Ngaahi pēnolo sola ‘i ho ‘apí

Anga ‘o e ngāue ho‘o ngaahi pēnolo solá

• Ko e ngaahi pēnolo sola ‘oku tu‘u ‘i ho‘o ‘ató ‘okú ne mimisi ‘a e ivi meí he la‘aá pea liliu ia ki ha ivi faka‘uhila.
• Ko e ivi faka‘uhila ko ení ‘oku tafe ia ‘i loto ‘i ha ngaahi uaea meí he ‘ató ki ha mīsini ‘okú ne mapule‘i ‘a e fetāfeaki ‘a e ivi faka‘uhilá (ko e ki‘i puha eni ‘oku fokotu‘u ki ha tafa‘aki ‘e taha ‘o ho‘o ngaahi holisí).
• ‘Oku teuteu‘i ‘e he mīsini ‘okú ne mapule‘i ‘a e fetāfeaki ‘a e ivi faka‘uhilá ‘a e ivi faka‘uhilá ke ngāue‘aki ‘i ho ‘apí pea te ke lava ‘o ngāue‘aki ia ki ha fa‘ahinga me‘a pē ‘oku fiema‘u ki ai ha ‘uhila (‘e ‘ikai fiema‘u ke ke fai ha me‘a makehe ange).
• Ko ha ivi faka‘uhila ‘oku ‘ikai ke ngāue‘aki ‘i ho ‘apí ‘oku fakafoki ia ki he feitu‘u ‘okú ne pule‘i ‘a e fetāfeaki ‘a e ‘uhilá ‘i ho koló.

FAKATOKANGA

‘Oua ‘e ala ki he mīsini ‘okú ne mapule‘i ‘a e fetāfeaki ‘a e ivi faka‘uhilá pe ko e ngaahi uaea ‘oku hoko ki aí. ‘I he taimi ‘e ni‘ihi ‘oku mo‘ui ia pea ‘e lava ke soki koe mei ai.

Ngaahi leleí

• Te ke fakahaofi ai ha pa‘anga ‘i ho‘o mo‘ua ‘uhilá koe‘uhí ko e ivi ‘uhila sola ‘oku fakatupu ‘e ho‘o ngaahi pēnoló ‘oku ta‘etotongi ia ma‘á u ke ke ngāue‘aki.
• Ko e lahi ‘o e pa‘anga te ke fakahaofí ‘oku fakatefito ia ‘i he lahi ‘o e ngaahi pēnolo ‘oku fokotu‘u ‘i ho‘o ‘ató mo e lahi ‘o e ‘uhila ‘okú ke ngāue‘aki lolotonga ‘a e ulo ‘a e la‘aá—‘oku mau fakafuofua te ke fakahaofi ha pa‘anga ‘e lauingeau ‘i he ta‘u.
• Ko hono ngāue‘aki ‘a e solá te ne toe fakasi‘isi‘i foki mo e kasa ‘okú ne fakamāfana‘i ‘a e māmaní ‘oku tukuange atu meí ho ‘apí, ‘i he si‘isi‘i ange hono ngāue‘aki ‘o e kasá mo e loló mo e si‘isi‘i ange ‘a e ngaahi kasa ‘okú ne fakamāfana‘i ‘a e māmaní. ‘Oku ‘uhinga leva ia ko ha palanite malu ange, mo fakatupu mo‘ui lelei ange ma‘á e tokotaha kotoa!

Ko hono ngāuelelei‘aki ho‘o ivi solá

Feinga ke ngāue‘aki ‘a e ‘uhilá lolotonga ‘a e ‘ahó ‘i he taimi ‘oku ulo ai ‘a e la‘aá. Ko ha ngaahi fakakaukau eni ‘e ni‘ihi ke tokoni:

• Ngāue‘aki ho‘o mīsini foó, ‘ōvaní pe ngaahi me‘angāue kehé lolotonga ‘a e taimi ‘ahó.
• Feinga ke toki kaukau ‘i he konga ki mui ‘o e houa pongipongí, koe‘uhí ke lava ‘o ngāue‘aki ‘a e ‘uhila meí he solá ke fakamāfana‘i ho‘o tangikē vai mafaná.
• Feinga ke faka‘ehi‘ehi mei hono ngāue‘aki taimi taha ho‘o ngaahi me‘angāué koe‘uhí te ke ngāue‘aki ai ha ‘uhila lahi ange ‘i he ivi ‘oku fakatupu ‘e ho‘o ngaahi pēnoló. ‘I he‘ene hoko ení, te ke totongi ai ‘e koe ho‘o ‘uhilá ‘i he tu‘unga totongi angamaheni mei ho‘o kautaha ‘uhilá.
• Kapau te ke vahevahe ‘a e lahi ‘o e ‘uhila ‘okú ke ngāue‘aki lolotonga ‘a e ulo ‘a e la‘aá, te ke fakasi‘isi‘i ai ‘a e lahi ‘o e ‘uhila ‘e fiema‘u ke ke totongí.

‘Oku ‘i ai ‘a e ngaahi fakamatala ‘aonga ‘a e Consumer NZ(external link) fekau‘aki mo e lahi ‘o e ngaahi fakamole angamaheni ke ngāue‘aki ai ho‘o ngaahi me‘angāué.

Vakai‘i ha ngaahi fakakaukau ke tokoni ‘e ni‘ihi ki hono fakahaofi ‘a e ma‘u‘anga iví(external link).

‘Ilo ki he lahi ‘o e ‘uhila ‘oku fakatupu ‘e ho‘o ngaahi pēnolo solá

• Ko e lahi ‘o e ‘uhila ‘oku lava ‘o fakatupú ‘oku hā ia ‘i ho‘o puha ma‘u‘anga ivi ‘uhilá (inverter).
• Kapau ‘okú ke ma‘u ha sola na‘e toki fa‘u mo fokotu‘u, te ke lava ‘o vakai ki he lahi ‘o e ‘uhila ‘okú ne fakatupú ‘i he uepisaiti pe app Fronius Solar.
• Te ke lava ‘o hiki (download) ‘a e app ki ho‘o komipiutá pe fakafou ‘i he playstore pe app store ‘i ho‘o telefoni to‘oto‘ó.
• Kapau ‘okú ke ma‘u ha ma‘u‘anga sola Solshare ‘oku fokotu‘u ‘i ho‘o feitu‘u nofo‘anga fakatokolahí ‘e ‘ikai ke ke lava ‘o ngāue‘aki ha app koe‘uhí ‘oku vahevahe hono ngāue‘aki ‘a e solá ‘i he kotoa ‘o e ngaahi ‘apí. Kapau ‘okú ke fiema‘u ha fakamatala lahi ange ki he founga hono ngāue‘aki ení, kātaki ‘o ‘īmeili mai kiate kimautolu ‘i he solartrials@kaingaora.govt.nz

‘Uhila sola ‘oku hulú

• Kapau ‘oku fakatupu ‘e ho‘o ‘apí ha ‘uhila ‘oku hulu hake ‘i ho‘o fiema‘ú, ‘e fakafoki ia ki he feitu‘u fe‘aveaki ‘uhilá.
• ‘E ala fakahū atu ‘e ho‘o kautaha ‘uhilá ha ki‘i totongi ki ho‘o ‘akauní ki he ‘uhila hulu ko ení.
• ‘Oku lelei ke vakai‘i pe ‘okú ke kau ki ha fokotu‘utu‘u ki he totongi ‘uhilá te ne ‘oatu kiate koe ha totongi ki he kWh kotoa pē ‘okú ke fakafoki ki he feitu‘u fe‘aveaki ‘uhilá - ‘e lava ke ke ‘eke eni ki ho‘o kautaha ‘uhilá.

‘Oku lolotonga fakatotolo‘i ‘e he Kāinga Ora ha founga ‘e lava ke tau ngāue‘aki ai ‘a e ‘uhila hulu ko ení ke fakasi‘isi‘i ‘aki ‘a e ngaahi mo‘ua ‘uhila ‘a e kau kasitomā kehe ‘oku ‘ikai ke ‘i ai ha‘anau ngaahi pēnolo ‘uhilá.

Kapau ‘e hoko eni ‘e ‘ikai leva ke ke toe ma‘u atu ha totongi ki he ‘uhila ‘oku ‘ová. ‘I hono kehé, ‘e fakafoki eni ki he Kāinga Ora koe‘uhi ke mau tokoni‘i ‘aki ia ha kau kasitomā kehe ke fakasi‘isi‘i ‘enau ngaahi mo‘ua ‘uhilá.

‘Uhinga ‘oku ‘ikai ke fenāpasi ai ‘a e ngaahi fokotu‘utu‘u totongi ‘uhilá ‘oku totongi ki mu‘a hono ngāue‘akí (pre-pay) mo e ngaahi pēnolo solá

• Ko e ngaahi ‘api ‘oku ‘i ai ‘enau solá ‘oku ‘i ai ha ngaahi mita import-export (mita ki hono fua ‘a e lahi ‘o e ‘uhila ‘oku ngāue‘akí mo e ‘uhila ‘oku fakafokí) ‘oku fokotu‘u ki mu‘a ke nau lava ‘o hoko ‘enau ‘uhilá ki he netiueka ‘uhilá. Ko e ngaahi mita import-export ko ení ‘oku ‘ikai ke fenāpasi ia mo e ngaahi fokotu‘utu‘u totongi ‘uhila ‘oku totongi ki mu‘á.
• Kapau te ke liliu ki ha fokotu‘utu‘u totongi ‘uhila ‘oku totongi ki mu‘a, ‘e fiema‘u leva ke to‘o ho‘o mita import-export pea ‘ikai nai ke ke toe lava ‘o ngāue‘aki ‘a e ‘uhila solá.
• ‘E lava ke tokoni atu ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá ke ma‘u ha kautaha ‘uhila ‘oku fe‘unga mo koé. Te ke toe lava foki ‘o sio ki he ngaahi fokotu‘utu‘u totongi ‘uhila ‘oku ‘atā atú ‘i he www.powerswitch.org.nz(external link).

Ko e lōloa ‘a e mo‘ui pe ngāue ‘o ho‘o ngaahi pēnolo solá

• Ko e ngaahi pēnolo solá ‘e fokotu‘u ma‘u ia ‘i ho ‘apí, pea ‘oku totonu ke tolonga ‘i ha ta‘u nai ‘e 25 pe lahi ange ai.
• Te mau siofi/muimui‘i ho‘o ngaahi pēnolo solá ‘i ha ta‘u nai ‘e ua hili hono fokotu‘ú. Koe‘uhí ‘oku mau fie ‘ilo ki he anga ‘o e ngāue ‘a e ngaahi solá ki hono tokoni‘i ke fakasi‘isi‘i ‘a e ngaahi mo‘ua ‘uhilá.