí pe ‘omai kiate kimautolu ha ngaahi fakamanatu/fakatokanga taimi lōloa kapau ‘e ‘ikai ke ke ‘i ‘api
• ‘unuaki‘i ‘a e ngaahi nāunau fale mo e ngaahi koloa fakafo‘ituitui ‘oku ‘i he feitu‘u ‘alu‘angá
• tauhi ‘a e longa‘i fānaú mo e ngaahi monumanu pusiakí ke hao mei he fakatamakí.