Ko ‘emau ngaahi kupu fekau‘aki ‘oku taki ‘e he kau ngāué
‘I he Kāinga Ora ‘oku mau tukupā ki hono fakatupulekina ‘a e ngaahi puipuitu‘a kehekehe ‘i he kautahá fakalūkufua mo hono faka‘atā ha ‘ātakai ‘oku fekau‘aki (inclusion) ‘i he me‘a kotoa ‘oku mau fakahokó.
Ko e Kāinga Ora ko ha kautaha ia ‘oku feinga ke hoko ko ha feitu‘u lelei ke ngāue ai, ko ha sēvesi fakahoko fatongia ‘oku mohu founga mo fa‘a tokoni, mo ha hoa ngāue anga-faka‘apa‘apa mo mahu‘inga ki he ‘emau ngaahi kautaha fakahoko ngāué (suppliers) mo e komiunitī ‘oku mau ngāue fakataha mo ia mo ngāue ki aí. ‘Oku mau fakatokanga‘i ‘e fakatefito ‘a hono a‘usia ‘a e ngaahi taumu‘a ngāue ko ení ‘i he malava ko ia ‘a e kautahá mo e fa‘ahinga kotoa ‘oku ngāue hení ke tali mo pule‘i ‘a e ngaahi fakafeangai ki he kehekehe ‘i he puipuitu‘á mo e kau maí.
‘I he tu‘unga ko ha Kāinga Ora puipuitu‘a kehekehe mo fekau‘aki, ‘oku mau fiema‘u ki he ‘emau kakaí ke nau:
- A‘usia ha ngaahi faingamālie ngāue ‘oku taau mo totonu mo ha feitu‘u ngāue ‘oku ‘ikai ke filifilimānako.
- Ongo‘i malu, malu‘i mo fakamahu‘inga‘i ‘i he ngāué.
- Malava pea fakahoko hono ‘omai honau kotoá ki he ngāué.
- Fehokotaki, mahino‘i pea ho‘ata atu ‘a e komiunitī ‘oku mau ngāue ki aí.
‘Oku ‘i ai ‘emau ngaahi kupu fekau‘aki ‘oku taki ‘e he kau ngāué ‘oku hoko ko ha feitu‘u malu ki he fetalanoa‘aki, vahevahe mo e ako ma‘á e tokotaha kotoa.
Ko e taumu‘a fakalūkufua ‘a e Rainbow Network ko hono fakalahi ‘a e ‘ilo ki homau Komiunitī Fakafāfiné mo e Fakatangatá ‘o tatau pē ‘i he fakalotofalé pea ‘i tu‘a mei ai. ‘I ho‘o fakakaukau ki hení, na‘a mau fakamo‘oni ai ‘i he Pride Pledge, ko ha tukupā ‘oku makatu‘unga ‘i he ngaahi tu‘unga fakae‘ulungaanga ‘oku mau fakahoko ke fakahāhā ‘emau ngāue lī‘oa ma‘á e tu‘unga malu, ‘iloa mo e kau atu ‘a e kotoa ‘o e kau mēmipa rainbow (fakafāfine mo e fakatangatá) ‘o ‘emau komiunitií mo e kau ngāué.
‘Oku mau lolotonga ‘i he ta‘u hono ua ‘o e tu‘unga mēmipa Pride Pledge Gold pea kuo mau fakalakalaka lelei ‘i hono taki‘i hono fakalahi ‘o e ‘iló mo ako‘i ‘emau kau ngāue ‘i he ‘emau Komiunitī Rainbow longomo‘uí, kau ai ‘a e hoko ko e taha ‘o e kau fainolo ‘i he polokalama foaki pale 2023 Rainbow Excellence Awards. ‘I he tu‘unga fakakautahá, ko e taimi ‘oku ongo‘i ai ‘e he kau ngāué ‘oku talitali lelei kinautolu mo malava ke ‘omai ‘enau ngaahi tu‘unga mo‘ui mo‘oní ki he ngāué, ‘oku mau sio ai ki ha fakalakalaka lahi ‘i he kau maí, tu‘unga lelei ‘o e mo‘uí mo e ola lelei ‘a e ngāué, pehē foki ki he tohoaki‘i mo e tauhi ma‘u ‘a e kau ngāué.
Kau ‘i he Fainolo ‘i he NZ Rainbow Excellence Awards 2023 - ‘Aokosi 2023
‘Oku hanga ‘e he ‘emau Kupu Fekau‘aki ki he Ngaahi Fa‘ahinga Kehekehe ‘o e Tu‘unga Faka‘atamaí ‘o poupou‘i, fakahaa‘i, mo fehokotaki ‘a ‘emau ngaahi mēmipa mo e kupu tokoni ‘i he Kāinga Ora. ‘Oku mau ngāue ke pouaki ‘a e ‘ilo ki he faingata‘a‘ia fakaesino ‘oku ‘ikai hā maí mo e mahino fekau‘aki mo e ngaahi fiema‘u fakataautahá. Ko ‘emau taumu‘á ke to‘o ‘a e ngaahi ‘ā vahevahe ki he hoko ko ia ‘o kau kakato ‘i he ngāué, ma‘á e tokotaha kotoa.
Meí he ‘emau ngaahi a‘usia mo‘oni ‘i he mo‘uí, ‘oku mau:
- ‘oatu ‘a e fale‘i fekau‘aki mo e ngāue mo e lao ki he malava ke kaú (ko e fakatātaá, totongi ha ngāué, fakalele ‘a e ngaahi polokalama mo ha ngaahi fakataha)
- ‘oatu ‘a e ngaahi fakahā fakamatala fekau‘aki mo e ngaahi tu‘unga faka‘atamaí
- kaungā-fa‘u ‘a e ngaahi kupu fakamatala ma‘á e ‘initaneti fakangāué
O lupe sa vao ese‘ese, ae ua fuifui faatasi
‘Oku tau kau mai meí he ngaahi tafa‘aki kehekehe ‘o e vaotaá kae fehokotaki ‘i he taumu‘a pē ‘e taha.
‘Oku fakahoko ‘e he kakai Pasifikí ha tokoni mahu‘inga ki he Kāinga Ora ‘o fakafou ‘i he ‘enau kau maí mo ‘enau ngaahi ngafa ‘i he ngaahi tafa‘aki kehekehe ‘o e kautahá ni. Ko e kupu fekau‘aki ‘e tolu takatakai ‘i he fonuá ‘i he lolotongá ni ‘oku nau ngāue lī‘oa ke fehokotaki mo e kakai Pasifiki ‘i he Kāinga Ora. Ko e kupu fekau‘aki taki taha ‘oku poupou‘i ia ‘e ha kulupu ngāue kuo fokotu‘u ‘a ia ‘oku senitā ‘i Tāmaki Makaurau, Waikato mo Te Whanganui-a-Tara.
Fakatefito ‘i he ngaahi tu‘unga fakae‘ulungaanga ‘a e Pasifikí, ko e taumu‘a ‘a e ngaahi kupu fekau‘akí ko hono ‘oatu ha ngaahi faingamālie tokoni ki he ‘enau kau mēmipá ke nau hoko ko e kau ngāue fakapule‘anga malu, ‘ilo‘ilo mo fehokotaki fakafonua ‘o e Pasifikí, ‘o fakamafeia ‘a e fakafōtunga atu ‘o honau fa‘unga Pasifikí ‘i he Kāinga Ora. ‘I he‘enau kau fakatahá ‘oku tukupā ai ‘a e ngaahi kupu fekau‘akí ki hono lālanga ha ngaahi fakava‘e ki he to‘utangata hoko ‘o e kakai Pasifikí ke nau hokohoko atu ‘a e ngāue ma‘a ‘emau kau kasitomaá mo e ngaahi komiunitií.
Whakatauki: Mā mua ka kite a muri, Mā muri ka ora a mua.
Ko e fa‘ahinga ‘oku takí ‘oku nau ‘oatu ha fakakaukau mo e mahino ki he fa‘ahinga ‘oku muimuí, ko e fa‘ahinga ‘oku muimuí ‘oku nau fakaivia ‘a e fa‘ahinga ‘oku takí.
‘Oku ‘oatu ‘e he kupu fekau‘aki fakafonua ko e Ngā Mata Māori ha ngaahi faingamālie tokoni ki hono kau mēmipá ke nau hoko ‘o malu, ‘ilo‘ilo mo fehokotaki fakafonua ‘i he tu‘unga ko e kau ngāue fakapule‘anga Māori, ‘o fakamafeia ‘a e fakafōtunga atu ‘o honau Māori ‘i he Kāinga Ora.
Ko ‘emau kupu fekau‘akí ‘oku poupou‘i lelei ia ‘e ha rōpū (kulupu) ‘e 7 ‘a ia ‘oku fakahangataha ki hono tokoni‘i ‘a e kau mēmipá ke nau fehokotaki ‘i ha tu‘unga fakalotofale. ‘Oku fakafiefia‘i ‘e he Ngā Mata ‘a e tu‘unga kehekehe ‘o e puipuitu‘á fakafonua mo e ngaahi fakataha‘anga fakalotofalé fakatou‘osi, ‘o fakafehokotaki ma‘u pē ai mo ‘emau kau mēmipá ‘i ha fakataha ‘i he ‘initanetí tu‘o taha ‘i he māhina. ‘Oku ‘oatu ‘e he hui (fakataha‘angá) ha ngaahi faingamālie lahi ange ki he ‘emau kau mēmipá ke nau whanaungatanga (fevahevahe‘aki), maramatanga (feongo‘aki), tautoko (fepoupouaki) mo manaaki (fefakakoloa‘aki) ‘a e tokotaha kotoa; pouaki ‘a hono laukau‘aki ‘a e ngaahi fakakaukau mo e ngaahi ‘ekitivitī fakalotofale ‘a e kakai Māori; fakaafe‘i ‘a e kau lea/malanga makehe ‘a e kakai Māori; vahevahe tau‘atāina ‘a e ngaahi taumu‘a ‘a e Māori ‘i ha ‘ātakai malu; langa‘i mo fakafiefia‘i lelei ‘a e te reo Māori me ōna tikanga (lea mo e ngaahi anga fakafonua Māori), whakapapa (tefito‘i mo‘oni mahu‘inga ‘a e Māori), waiata (hiva Māori); pea fakaivia ‘a e lavame‘a ‘a e te ao Māori (ngaahi angamfakafonua Māori) ‘i he Kāinga Ora.
‘Oku taumu‘a ‘a e Kupu Fekau‘aki ‘a e Kakai Fefiné ‘i he Kāinga Ora ke fakafofonga‘i ‘a e fa‘ahinga kehekehe ‘o e kakai fefiné ‘i he Kāinga Ora, tu‘uaki ‘a e vahevahe tatau ‘i he tu‘unga tangatá mo e fefiné pea mo fakafiefia‘i ‘a ‘etau ngaahi talēnití.
‘Oku tokangataha ‘a e kupu fekau‘aki ko ení ki hono pouaki ‘a e ngaahi polokalama fakafehokotaki fakalotofale mo e ki tu‘á mo e ngaahi faingamālie ki he fakalakalaka fakapalofesinalé. Fakafou ‘i he ngaahi polokalama ko ení, ‘oku mau taumu‘a ai ke fakatupu ha ongo‘i ‘o e fehokotaki mo e uouongataha ‘i he kau mēmipá. ‘Oku mau toe taumu‘a foki ke fakatupulekina ha ‘ātakai ‘a ia ‘oku malava ai ‘a e kakai fefine ‘i he Kāinga Ora ‘o fepoupouaki mo fetokoni‘aki, vahevahe ‘enau ngaahi ‘ilo mo e a‘usia fakapalofesinalé, mo ongo‘i ‘oku fakaivia kinautolu.
‘I he Kupu Fekau‘aki Pan Asian, ‘oku mau tukupā ki hono talitali lelei ‘a e tu‘unga kehekehe ‘o e ngaahi ‘ulungaanga fakafonua ‘a e Pan Asian. Ko ‘emau misioná ke ‘oatu ha peletifoomu/faingamālie ki he kau ngāue ‘a e Pan Asian ke nau fehokotaki, vahevahe ‘enau ngaahi a‘usiá, mo pouaki ‘a hono ‘ilo‘i mo ngāue‘aki ‘a e ngaahi ‘ulungaanga fakafonuá. Ko ‘emau taumu‘á ke fakafehokotaki, fengāue‘aki mo feako‘aki ke pouaki, fakafiefia‘i mo ma‘u ha ngaahi le‘o tokolahi te ne lava ‘o tākiekina ha liliu ‘i loto ‘i he kautahá pea ‘i hono fakahoko iá, ‘oku mau tokoni ai ki he tukupā fakalūkufua ‘a e kautahá ki he tu‘unga kehekehe ‘a e ngaahi puipuitu‘á mo e kau maí.
Kia whānau tupu ngātahi - ‘oku mau ngāue mo ako fakataha ke fehokotaki, pouaki, mo fakafiefia‘i ‘emau ngaahi kehekehe ‘i he ‘ulungaanga fakafonuá.
Ko e Sea lolotonga ‘o e kupu fekau‘aki faka-Pule‘anga ko ení ko ha tokotaha ngāue ia ‘a e Kāinga Ora. ‘Oku ‘atā atu ke hoko ko ha mēmip ‘a e kau ngāue kotoa ‘oku ‘i ai ‘enau kaunga fakahangatonu ki he komiunitī ‘a e kau faingata‘a‘ia fakaesinó pe ko ha taha ‘oku loto nai ke kau mai ko ha tokotaha poupou/tokoni.
Kuo fakafo‘ou ‘a e peesí: 13 Sepitema 2023