Māpule‘i ‘o e ‘uli‘i ‘e he mefi‘emifetaminí/‘aisí ‘i homau ngaahi ‘apí

Ko ha founga ‘oku makatu‘unga ‘i he mo‘ui leleí

Hangē ko e kau lenilooti kehé, ‘oku fehangahangai ‘a e Kāinga Ora mo e palopalema ‘o e ‘uli‘i ‘e he mefi‘emifetaminí/‘aisí ‘a e ni‘ihi ‘o homau ngaahi ‘apí.  ‘Oku mau tokanga fakamātoato ki he me‘á ni.  ‘Oku mau toe fakatokanga‘i foki ko hono ngāue‘aki ‘o e mefi‘emifetaminí ‘oku tamu‘omu‘a ‘ene hoko ko ha palopalema fakaemo‘uilelei mo ma‘unimā kitá pea ‘okú ne toe lava foki ‘o uesia kotoa ‘a e ngaahi mēmipa ‘o ha ‘api, kau ai ‘a e fānaú.

‘I he ‘uhinga ko iá, ‘oku mau fokotu‘u ai ha founga ‘oku makatu‘unga ‘i he mo‘ui leleí ki hono māpule‘i ‘a e mefi‘emifetaminí ‘a ia ko e fiema‘u mu‘omu‘á ke fakapapau‘i ‘oku nofo lelei ‘a e kakaí mo e ngaahi fāmilí ‘i homau ngaahi ‘apí.   

Kapau ‘oku hoha‘a ha tokotaha nofo totongi fekau‘aki mo e mo‘ui lelei mo e tu‘unga lelei ‘o e mo‘ui ‘o e fa‘ahinga ‘i honau ‘apí, pea fakatokanga‘i hano ala uli‘i ‘e he mefi‘emifetaminí/‘aisí, te mau fokotu‘utu‘u ke sivi‘i ‘a e ‘apí. Te mau toe fakapapau‘i foki ‘oku nofo ‘a e kau nofo totongí ‘i ha fale ‘oku malu mo hao ‘i he‘emau lolotonga ngāue ki hono sivi mo hono fakama‘a iá.

‘Oku ‘ikai ke mau fakangofua hono ngaohi mo e tufaki ‘o e mefi‘emifetaminí ‘i he ngaahi ‘api ‘oku mau tokanga‘í, pea ‘e ‘ave ‘e he  Kāinga Ora ha fa‘ahinga fakamo‘oni pē ‘o hano ngaohi pe tufaki ki he Kau Polisí.

Te mau toe fakapapau‘i foki ‘oku ma‘u ‘e he ‘emau kau nofo totongí ‘a e ngaahi fakamatala fekau‘aki mo e founga mo e feitu‘u te nau lava ‘o ma‘u ai ‘a e tokoni mo e ‘ilo‘anga ki he ngaahi sēvesi ‘o e ma‘unimā ‘e he faito‘o kongatapú.

Ko hono sivi mo fakama‘a ‘a e mefi‘emifetaminí

‘I he taimi ‘oku mau ‘ilo ai ki hano ‘uli‘i ‘e he mefi‘emifetaminí ha ‘api, pea ma‘u ha ‘uhinga lelei ke tui ai ‘oku mo‘oni ia, te mau muimui leva ki ha founga ngāue fefeka ke fakahoko hano sivi, pea fakama‘a ia kapau ‘e fiema‘u. 

‘I hano ma‘u ha ola ‘o ha sivi ‘oku fakapapau‘i ai ‘oku ‘i ai ha ‘uli‘i ‘e he mefi‘emifetamini ‘o laka hake ‘i he 15 µg/100 cm2 ki hono ngāue‘aki ‘o e mefi‘emifetaminí, ‘e tupu mei heni ha fiema‘u ke fakama‘a ‘o e ngaahi feitu‘u ‘o e ‘apí ‘oku uesiá.

‘Oku mau ngāue fakataha mo ha kau konituleki taukei mo pōto‘i ‘a ia ‘oku nau mataotao ‘i he ngāue fakama‘a ‘o e mefi‘emifetaminí.

Ngaahi fakangatangata ‘o e mefi‘emifetaminí

‘I he ‘aho 29 ‘o Mē 2018, na‘e tukuange atu ai ‘e he Pule Fale‘i Fakasaienisi ‘a e Palēmiá ‘i he taimi ko iá ha līpooti na‘e fakakaveinga '‘Uli‘i ‘e he mefi‘emifetaminí/‘aisí ‘a e ngaahi ‘api nofo‘angá: Ko e fehangahangai mo iá, ngaahi tu‘unga fakatu‘utāmakí mo e faka‘uhinga‘i ‘o e ngaahi tu‘ungá'.

Na‘e lave ‘a e līpootí ko e "fehangahangai mo ha mefi‘emifetamini ‘oku ‘i lalo hifo hono lahí ‘i he 15 µg/100 cm2 (maikolōkalami ‘e 15 ‘o e mefi‘emifetaminí ki he senitimita sikuea ‘e 100 ‘o e feitu‘u na‘e siví) ‘e ngalingali ‘ikai ke ne fakatupunga ha ngaahi ola tamaki".

Na‘e fokotu‘u ‘e he Housing New Zealand (Kāinga Ora – Homes and Communities ‘i he taimi ní) ‘a e ngaahi ‘ilo meí he līpooti ko ení, kau ai ‘a e ngaahi fakangatangata ko ení, ki he founga ko ia ke sivi mo fakama‘a ‘a e ngaahi ‘api ‘oku uesia ‘e he mefi‘emifetaminí.

Fetu‘utaki mai kiate kimautolu

Kapau ‘okú ke nofo ‘i ha ‘api Kāinga Ora pea ‘oku ‘i ai ha‘o ngaahi hoha‘a fekau‘aki mo ha ‘uli‘i ‘e he mefi‘emifetaminí, kātaki ‘o fakahoko ia ki ho‘o Tokotaha Tokanga‘i ‘o e Tokoni ki he Ngaahi ‘Api Nofo‘angá pe telefoni mai ‘i he 0800 801 601 ke talanoa ki hano fokotu‘utu‘u ha sivi.