Infrastructure Acceleration Fund
Faataoto se faavae mo afioaga ma tuaoi faalotoifale fou i Aotearoa Niu Sila atoa.
Na faalauiloa e le Malo le Infrastructure Acceleration Fund (IAF) ia Iuni 2021. O se fesoasoani tupe e tusa lea ma le $1 piliona e lagolagoina atinae tetele e fou po o galuega faafou tetele – e pei o auala, suavai tafatolu ma le puleaina o lologa – ina ia faagaioia ai le fau o fale fou i nofoaga o sili ona moomia tele ai.
E faafoe e Kāinga Ora le IAF, ma ua fuafuaina mo le faateleina o fale e maua e auala atu i le faatupeina o atinae tetele sili ona moomia mo atinae.
Ua tapunia nei talosaga mo le IAF.
Vaevaega o le fesoasoani tupe IAF
E tau mai i le taimi nei, e $921 miliona le fesoasoani tupe IAF ua faamatuu atu mo atinae tetele sili ona moomia i aai ma taulaga i le atunuu atoa, mai le Far North e tau i Otago. O se taumafaiga fai faatasi, ma e iai le faamoemoe o atinae o faatupeina e le IAF o le a faagaioia ai le maua o fale fou e 30,000 i le 35,000 mo Tagatanuu Niu Sila mo le isi 10 i le 15 tausaga.
Kaikohe
- Fesoasoani tupe IAF na taliaina: $23 miliona
- Faamoemoe e fau fale fou e: 365
O le a faagaioia vave le atinaega o fale i Kaikohe e le fesoasoani tupe e $23 miliona o le IAF, ma e faaaoga mo le puleaina o lologa ma faafou faiga o tali ai suavai leaga ma apoa le vaitimu ina ia gafatia tulaga o iai nei ma gafatia foi le faatuputupulaia o le faitau aofai o tagata i le lumanai.
E iai le faamoemoe maualuga i le Far North District Council o le fesoasoani tupe IAF mo atinae tetele o le a maua ai fale fou e 365, auā le faatupu o avanoa mo mana whenua ma tagata lautele e umia fale. E i ai le faamoemoe o le avanoa lea e maua ai fale mo tagata lautele ma fale e umia e aiga.
Kawakawa
- Fesoasoani tupe IAF na taliaina: $25.6 miliona
- Faamoemoe e fau fale fou e: 310
O le a faamatuu atu i galuega o fuafuaina e faalautelē ai le auala ma faia faafouga tetele o atinae tau suavai i le taulaga Kawakawa i le Far North le $25.6 miliona mai le IAF, ina ia faagaioia le fia selau o fale fou mo lea afioaga ma o se tali atu lea i le tau leai o ni fale.
E iai le faamoemoe maualuga i le Far North District Council o poloketi atinae tetele o faatupeina e le IAF o le a faagaioia ai fale fou e 300, e aofia ai fale e 180 i totonu o le atinae Te Mataora o faatino e le Ngā Kāingamaha o Ngāti Hine Charitable Trust. O se tasi o fuafuaga a le Tausi Mavaega le saunia o apitaga i nofoaga tetele mo tagata matutua ma fale e sili atu ona gafatia na totogi, ina ia atiae ma faatumauina le nonofo faatasi o tagata matutua ma a latou fanau.
Whangārei
- Fesoasoani tupe IAF na taliaina: $10.3 miliona
- Faamoemoe e fau fale fou e: 3,000
O le a lagolagoina galuega autu e faafou ai felauaiga i Whangārei e le $10.3 miliona mai le IAF. O poloketi ua mafai na maua le fesoasoani tupe e aofia ai se auala laupapa fou i Kamo i fafo mai o le taulaga, ina ia tele ma sao feoaiga ma atiae ai avanoa e maua ai fale. O le auala laupapa fou o le a suia ai le auala laupapa na o le tasi le laina e feoai ai, ma o se tasi lea o mafuaaga o le tuutaia o fuafuaga mo atinae e tau mai i le taimi nei. O le a faaaoga foi le fesoasoani tupe IAF mo se auala taamilo fou i le State Highway One ma o le auala autu lea e fesootai ai le itumalo ma le aai ma faaaoga faatasi i soo se auala tau feoaiga, ma e fesootai ai atinae o fuafuaina i Springs Flat i auaunaga, aoaoga ma galuega.
E iai le faamoemoe o atinae tetele o faatupeina e le IAF o le a lagolagoina ai le fau o fale e 1,000 mo le isi 10 i le 15 tausaga a sau, ma faaopoopo le isi 2,000 fale mo se vaitaimi umi.
Auckland (Mt Albert)
- Fesoasoani tupe IAF na taliaina: $113.2 miliona
- Faamoemoe e fau fale fou e: 4,000
O le a faafaigaluegaina le IAF e $113.2 miliona e faatupe ai atinae tetele e fesootai i galuega e toe faafou ai le Carrington Road ina ia faafaigofie atinae tetele o faia i Pt Chevalier/Mt Albert, Auckland o faatino e le Tāmaki Makaurau Rōpū.
E iai le faamoemoe mai lea atinae tele o le a lagolagoina ai le faataunuu o fale fou e 4,000 i fanua e itiiti teisi ma le 40 heta.
O le a faaaoga le fesoasoani tupe IAF e faalautele ai le Carrington Road ma isi mea e fesootai i ai e moomia ona toe faafou, e aofia ai se laina auala e faapitoa mo pasi, faaleleia magāala, ma auala mo tagata savali i luga o auala, ma o auala uma nei o le a aofia i le Carrington Road lea o le a faalautelē ma faamauina i le Unitary Plan. O felauaiga ua faatupeina e le IAF o le a mafai ai ona faagaioia atinae ma faaaoga fanua e lei faaaogaina muamua i Mt Albert ma pitonuu tu lata i ai i fafo atu ma le taulaga.
Auckland (Ōrākei)
- Fesoasoani tupe IAF na taliaina: $7.3 miliona
- Faamoemoe e fau fale fou e: 469
O le a faafaigaluegaina le $7.3 miliona mai le IAF e faagaioia le fau o fale e tu lata i Ōrākei Marae i Aukilani, ma e faatino e Ngāti Whātua Ōrākei. O le a faaaoga le fesoasoani tupe IAF e toe faafou ai le magāala i le va o Kupe Street ma Kepa Road ina sao lelei feoaiga agai atu i fale i Ōrākei, a o tau atiae avanoa e faaopoopo ai fale ma toe faaaoga ai fanua e lei faaaogaina muamua i Ōrākei.
E iai le faamoemoe o le a faagaioia vave e le fesoasoani tupe le faataunuu o atinae tetele o moomia ina ia atiae ai fale e 460 i tausaga o i luma, ma lagolagoina faanaunautaiga o Ngāti Whātua Ōrākei e fau le tele o fale mo aiga e le mamao ai le savali i le marae, ma le malosi o le felagolagomai o tagata.
Hamilton
- Fesoasoani tupe IAF na taliaina: $150.6 miliona
- Faamoemoe e fau fale fou e: 4,140
O le a faamatuu le fesoasoani tupe IAF e $150.6 miliona e lagolagoina ai galuega e toe faaaoga ai fanua e lei faaaogaina muamua i totonu o le aai o Hamilton. O le a faaaoga le fesoasoani tupe mo atinae tetele sili ona moomia e faagaioia gofie ai isi atinae i totonu o le afioaga – e aofia ai se faatanoa vai fou ma se pamu vai, faafou ma faaleleia atili suavai o le lotoifale, ma auala mo tagata savali ma auala uila vili vae e taamilo i le Waikato River, ina ia fesootai lelei ai nofoaga i sasae o fafo atu o le taulaga i le aai.
E iai le faamoemoe o le a faagaioia e le fesoasoani tupe fale fou e 4,000, e tu lata i galuega, aoaoga ma auala tau feoaiga ina ia ‘20 minute’ le umi o feoaiga i totonu o le aai o lo o nonofo, faigaluega ma tafafao ai tagata i le nofoaga lava e tasi, ma tuuitiitia ai le moomia ona femalagai solo.
Ngāruawāhia
- Fesoasoani tupe IAF na taliaina: $5.32 miliona
- Faamoemoe e fau fale fou e: 200
O laufanua e apoa le suavai i le Galbraith Street o le taulaga o Ngāruawāhia o Waikato o le a faamatuu i ai le $5.32 miliona mo atinae tetele mo le suavai tafatolu ma felauaiga. E iai le manatu maualuga i le Waikato District Council o atinae nei o le faagaioia ai fale fou e 200 e gafatia na totogi ma fale mo fefaatauaiga faamaketi e tau lata i ai pe a savavali i le taulaga ma aoga, ma faapena ona lagolagoina le tau atiae ai o fale fou i fanua o tau lata ane.
Tauranga (Tauriko West)
- Fesoasoani tupe IAF na taliaina: $80 miliona
- Faamoemoe e fau fale fou e: 2,000
Ua maitauina le faatuputupulaia o le itumalo Bay of Plenty, ma ua faamatuu i ai le $80 miliona mai le IAF mo galuega tetele e faaleleia ai felauaiga ma le suavai ma ua talafeagai ai le faatele o fale e fau i fanua o Tauranga e lei faaaogaina muamua i Tauriko West. O le faamoemoe maualuga i le Tauranga City Council le faagaioia o le fesoasoani tupe le 2,000 o fale fou, e aofia ai ma fale mo tagata lautele, fale e gafatia na totogi ma fale mo fefaatauaiga faamaketi.
O galuega ua faatupeina e faaleleia ai felauaiga mai le IAF o le a sili ai ona lelei feoaiga agai atu i le taulaga ma tau lata i le Tauriko Business Estate, a o tau atiae auala e fesootai lelei ai feoaiga auā le faatuputupulaia o tagata o soifua ma ola i le Western Corridor.
Tauranga (Te Papa Peninsula)
- Fesoasoani tupe IAF na taliaina: $67.9 miliona
- Faamoemoe e fau fale fou e: 1,600
O se faamanuiaga mo Tauranga Te Papa Peninsula le fesoasoani tupe $67.9 miliona mai le IAF, ua taatia ese mo galuega tetele e faaleleia ai atinae tetele ma o le a faagaioia ai le faaaogaina o fanua e lei faaaogaina muamua ma le saunia o fale.
O le a faaaoga le fesoasoani tupe IAF i le Vaega Lua o galuega o faaleleia ai le Cameron Road – e tau tonu ai lava i le Te Papa Peninsula ma fesootai ai feoaiga i fafo atu o le taulaga. O galuega ua fuafuaina e aofia ai se auala savali e soo atoa ai le taulaga, auala uila vili vae ma auala e faapitoa mo feoaiga lautele.
E iai le faamoemoe i le Tauranga City Council o atinae tetele o faatupeina e le IAF e aofia ai ma galuega e toe faaleleia ai felauaiga ma le faasoasoaina o le suavai, e maua ai fale fou e 1,600 i totonu o afioaga ma nofoaga e fesootai lelei ma mautu.
Rotorua
- Fesoasoani tupe IAF na taliaina: $84.6 miliona
- Faamoemoe e fau fale fou e: 3,080
Pe ā ma le $85 miliona ua taatia ese mo galuega e patino i vaitimu i Pitonuu Tutotonu ma Sisifo o Rotorua, e aofia ai fanua faasao ma fanua mo tafaoga e tau atu i le vaitafe o Utuhina ma Mangakakahi. O se atinae o lo o faamoemoe ai le Rotorua Lakes Council i le fesoasoani a fai atinae faufale o galulue faapaaga ma le pulega, ma o le a faagaioia ai le 3,000 fale e nofoia e tagata.
Ōmokoroa
- Fesoasoani tupe IAF na taliaina: $38.4 miliona
- Faamoemoe e fau fale fou e: 2,580
O le a faaaoga atinae faafaigaluegaina e $38.4 miliona e faatupe ai se magāala i le va o le State Highway 2 ma Ōmokoroa Road, ma saogalemu ai feoaiga e sopoia ai le Ōmokoroa penisula ma aogā mo le isi 15 tausaga o faamoemoe o le a faatuputeleina ai le toatele o tagata ma atinae i le taulaga.
E iai le faamoemoe o le a faagaioia mai galuega faaleleia le 2,500 fale, ma o le a maua ai ituaiga fausaga eseese mai fale tutasi, fale e gafatia na totogi ma fale lautele feololo e nofoia e tagata.
Gisborne
- Fesoasoani tupe IAF na taliaina: $4.3 miliona
- Faamoemoe e fau fale fou e: 458
O laufanua i Taruheru o apoa le suavai i Gisborne o le a faamatuu i ai le faafaigaluegaina o le $4.3 miliona o le IAF i poloketi tau suavai tetele ma faaleleia ai auala. E iai le faamoemoe i le Gisborne District Council o galuega nei o le a faagaioia ai fale mo tagata lautele, fale e gafatia na totogi ma fale mo fefaatauaiga faamaketi, faapena ma se faamoemoe e faamautu se vaipanoa e avea ma nofoaga tutotonu mo tulaga tau tausiga ma puipuiga faaletagata.
Hastings
- Fesoasoani tupe IAF na taliaina: $18.5 miliona
- Faamoemoe e fau fale fou e: 4,000
O le a faafaigaluegaina le $18.5 miliona e faaleleia ai auala i Hastings ma tuuitiitia ai le tele o le suavai leaga o faaalu i nofoaga e lafoai ai suavai leaga a le itumalo. Na tuufaatasia se talosaga a le Hastings District Council ma le Heretaunga Tamatea Settlement Trust. E iai le talitonuga i le Pulega o le a faagaioia e le fesoasoani tupe IAF fale fou e 4,000 i le tele o atinae, e aofia ai atinae mo fale a Māori i mau fanua a Māori ua faia ai atinae.
Waipukurau
- Fesoasoani tupe IAF na taliaina: $10.9 miliona
- Faamoemoe e fau fale fou e: 950
O le a faamatuu atu i le Central Hawke’s Bay District Council le $10.9 miliona, e faatupe ai atinae tetele taua o moomia e faaaoga ai fanua mo fale fou i totonu o le Waipukurau South Growth Precinct. E iai le talitonuga i le Pulega e faaaoga le fesoasoani tupe e faagaioia ai fale e 950 e fau i totonu o le Tuaoi – ma lagolagoina le faatupulaia o suiga lelei i totonu o le itumalo.
E aofia i galuega atinae tetele se vaega tele o felauaiga e toe faaleleia atili, ogapaipa fou tetele e faitau kilomita le mamao mo suavai leaga ma le suavai maua, o se faatanoa vai fou, galuega tetele e toe faafou ai mea o apoa vaitimu ina ia tino mai le aogā atoatoa o lea atinae.
Napier
- Fesoasoani tupe IAF na taliaina: $12.4 miliona
- Faamoemoe e fau fale fou e: 400
E faamatuu atu i Maraenui i Napier le $12.4 miliona mo le puleaina o lologa tetele, ma e iai le talitonuga i le Napier City Council o se suiga lea o le a gafatia ai isi fale fou faaopoopo e 400, e aofia ai ma fale mo tagata lautele ma fale e gafatia na totogi.
New Plymouth
- Fesoasoani tupe IAF na taliaina: $1.8 miliona
- Faamoemoe e fau fale fou e: 300
E ono fale tetele o le a atiae i Ferndale, New Plymouth, ma e faaaoga ai le $1.8 miliona e toe faafou ai faiga o fesootai ai le suavai ma felauaiga, ma e iai le manatu i le New Plymouth District Council o le avanoa lea o le a faagaioia ai le tele o fale fou e oo atu i le 300 mo se vaitaimi umi, ma maua ai auala eseese mo feoaiga.
Whanganui
- Fesoasoani tupe IAF na taliaina: $1.95 miliona
- Faamoemoe e fau fale fou e: 340
O fuafuaga e faalautele ai Carson Street i Whanganui i fafo atu o Castlecliff e faamatuu atu i ai le $1.95 miliona mo atinae tetele e fesootai i felauaiga ma suavai tafatolu. O galuega mo atinae tetele o le a mafai ai ona faaopoopo le umi o le auala e lagolagoina isi fale faaopoopo e 340 i totonu o le nofoaga, ma e iai foi fuafuaga mo le fau o fale e nonofo faatasi ai tagata matutua ma a latou fanau.
Pahiatua
- Fesoasoani tupe IAF na taliaina: $880,000
- Faamoemoe e fau fale fou e: 30
O fuafuaga e toe atiae ai le lotoā sa iai muamua se aoga i le taulaga Tararua o Pahiatua o le a faaaoga ai le $880,000 mai le IAF, ona o le moomia tele o fale.
O le a faaaoga le fesoasoani tupe IAF mo atinae tetele e fou mo le suavai leaga, vaitimu ma vaitafe, ma e iai le faamoemoe i le Tararua District Council o le avanoa lea e faagaioia ai fale fou e 30 i le nofoaga o tau atiae ma pulea e Rangitāne. E talisapaia e Rangitāne le galulue faapaaga ma le malo tutotonu ma le malo faalotoifale. O le a maua ai fale e gafatia na totogi ma fale e nofo mautotogi ai i fuafuaga ua faatalosagaina mai lea atinae.
Ōtaki
- Fesoasoani tupe IAF na taliaina: $29.3 miliona
- Faamoemoe e fau fale fou e: 1,040
O le taulaga Ōtaki i Kāpiti Coast ua faia ai se talosaga fai faatasi a tagata Māori e pule i fanua, Pulega Faalotoifale ma fai atinae faufale tumaoti e maua se vaega tupe e $29.32 miliona o le fesoasoani tupe IAF mo galuega toe faaleleia o atinae tetele o le suavai tafatolu ma auala. E iai le faamoemoe e faaaoga le fesoasoani tupe lea e faagaioia ai le 1,000 ma ona tupu o fale e gafatia na totogi ma fale e maua i fefaatauaiga faamaketi.
Lower Hutt
- Fesoasoani tupe IAF na taliaina: $98.9 miliona
- Faamoemoe e fau fale fou e: 3,520
O le a faamatuu atu i le poloketi Lower Hutt RiverLink and Valley Floor le $98.9 miliona e toe faaaoga ai fanua sa atiae muamua mo le toe faafou o alā paipa mo vaitimu, e aofia ai se ogapaipa fou mo le vaitimu e lua kilomita le lautele, nofoaga e pamu ai le suavai ma paipa e faaalu ai le suavai i le fogatai. E tusa ai ma manatu lautele na faaalia, ua talia ai e le Hutt City Council le aogā o atinae tetele i le tau atinaega ma le lavatia ona maua ai fale fou e 3,500.
Porirua
Na vaea ese le $6.1 miliona i le Porirua City Council mai le IAF mo galuega e faafou ai auala mo feoaiga ma le faaleleia o le suavai, mo le fia faaopoopo o fale o atiae e Ngāti Toa Rangatira i Kenepuru Landing.
Talu ai le faateteleina o suiga i le tamaoaiga, ua ese ai se manatu i paaga na noatia i le fesoasoani tupe e taofi poloketi na fuafuaina ma aveese mai se maliega na faia mo le IAF Funding Agreement. O lona uiga e leai se fesoasoani tupe IAF o le a tuuina atu i poloketi mo atinae tetele nei.
Upper Hutt
Na fuafuaina le $12.4 miliona mai le IAF mo galuega o faatino e le Upper Hutt City Council e faafou ai auala mo feoaiga e lagolagoina ai fuafuaga e tau atiae ai fale i se vaega o le Trentham Racecourse.
Mulimuli ane na faagasolo e le Pulega suesuega ma faataitaiga i feoaiga na tuuitiitia ai tupe faaalu ma le telē o atinae na fuafuaina i auala mo feoaiga. O lona uiga ua lē toe moomia le fesoasoani tupe IAF e faagaioia ai le isi laasaga mo atinae tetele ma fale e fesootai i ai.
Na autasi sui sa noatia i le fesoasoani tupe lea e aveese mai se maliega na faia mo le IAF Funding Agreement. O le a faatupeina tulaga fou ua suia ai le poloketi mo atinae tetele i saofaga mai atinae ma/po o maliega mo atinae i le va o le Pulega ma paaga tausi tau atinaega.
Motueka
- Fesoasoani tupe IAF na taliaina: $1.2 miliona
- Faamoemoe e fau fale fou e: 200
O le a saunia se alā paipa fou mo suavai leaga, faafou paipa mo vaitimu ma se auala faataamilo i Motueka e faaaoga ai le $1.2 miliona mai le IAF. E iai le faamoemoe o le a aogā le fesoasoani tupe e faagaioia vave ai le fau o fale fou e 200, ma e aofia ai ma ituaiga fale e gafatia na totogi ma fale mo tagata lautele.
Nelson City
- Fesoasoani tupe IAF na taliaina: $36.4 miliona
- Faamoemoe e fau fale fou e: 1,025
Pe ā ma le $36 miliona ua folafolaina e lagolagoina ai le toe faaaogaina o fanua sa atiae muamua i totonu o le aai o Nelson. O le a faaaoga le fesoasoani tupe IAF mo atinae tetele tau felauaiga ma le suavai tafatolu ma e faagaioia ai le maua o fale fou e 1,000, ma e iai le manatu maualuga i le Nelson City Council o se suiga lea o le a faasefuluina ai le toatele o le aofaiga o tagata e nonofo i le taulaga.
Hokitika
- Fesoasoani tupe IAF na taliaina: $3.5 miliona
- Faamoemoe e fau fale fou e: 110
O le a faagaioia vave e le Westland District Council le tau atiae o se vaega o le Hokitika Racecourse mo fale fou e faaaoga ai le $3.5 miliona o le fesoasoani tupe IAF, ma o le a vave ai ona aulia le taunuu o lea faamoemoe mai tulaga na muai fuafuaina.
O atinae tetele ma le suavai tafatolu o faatupeina e le IAF o fuafuaina e maua ai le 110 fale fou, ma le faamoemoe e aofia ai ma fale e gafatia na totogi ma fale mo tagata lautele e nonofo ai tagata matutua.
Westport
- Fesoasoani tupe IAF na taliaina: $13.6 miliona
- Faamoemoe e fau fale fou e: 400
O le a faamatuu atu i le taulaga Westport o le Motu i Saute le $13.6 miliona mai le IAF mo atinae tetele tau felauaiga ma le suavai, ma e lagolagoina ai galuega e faataunuu ai le fau o fale ma faatupu ai le malosi ma le gafatia o tagata o luitau e aliae mai suiga o le tau.
Ua loa tausaga o feagai ai le toatele o tagata o moomia fale i Westport, ma o le a fesoasoani le IAF e tau atiae ai fanua fou mo lea faamoemoe.
O le a faagaioia e atinae o faatupeina e le IAF fale fou e 400 ma e fau i totonu o le fetaulaigāala Alma Road o tau atiae, ma e maua ai e tagata i Westport ituaiga fale eseese e fau i luga o fanua maupuepue e tu ese mai fanua e lolovaia gofie.
O poloketi mo atinae tetele e aofia ai paipa mo vaitimu, alavai mo vaitafe ma paipa e faaalu ai suavai leaga, o se auala tele e fesootai ai i le taulaga ma toe faaleleia le auala laupapa, ma le auala uila vili vae fou ma le auala savali.
Kalaiesetete
- Fesoasoani tupe IAF na taliaina: $30.9 miliona
- Faamoemoe e fau fale fou e: 1,400
O le fesoasoani tupe IAF e $30.9 miliona mo atinae tetele e fau ai auala fou, faaleleia ai suavai leaga ma suavai o tafe i laufanua o le a vave ai na maua fale o se vaega tele o tau atiae i Papanui, Kalaiesetete.
E fesoasoani atinae mo suavai leaga e tuuitiitia ai tafeaga tetele e lolovaia ai fanua pe a tetele timuga.
E i ai le faamoemoe e faaaoga le fesoasoani tupe mo atinae tetele e fau ai fale fou e 1,400 ma e tu lata i le taulaga, aoga, auala mo feoaiga lautele, ma isi nofoaga mo mea faitele.
Rangiora
- Fesoasoani tupe IAF na taliaina: $5.7 miliona
- Faamoemoe e fau fale fou e: 1,300
E $5.7 miliona e faamatuu atu mo felauaiga ma le poloketi suavai tafatolu i Rangiora, ma o atinae nei e faagaioia vave ai le saunia o fale e 1,300 e gafatia na totogi ma fale mo fefaatauaiga faamaketi i atinae tetele mo fale o faia i sasae o matu o Rangiora.
Kaikōura
- Fesoasoani tupe IAF na taliaina: $7.8 miliona
- Faamoemoe e fau fale fou e: 460
E i lalo teisi ma le $7.8 miliona le aofaiga na faamatuu atu mo poloketi o faia i Kaikōura e faagaioia ai fale e 400 i nofoaga eseese e lua – le Vicarage Views, o se vaefanua fou e tutonu i le taulaga Kaikōura, ma le Ocean Ridge o se vaefanua o iai i le taimi nei i sisifo o le taulaga e sopoia ai le State Highway 1.
Lake Hāwea
- Fesoasoani tupe IAF na taliaina: $24 miliona
- Faamoemoe e fau fale fou e: 880
O le a faamatuu atu i Lake Hāwea le $24 miliona mo atinae tetele mo suavai tafatolu, e aofia ai paipa fou tetele e faaalu ai suavai leaga i nofoaga e togafitia ai, ma o se galuega e maua ai taunuuga lelei mo le siosiomaga ma le lautelē o le nofoaga e togafitia ai ina ia gafatia le faatuputupulaia o le faitau aofai o tagata o le a nofoia le vaipanoa lea. E i ai le faamoemoe o atinae tetele o faatupeina e le IAF o le a maua ai le 880 fale fou, e aofia ai fale e gafatia na totogi, i totonu o Longview Special Housing Area ma le aofaiga lautele o fale e tusa ma le tele o fale o moomia na faamauina e le QLDC seia aulia le 2041.
Na faapefea ona filifilia poloketi mo fesoasoani tupe?
Na faalauiloa e le Malo le IAF o se fesoasoani tupe mo atinae tetele ia Iuni 2021. Na matuai talisapaia e pulega faaitumalo, au fai atinae faufale ma iwi, ma e silia ma le 200 talosaga na tuuina mai i le uluai vaitaimi o faagasolo ai Tauofoga Tulaga o fia Aiaina.
O le uma ai o se vailiiliga, na valaaulia ai au fai talosaga e silia ma le 80 e tuuina mai tali auiliili o le Request for Proposal (RFP) a o lei mavae Tesema 2021.
O Aperila 2022, na valaaulia ai le 35 o talosaga e faaulufale se talosaga i le vaega mulimuli, ma na moomia ai le filigā e tatau ai ma feutagaiga tau pisinisi.
Na faatautaia e Kāinga Ora le faagaioia o le vailiiliina o talosaga ma na aofia ai ma fautuaga mai matagaluega a le Malo, ma o le faaiuga mulimuli o tulaga tau fesoasoani tupe na taatia atu i Minisita o Fale ma le Minisita o Tupe.
Na faatusatusa fuafuaga faatalosagaina i faavasegana autu na saunia e le Kapeneta:
- Taunuuga faamoemoeina mo fale (40%): afai e taunuu le Fuafuaga na faatalosagaina, e faapefea ona fesoasoani i taunuuga faamoemoeina mo fale e tusa ma auga tonu o le IAF?
- Aafiaga o fesoasoani tupe (20%): o le ā se aogā o le fesoasoani tupe lea i le faalauteleina o atinae tetele ma le atinaega o fale?
- Tupe alu ma tausoa le faatupega (20%): aogā o le tau o le Fuafuaga na faatalosagaina ma e faamata o sa‘o le aofaiga o totogi e tagata uma?
- Tomai ma le lava tapena (20%): afai e talia se fesoasoani tupe, o le ā se mautinoa o le faataunuuina ai o se poloketi, ma le vave e faataunuu ai?
E iai le faamoemoe e tatau i le tagata e ona le fanua ona totogi se vaega talafeagai, ma faaaoga fesoasoani tupe mai pulega faalotoifale ma isi e faataunuu ai atinaega of fale.
Faasilasilaga ofisa faasalalau ma faasalalauga a le Malo lata mai
- Fepuari 2023: Faaopoopo le fau o fale fou mo Northland e auala atu i le atinae faafaigaluegaina i Whangārei
- Novema 2022: Faitau afe fale fou o fuafuaina mo itumalo e sefulutasi e auala atu i atinae faafaigaluegaina
- Oketopa 2022: Tau atiae afioaga fou mai le faatupega o atinae tetele
- Iulai 2022: Fuafuaina le 8,000 ma ona tupe fale fou mai le $179m o le fesoasoani tupe mo atinae tetele
- Me 2022: Tolusefululima fale e atiae i le vaega mulimuli o le fesoasoani tupe mo atinae tetele
- Tesema 2021: Faaopoopo fale mo iwi i Porirua mai le uluai maliega mo le fesoasoani tupe mo atinae tetele
- Oketopa 2021: Aulia laasaga fou mo le fesoasoani tupe a le Malo mo atinae tetele
- Setema 2021: Faalauteleina fesoasoani tupe a le Malo mo atinae tetele
- Iuni 2021: Tatala avanoa mo Pisinisi mai le Fesoasoani Tupe e Faagaioia Vave ai Atinae Tetele
Fesili masani
O ai tonu e faataunuuina atinae tetele ma le fauina o fale?
O tulaga masani le faamatuu sa‘o o fesoasoani tupe i pulega faalotoifale, ma o pulega nei e nafa ma le faataunuuina o atinae tetele o faatupeina i le IAF. E galulue faapaaga ai pulega faalotoifale ma au fai atinae faufale ma iwi, ma o i latou nei e fauina fale.
Ua fuafuaina le IAF e fesoasoani i pulega faalotoifale, iwi ma au fai atinae faufale ia sao atu mai le laasaga muamua – faatupega o atinae tetele. E iai galuega e tatau ona faataunuu muamua e pei o paipa ma auala a o lei fauina fale.
E amata afea galuega atinae tetele?
O le amataga lea o le tau amata faatino o le IAF, ma e faalagolago taimi faatulagaina i le telē o atinae tetele e tatau na faatino. E vaavaai ma tulimatai lelei e le Kāinga Ora tulaga ua laasia e poloketi taitasi i le vaitaimi atoa o faataunuu ai, ina ia mautinoa le ausia o suiga tetele ma taunuuga na faamoemoe i ai.
E faamatuu atu fesoasoani tupe mo poloketi atinae tetele i le ausia ai o suiga tetele autu.
O a ituaiga fale o le a maua mai ai?
E iai le faamoemoe o atinae tetele o faatupeina e le IAF e tino mai ai le tele o atinae fale eseese i Aotearoa atoa, e aofia ai le toe faaaoga o fanua sa atiae muamua ma fanua e lei faaaogaina muamua mo ituaiga fale eseese. O taunuuga o faamoemoe i ai e aofia ai le maua o fale e gafatia na totogi, fale mo fefaatauaiga faamaketi, ma fale a le malo.
O tatala lava avanoa e tuuina atu ai sa‘u talosaga mo se IAF?
Ua tapunia nei talosaga mo le IAF. Na valaaulia pulega faaitumalo, fai atinae faufale ma iwi e tuuina mai talosaga.
Nisi faamatalaga
- Faafesili Masani: Faamolemole imeli le IAF Team i le IAF@kaingaora.govt.nz
- Faafesili ofisa faasalalau e faatatau i le IAF: Faamolemole tuuina sa‘o faafesili ofisa faasalalau e faatatau i le IAF i le mediaenquiries@kaingaora.govt.nz
- Faamatalaga talaaga na faavae ai, e aofia ai ma pepa o faamatalaga a le Kapeneta: Faamolemole tagai i le Te Tūāpapa Kura Kāinga – Ministry of Housing and Urban Development(external link)
Uma na faafou le itulau: 29 February 2024