Ko hono fakahoko ‘o ho‘o totongi nofó

Totongi ‘o e nofó

‘Oku mau fiema‘u ‘a e kau nofo totongí kotoa pē ‘a e Kainga Ora ke totongi taimi totonu mo kakato ‘enau totongi nofó.

Kuo mau fakahoko ha ngaahi liliu ki he founga ‘oku mau tokangaekina ‘aki e mo‘ua meí he nofo totongí ke tokoni ki hono ta‘ota‘ofi ‘a e kau nofo totongí meí ha fu‘u tōmui ‘enau totongi nofó.

‘Oku vave ange ‘emau ngāue atú he taimi ‘oku ‘ikai ke fakahoko mai ai ha totongi nofo pea te mau tokoni‘i ‘a e kau nofo totongí ke vave hono totongi fakafoki mai honau mo‘ua ‘i he nofo totongí.

‘Oku mau toe fakahoko foki ha founga fefeka ange ‘i he taimi ‘oku ‘ikai fakahoko mai ai ha totongi nofo ‘e he kau nofo totongí, tukunoa‘i honau mo‘ua ‘i he nofo totongí, pe ‘ikai ke fie ngāue fakataha mo kimautolú.

‘Oku mahu‘inga ke ‘ilo‘i kapau ‘e hoko ‘a e me‘a ko iá, te mau fakahoko leva ha ngaahi sitepu ke fakangata ‘a e nofo totongí pea ‘e fakahoko ‘o vave ‘eni ia ‘i he vaha‘a taimi ‘o e kuohilí.

Lau ‘emau founga ngāue ki he mo‘ua ‘i he nofo totongí.

Ko hono tauhi ma‘u ‘o ho‘o totongi nofó (rent) [PDF, 48 KB]

Kapau ‘okú ke faingata‘a‘ia ‘i hono totongi ho‘o nofó

‘Oku mau ‘ilo‘i ‘oku ‘ikai faingofua ma‘u pē ‘a e totongi nofó, tautautefito ki he taimi ‘oku hoko ai ha ngaahi me‘a ta‘e‘amanekina ‘i he mo‘uí.

Kapau ‘oku ke faingata‘a‘ia ‘i hono totongi ho‘o nofó, te mau fakahoko ‘a e ngaahi sitepu fakapotopoto kotoa pē ke fakapapau‘i ‘okú ke ma‘u atu ‘a e tokoni totonu ke fakafoki ho‘o totongi nofó ke taimi totonu. ‘E toe lava foki ke mau fakafehokotaki koe ki ha tokoni mataotao kapau ‘e fiema‘u – pea kapau ‘oku ke loto foki ki ai.

Kapau ‘okú ke faingata‘a‘ia ‘i hono totongi ho‘o nofó, ‘oku mahu‘inga ke ke fetu‘utaki ki ho‘o Housing Support Manager ‘i he fika 0800 801 601 ‘i he vave taha ‘e ala lavá ke ta‘ofi ‘a ho‘o nofo totongí mei ha‘ane a‘u ki ha tu‘unga fakatu‘utāmaki.