Kau nofo totongi ke nau ma‘u ‘a e ‘apí
Kapau ‘okú ke lolotonga hoko ko ha tokotaha nofo totongi ‘a e Kāinga Ora, te ke ala ‘atā atu ki ha pa‘anga tokoni ke ‘alu ki ho‘o fakatau ‘a e ‘api ‘okú ke lolotonga nofo aí.
‘Oku faka‘atā atu ‘e he pule‘angá ‘a e kau nofo totongi ‘i he ngaahi fale ‘a e pule‘angá ha fili ke fakatau ‘a e fale ‘oku nau lolotonga nofo aí. Ko e faka‘ānaua ki he ma‘u ‘apí ‘e ala hoko ia ma‘á u, ‘o ‘ikai toe fiema‘u ia ke ke fetu‘utaki ki he kautaha fetukutukú. Kapau ‘oku ‘ikai ke ke fie fakatau ho ‘apí, ‘oua ‘e tokanga ki ai, te ke lava ‘o hokohoko atu pē ho‘o nofo totongi meiate kimautolú. ‘Oku ‘ikai fakafatongia‘i koe ke ke fakatau.
‘Oku mahu‘inga ke fakatokanga‘i ‘e ‘ikai fakafaingamālie‘i kotoa atu ‘a e ngaahi ‘apí ke fakatau.
Pa‘anga tokoni ki he Kau Nofo Totongí ke nau Ma‘u ‘a e ‘Apí
Ko e Pa‘anga tokoni ki he Kau Nofo Totongí ke nau Ma‘u ‘a e ‘Apí ko ha me‘a‘ofa ia ‘oku 10% ‘o e mahu‘inga fakatau ‘o e ngaahi fale filifili ‘a e Kāinga Ora ‘oku a‘u hake ki he $20,000. Ko e Pa‘anga tokoni ki he Kau Nofo Totongí ke nau Ma‘u ‘a e ‘Apí ‘oku ‘ikai ke ‘atā ia ‘i he ngaahi feitu‘u ‘oku fiema‘ua ai ‘a e ngaahi fale ‘a e pule‘angá. ‘Oku kau ki he ngaahi feitu‘u ko ení ‘a:
- ‘Aokalani
- Uelingatoni
- Christchurch
- Hamilton mo
- Tauranga.
Fakatokanga‘i ange ‘oku ‘atā atu pē eni ki hono fakatau ‘o ha ngaahi ‘api Kāinga Ora pea ‘oku ‘ikai lava ha tohi kole ia ki ai ke fakatau ha ngaahi ‘api kehe.
Kapau ko ha tokotaha nofo totongi koe pea faka‘amu ke tohi kole ki he pa‘anga tokoni ki he Kau Nofo Totongí ke nau Ma‘u ‘a e ‘Apí te ke lava ‘o fakafonu ‘a e foomu tohi kole pa‘anga tokoni ki he Kau Nofo Totongí ke nau Ma‘u ‘a e ‘Apí [PDF, 378 KB] ko e konga ‘o ho‘o tohi kole ke fakatau ‘a e ‘api ‘okú ke lolotonga nofo aí.
Hili hono fakafonú te ke lava ‘o faitaa‘i fakakomipiuta (scan) ia pea ‘īmeili atu ‘a ho‘o tohi kolé ki he THOGrant@kaingaora.govt.nz.
‘E toe lava foki ‘e he kau fakataú ‘o fakataha‘i ‘a e Pa‘anga tokoni ki heKau Nofo Totongí ke nau Ma‘u ‘a e ‘Apí mo e Nō ki ha Fuofua Fakatau ‘Apí, mo e/pe toho ki he fuofua fakatau ‘apí mei he KiwiSaver, kapau ‘okú ke ‘atā atu ke fakatau ‘a e nofo‘anga ‘okú ke lolotonga nofo aí.
Kapau ko ha tokotaha nofo totongi koe pea ‘okú ke fie fakatau ho ‘apí te ke ala:
- tukuhifo ‘a e polosiua Kau Ma‘u ‘Api Nofo Totongí [PDF, 393 KB]
- telefoni mai ‘i he 0508 935 266 pe
- fakafonu ‘a e foomu ‘i lalo ko ení:
‘Oku ‘i ai ‘a e ngaahi tokoni fakangāue ‘e ni‘ihi ‘a e Kāinga Ora ‘e ala tokoni atu kiate koe ki he ma‘u ‘apí
Nō ki ha Fuofua Fakatau ‘Api
Te ke ala ‘atā atu ki he Nō ki ha Fuofua Fakatau ‘Apí ‘aki ha tipōsiti mā‘ulalo ange, vakai ki he peesi Nō ki ha Fuofua Fakatau ‘Apí pe talanoa ki he taha ‘o e ngaahi kautaha nō ‘oku kau maí.
Fakapa‘anga ki he Fuofua Fakatau ‘Apí mo e toho ki he fuofua fakatau ‘apí mei he KiwiSaver
Kapau ko ha mēmipa koe ‘o e KiwiSaver te ke ala ‘atā atu ki ha Fakapa‘anga ki he Fuofua Fakatau ‘Apí pe malava ‘o toho kotoa pe konga ‘o ho‘o ngaahi tātānaki KiwiSaver ‘o ngāue‘aki ‘a e toho ‘o e fuofua fakatau ‘api KiwiSaver.
Ke ‘ilo fekau‘aki mo e ngaahi tokoni fakangāue kehekehe ‘oku ma‘u ke tokoni ‘aki ki he kau fuofua fakatau ‘apí telefoni ki he 0508 935 266, ‘i he vaha‘a ‘o e 8 pongipongi mo e 5 efiafi, Mōnite ki he Falaite pe ‘īmeili ki he kiwisaver.enquiries@kaingaora.govt.nz.
- Ke fakataú, ‘e ala fiema‘u nai ke ke nō ha pa‘anga mei ha kautaha nō. ‘E fiema‘u nai heni ke ke fakahā:
- ha lēkooti fakamo‘ua ‘oku tu‘unga lelei
- te ke malava ‘o fakahoko ha ngaahi totongi fakafoki ki he nō fakatau ‘apí
- ‘okú ke ma‘u ha pa‘anga tipōsiti ke malu‘i ‘aki ‘a e nō fakatau ‘apí.
- Te mau lava ‘o fale‘i atu ha fakafuofua ki he mahu‘inga ‘o e fakataú - fakatokanga‘i ko e tataki/tokoni pē eni pea ‘e kei fiema‘u pē ke fakahoko ha fakamahu‘inga totonu (proper valuation).
- ‘I ho‘o fakamahino pē ‘okú ke malava ‘o fakahoko ‘a e fakataú ‘i he mahu‘inga kuo fakamahu‘inga‘í, ‘e fekau‘i leva mo totongi ‘e he Kāinga Ora ke fakahoko ha fakamahu‘inga ‘e ha tokotaha fakamahu‘inga ‘api kuo lēsisita.
- ‘E fakatau atu ho ‘apí ‘i he mahu‘inga fakamāketi lolotongá.
- ‘I he taimi ‘e fakapapau‘i ai ‘a e mahu‘inga fakataú, ‘oku mau toe fokotu‘u atu ke ke ma‘u mai ha līpooti sivi‘i ‘o e ‘apí ‘e ha tokotaha langa. ‘E fakafuofua ‘a e fakamole ki hení ki he $400. Te ke ala fiema‘u nai ke talanoa ki ha loea ke ‘eke ha ngaahi fehu‘i fakalao te ke fie ‘ilo ki ai.
‘Oku ‘i ai ‘a e ngaahi fakamole mahu‘inga kehe ‘e fiema‘u nai ke ke fakakaukau ki ai ‘i hono fakatau ‘o ha ‘api, hangē ko e:
- Ngaahi totongi ki he ngaahi me‘a fakalaó - ‘ikai toe si‘isi‘i hifo ‘i he $1,000
- Totongi malu‘i ‘o e mōkisí ‘a e kautaha noó
- Līpooti ‘a e tokotaha/kautaha langá - fakafuofua ki he $400
- Totongi ki he tohi kole ki ha nō
- Pepa Fakamatala ki he Kelekelé (LIM - Land Information Memorandum) mei ho‘o ‘ōfisi kōsilio fakakolo
‘Oku toe ‘i ai foki ha ngaahi fakamole hokohoko ‘i he ma‘u ‘apí ke fakakaukau ki ai kau ai ‘a e:
- Ngaahi tukuhau ki he ma‘u ‘apí (rates) - ‘ikai toe si‘isi‘i hifo ‘i he $1,000 ki he ta‘u
- Totongi malu‘i ki he falé mo e ngaahi nāunau ‘i he falé - ‘ikai toe si‘isi‘i hifo ‘i he $700 fakakātoa ki he ta‘u
- Tauhi ‘o e ‘apí - ‘oku kau ki heni ‘a e me‘a fakapalamá, valí, mo e ngaahi alā me‘a pehē.
‘E fiema‘u ke totongi ki he tu‘unga fakamuimui tahá ho‘o ‘akauni totongi nofo mo e Kāinga Ora ‘i he taimi ‘e fakatau ai ho ‘apí. ‘Oku kau ki heni hono totongi ‘osi ha fa‘ahinga mo‘ua ‘oku felāve‘i ki ha ngaahi maumau mo e totongi nofo ‘oku tokoni mai ki ai ‘a e pule‘angá.
Kuo fakafo‘ou ‘a e peesí: 14 Tīsema 2023