Ko ‘emau founga ngāue ki hono fakahū mai ‘a e kau ngāue fo‘oú

Ko e Tohi Kole mai ki he‘emau ngaahi Lakangá

‘Oku mau tu‘uaki kotoa ‘emau ngaahi lakangá fakafou ‘i he ‘emau uepisaití: careers.kaingaora.govt.nz(external link)

Ke tohi kole mai ki aí, ‘oku fiema‘u pē ke ke fakakakato ‘a e foomu tohi kole ‘i he ‘initanetí(external link) pea te ke ma‘u atu ha ‘īmeili ‘o fakapapau‘i hono ma‘u maí.

Kapau ‘oku ‘ikai ke ke lava ‘o ma‘u ‘a e lakanga totonu ke tohi kole ki aí, te ke lava ‘o lēsisita(external link) ho‘o ngaahi fakaikiikí pea te ke ma‘u atu ha fanongonongo ki ha ngaahi lakanga fe‘unga mo ho‘o fiema‘ú ‘i he taimi ‘oku tu‘uaki aí, pe ko e fetu‘utaki ki he ‘emau Timi Fakahū Kau Ngāué ‘i he kaingaora.recruit@kaingaora.govt.nz ke talanoa lahi ange ki he ngaahi fili mo e ngaahi faingamālie ma‘aú.

Ko ‘emau Founga Ngāue ki hono Fakahū Mai ‘a e Kau Ngāue Fo‘oú

‘I he Kāinga Ora ‘oku mau fiema‘u ‘emau founga ngāue ki hono fakahū mai ‘a e kau ngāué ke hoko ko ha faingamālie ia kiate kimautolu ke ‘ilo lahi ange ai kiate koe mo ho‘o ngaahi taukeí, pea kiate koe ke ke ‘ilo lahi ange fekau‘aki mo kimautolu mo e me‘a ‘oku mau fakahokó.

Ke fakahoko ‘ení, ‘oku mau loto ke ke ma‘u ha a‘usia lelei mo ta‘euesia ‘i he founga ‘oku mau fakahū mai ai ‘a e kau ngāué. Ko e fakamatala ko eni ‘i laló ‘okú ne ‘oatu ha fakakaukau lahi ange ki he me‘a ke ‘amanekina ‘i he taimi ‘oku mau fakahū mai ai ha kau ngāue ki he Kāinga Ora:

Filí - Makatu‘unga ‘i he lakangá, ‘oku ‘i ai ‘a e ngaahi founga kehekehe te mau fetu‘utaki ai mo koe lolotonga ‘a e ngāue ki hono fili ha tokotahá. ‘E lava ke fakafou ia ‘i he telefoní, ‘initaviu ‘i he fetu‘utaki vitioó, senitā ki he vakai‘í, Skype, ngaahi tesi ki he tu‘unga faka‘atamaí, ko ha fakataha ‘o inu kofi pe ko ha ‘initaviu faka‘ofisiale.

‘I he taimi ‘e tāpuni ai ‘a e tohi kole ki he lakangá te ke ma‘u atu ha ‘īmeili pe fetu‘utaki telefoni meí he Timi Fakahū Kau Ngāué ke talaatu pe te ke hoko atu ki ha ‘initaviu, pe ‘oku ‘ikai ke ola lelei ho‘o tohi kolé.

‘Initaviú - ‘E fetu‘utaki atu leva ‘emau Timi Fakahū Kau Ngāué fakafou ‘i he telefoni, ‘īmeili pe SMS ke fokotu‘utu‘u ha ‘initaviu, pea te ke toe ma‘u atu foki ha ‘īmeili ke fakapapau‘i eni pea ke fakahoko ha ngaahi fokotu‘utu‘u pea ke tokoni atu foki ki ho‘o ngaahi palaní. ‘E fakapapau‘i heni ‘a e taimi, ‘aho, feitu‘u mo e ngaahi fakaikiiki ‘o e kau mēmipa ‘i he pēnolo ‘o e kau fai ‘initaviú.

‘Oku mau fokotu‘u atu, ‘i he teuteu atu ko ia ki ho‘o ‘initaviú, ke ke sio ki he ‘emau uepisaití, toe vakai‘i ‘a e ngaahi taukei ‘i he Position Description (Fakamatala ki he Lakangá) ki he lakanga ‘okú ke ‘initaviu ki aí, pea hoko ‘o feangai mo e founga ‘initaviu S.T.A.R - ko ha founga ‘oku ngāue‘aki ‘e he ‘emau Kau Taki ke tauhi ‘a e ngaahi fakafehu‘í ke hokohoko lelei.

Ko e teuteu ki ha ‘Initaviú

‘E kau ki he pēnolo ‘o e kau ‘initaviú ‘a e kakai ‘oku a‘u ki he toko tolú, pea ‘e fakahoko ia ‘i ha houa nai ‘e taha, kau ai ‘a e taimi ‘oku vahe‘i atu ke ke ‘eke ai ha ngaahi fehu‘í.

‘Oku mau ngāue‘aki ‘a e ngaahi ‘initaviu ‘oku makatu‘unga ‘i he ngaahi taukeí ki he ngaahi fehu‘i ki he tō‘ongá. ‘Oku tokoni ‘a e ngaahi fehu‘i ko ‘ení ke mau vakai‘i pe ‘oku lelei fēfē ho‘o fakahāhā ‘a e ngaahi malava mo e pōto‘i ‘oku fiema‘u ki he lakangá.

Ko e ngaahi fehu‘i ki he tō‘ongá ‘oku ‘i he founga ia ‘o e "Fakamatala mai fekau‘aki mo ha taimi..." pe "‘Omai ha fakatātā ‘o ha taimi na‘e..." pea fiema‘u atu ke ke talanoa fekau‘aki mo e ngaahi fakatātā pau mei ho‘o taukei ngāué. ‘Oku totonu ke ke fakakaukau ki ha ngaahi fakatātā ‘oku felāve‘i mo e lakangá ‘i ha fa‘ahinga feitu‘u pē ‘e malava ai.

Ko ha founga lelei ke tali ‘aki ‘a e fa‘ahinga fehu‘i ko ‘ení ko hono ngāue‘aki ‘a e founga S.T.A.R:

• Lave nounou ki he Tūkungá (Situation) pe Ngāue na‘e Fakahokó;
• Fakamatala‘i ‘a e Ngāue (Action) na‘á ke fakahokó mo e ‘uhinga ki aí;
• Fakamatala‘i ‘a e Olá (Result) pe ko e hā ‘a e me‘a na‘e hokó. ‘E lava ke kau ki heni ‘a e me‘a na‘á ke akó, mo ha fa‘ahinga me‘a te ke fakahoko ‘o kehe mei ai ‘i he vakai atu ki aí.

Kapau ‘oku fakahoko ho‘o initaviú ‘i ha founga ‘initaviu ‘i he fetu‘utaki vitioó muimui ‘i he fehokotaki‘anga ko ‘ení ki he ‘emau fakahinohino ki ha ‘initaviu ‘i he fetu‘utaki vitioó.

Me‘a ke ‘amanekina hili ‘a e ‘initaviú

Kapau te ke ma‘u ‘a e lakangá, te mau fetu‘utaki atu kiate koe ke fakahoko atu ‘a e ngaahi sitepu hokó. Kapau ‘e ‘ikai ke ke ma‘u ‘a e lakangá, te mau fetu‘utaki atu kiate koe ‘i he telefoní pe ‘īmeilí ke ‘oatu ha fakamatala ke tokoni.

Ngaahi Sivi Lahi Angé

‘I he ngaahi lakanga ‘e ni‘ihi, te mau ala fiema‘u ke ke toe ha‘u ki ha ‘initaviu hono ua, pe ke fakakakato ha ngaahi sivi fakatekinikale pe ngaahi sivi faka‘atamai. ‘Oku mau ngāue‘aki ha kautaha mei tu‘a ki he ngaahi sivi ki he tu‘unga faka‘atamai mo e malavá, pea te mau kole atu ho‘o fakangofuá ki mu‘a ke ‘oatu ho‘o fakaikiiki ki he fetu‘utakí kiate kinautolú.

Vakai‘i ‘o e Ngaahi Fakamo‘oni Fakangāué

Te mau kole atu ho‘o fakangofuá ke mau fetu‘utaki ai ki ho‘o kau fakamo‘oni fakangāué (‘ikai toe si‘isi‘i hifo ‘i he toko uá). Ko e angamahení, ko e taha ‘o e kau fakamo‘oni fakangāue ko ‘ení ko ho‘o pule ngāue lolotongá pe fakamuimui tahá.

Ngaahi Sitepu Hokó

‘I hono fakakakato kotoa ‘a e ngaahi siví, te mau fetu‘utaki atu kiate koe ke talanoa ki he ngaahi sitepu hokó.