Tulaga Gafataulimaina Kāinga Ora
O se matafaioi tele ma le taua le faatino e Kāinga Ora o galuega e suia ai ituaiga fale eseese i Niu Sila e mafai ona filifili pe fetaui, atoa ma le suia o taunuuga ma le matātā atoa o saunia fale ina ia maua fale ma lotoifale e mafai ai ona soifua ma ola lelei ai Tagatanuu Niu Sila.
E tusa ma le avea ai ma faalapotopotoga e saunia fale mautotogi i le 200,000 o tagata nofo mautotogi, ma le tausisia o tulaga lelei o fale e 69,000 ma taumafaiga e fau ai fale fou e 1,100 i tausaga taitasi, o se avanoa lelei lenei e faaleleia ai le maua o se siosiomaga manuia i galuega faufale uma ma galuega mo le atinaega o taulaga, ma faamalosia suiga lelei o matātā i Niu Sila atoa. Matou te folafolaina le faamautinoaina o suiga e laugatasia uma ai ma suiga e sa‘o mo tagata o faaaogaina a matou auaunaga.
O la matou faamoemoe foi le faamautinoaina o faiga gafataulimaina ua tuufaatasia ma faiga ua fuafuaina mo le atinaega o taulaga, fauina o fale ma galuega tau pisinisi. E ono vaega autu o ave i ai la matou faamuamua:
- lagolagoina le suia o galuega faufale e tuuitiitia ai kasa oona,
- toe faaleleia laufanuaola ma vaomatua i le taulaga ma afioaga,
- puipui ma toe faaolaola alāvai o siomia ai nofoaga mo atinaega,
- lagolagoina auala mo feoaiga e itiiti kasa oona o gaosia ai,
- tuuitiitia le faamaimau mai galuega faufale po o otaota mai fale ua talepe ese,
- faamautinoaina le malosi o tatou fale ma tagata e gafatia ai aafiaga o suiga o le tau.
Taiala Faataatia Tau Siosiomaga [PDF, 1.1 MB]
Matou vaega autu
E pito telē ai lava Kāinga Ora faatusa i isi faalapotopotoga fai atinae faufale, ma e fia avea ma taitai i suiga e tuuitiitia ma aveesea kasa oona mai faiga o faaaoga mo galuega faufale. I le taimi nei, o le 20% o kasa oona i Niu Sila e gaosia mai fale (mai mea tatou te faaaogaina), ma e faalimaina le telē lava lea mai fale fou o kasa oona e faatagaina i lalo o sini o faamoemoe atu i ai i le 2050.
E faalagolago le tuuitiitia o aafiaga nei, i le faaaoga tatau e Kāinga Ora o le telē ma le malosi o galuega faufale e suia ai faiga o fau ai fale, faapena foi le avatu o se fesoasoani i matātā o galuega o fausaga e amata suia faiga i auala e tuuitiitia ma aveesea ai kasa oona.
O lo o fuafuaina le siitia o le moomia tele o le eletise i le 68% i le aulia ai o le 2050 i Niu Sila. E faapena foi le moomia o le tuuitiitia o kasa oona mai malosiaga tetele o gaosia ai le eletise (tulaga uma o gaosia ai ma mea o faaaoga). E ui i nisi o malosiaga fou e maua mai faiga masani e le o tuuitiitia ai le aogā o malosiaga faalenatura e faamautinoaina ai le ausia i Niu Sila o auala e tali atu ai i le moomia o malosiaga tau eletise i le lumanai ma le maua e tagata o faaaogaina a matou auaunaga auala taugofie e maua ai. O Aokuso 2020 na faasilasila ai e le malo se fesoasoani tupe e faataitai ai tekonolosi e gaosia ai malosiaga faalenatura e faia i fale a tagata Māori ma fale mo tagata lautele.
E muamua faataitai i fale a Kāinga Ora ma e aofia ai le faapipii o malosiaga tau eletise gaosia mai ave o le la i fale na toe faapipii ai faiga e le soona faaalu ai le eletise ma fale fou i le itumalo o Ueligitone atoa. O le uma ai o le faataitaiga lenei ona faia lea o isi faataitaiga e iloa ai le aogā o faiga e gaosia ai le eletise faatasi ma le faasoasoa lelei o le eletise i totonu o nofoaga e feololo le lautelega o fale o nofoia. E fesoasoani le faiga o le a faagaioia ai e maua ai se tali e talafeagai ma faiga tau pisinisi ma e mafai ona toe fai le faiga lava lea i isi nofoaga, a o faapena ona tuuitiitia tupe alu mo le eletise mo tagata o faaaogaina a matou auaunaga.
E tusa ma le 40 - 50% otaota mai galuega faufale ma nofoaga ua talepe o tiai i nofoaga e lafoai ai lapisi i Niu Sila. Mo se faataitaiga, e tasi se fale fou faatoa fau e maua ai le fa tone o otaota mai le vaitaimi atoa na fau ai.
E taulai galuega ua faia e le Kāinga Ora i le tuuitiitia o le faamaimau mai atinaega o fanua ma fale. O lo o iloilo tulaga e mafai ai ona fesiitai fale i se isi nofoaga po o le tala i lalo fale tuai nai lo le talepe, mo tulaga e mafai ai. O la matou faamoemoe foi le faaitiitia o otaota mai galuega faufale e auala atu i le faaaoga tatau o mea faufale ma le tausisia o auala e tuuitiitia ai le faamaimau. Galulue faatasi ma au konekarate ma tomai faapitoa faufale, e fesoasoani ia suia atoa faiga faavae ua masani ai.
Metotia e faamamā ai se nofoaga o faia ai galuega
E le faapea na o le fau o fale o faamoemoe i ai le Kāinga Ora, ae faapena foi i le atiina ae o afioaga ma tagata. I le taimi nei, e pito tele kasa oona mai feoaiga i totonu o taulaga o Niu Sila, ma e maua ai le 37% o kasa oona e masani ona maua mai mea o faaaoga i se fale.
E ui i le tele o luitau o agai mai auā le amata faagasolo o suiga i ituaiga metotia e tuuitiitia ai kasa oona, e taulai taumafaiga ua saunia e Kāinga Ora i mea e gafatia ona faataunuu ma mafai ona pulea; atiina ae o afioaga ma tagata o faasili auala savali ma le sao gofie e agai atu ai i nofoaga faitele mo tafaoga, ma uunaia isi auala faitele mo feoaiga i nofoaga e mafai ai.
Matou te le o nofonofoai i auala o tali atu ai mo le ausia o taunuuga gafataulimaina ma le soifua manuia ua saunia i le auivi Sustainable Transport Outcomes. O lo o manino i le auivi taunuuga faataatia mo feoaiga o faia e Kāinga Ora mo galuega tau atiae ma afioaga, ma e mausali le taulai i ituaiga auala mo feoaiga e fetaui lelei mo tagata uma.
- Sustainable Transport Outcomes Gagana Peretania [PDF, 3 MB]
- Sustainable Transport Outcomes Te Reo [PDF, 2.9 MB]
Faasilasilaga mo ofisa faasalalau
Na tuuina atu i le Kāinga Ora le matafaioi e toe totō vaomatua i nofoaga e pito tele ai se vaega o fanua o umia e la matou pulega. E tele aogā ma le tāua o vaomatua, e aofia ai le:
- faaleleia o le soifua maloloina ma le soifua manuia o tagata,
- faaatoatoaina o le malosi o laufanua ma le suavai,
- apoa kasa oona,
- tuuitiitia tulaga e faaleagaina ai le ea, palapala ma le suavai,
- lagolagoina taumafaiga a tagata e toe totō ma faaleleia laufanuaola, ma le
- taofiofi le vevelasia o totonu o taulaga.
O le a faia e Kāinga Ora tulaga uma e faamautinoaina ai auala e fuafuaina ai fuafuaga, galuega faufale, ma galuega faatino o lo o faamuamua ai vaomatua, ma o se galuega fai faatasi ma isi faalapotopotoga, o ē umia fanua, ma vaega faitele ina ia faaleleia taunuuga mo le motu o tagata e tatau ona matou tali i ai.
O Me 2023, na fesoasoani ai Kāinga Ora i le faalauiloaina aloaia o le Ngaa Hau o Maangere Planting Guidelines; o se taumafaiga fai faatasi i le va o mana whenua, Mangere East Family Services, Uru Whakaaro ma Kāinga Ora.
Faasilasilaga mo ofisa faasalalau
- Amata tatupu se fasi vaomatua mai se tōtara - 21 Oketopa 2022
Tinoifale Lelei ma Malosi
Talu ai le telē o le polokalame e fau ai fale fou, ma le pule aloaia e saunia ai fale e sili ona lelei mo tagata o faaaogaina auaunaga, ua folafola ai e Kāinga Ora le fua o tulaga lelei i nisi o fale fou i le taimi lava faatoa uma na fau ma nofoia ai.
Galulue faatasi ma tagata o faaaogaina auaunaga ua tuuina mai le maliega, matou te aoina mai ai faamaumauga, e iloa ai tulaga lelei o fale e fua i le mafanafana ma le itiiti o le eletise e faaaoga ai. E tuufaatasi faamatalaga nei ma manatu faaalia o tagata o faaaogaina auaunaga, ina ia maua se ata atoa o le lelei ma le aogā o le fale i le nofo.
O le aoina mai o faamatalaga nei o se tasi o vala o tulaga ua matou folafolaina auā le faaleleia faifai pea, ma le faataunuuina o a matou aga taualoa gafataulimaina. E mafai ai ona matou iloa avanoa mo galuega faaleleia, ma fautuaina ai tulaga faatonuina o fale e fau i le lumanai ina ia maua e tagata o faaaogaina auaunaga o saunia e Kāinga Ora fale e mafanafana, matū ma lelei i le nofo e le soona alu ai tupe e tau faamafanafana ma tau faamālū ai.
O lo o faia uluai suesuega ‘faataitai’ i Porirua, ma e i ai le faamoemoe e faalauaitele atu i le atunuu atoa.
Matou faalapotopotoga
Ua faia e Kāinga Ora se uluai suesuega e malamalama ai i vaega tonu e pito sili ona maualuga ai kasa oona. O se suesuega e ogatasi ma le Carbon Neutral Government Programme(external link), e mafai ai ona matou faia se faatusatusaga ma lipotia kasa oona mai pisinisi ma faamautinoa le tuuitiitia ma le aveesea o kasa oona mai galuega faatino i le 2025. E aofia ai le faaaoga o le eletise e faaola ai taavale, faamaonia o ofisa tetele o faaaoga lelei malosiaga faalenatura, ma le taulai o galuega faatino mo le tuuitiitia o kasa oona.
E manino foi i taumafaiga o faatino e Kāinga Ora le itiiti o kasa oona mai ana galuega faatino faatusa i kasa oona mai galuega tetele o faatino e faalapotopotoga faufale, ma malosiaga faalenatura o faaaoga i totonu o fale i le vaitaimi atoa e aogā ai. O le mafuaaga tonu lava lea, o le a faalauaitele ai tulaga o le a lipotia i kasa oona e aofia ai kasa oona o filogia faatasi ma oloa ma mea o faaaoga e fau ai fale ma e fesootai i atinae tetele, ma le faatusatusaga o le tele o le malosiaga faalenatura o faaaoga e tagata o faaaogaina a matou auaunaga. O auala nei e atili faaleleia ai faiga matou te fuafuaina ma fau ai fale ina ia mautinoa le tuuitiitia o aafiaga o galuega faufale, ma le faasoasoa lelei o le eletise.
O le avanoa sili lea e tuuitiitia ai kasa oona ma amatamea ai i le tuuitiitia o kasa oona mai maketi e maua mai ai oloa.
Faasilasilaga mo ofisa faasalalau
E iai tulaga e ono afaina tele ai tagata o faaaogaina a matou auaunaga ma fale, ona o faaletonu e mafua mai suiga o le tau.
Na matou faia se suesuega o lamatiaga e fesootai i le siisii o le fogatai ma le tele o timuga e fesootai i lologa. Na faia foi fesootaiga ma NIWA e toe iloilo la matou talaaga faamauina ma atinae o teufaafaigaluegaina ua fuafuaina e tali atu ai i lamatiaga o lologa ua mafai ona iloa.
Ua amata faagasolo le faia o se taiala faataatia, taiala faavae, pulega ma galuega e tali atu ai i lamatiaga nei ina ia faamautinoa le vave o se tali atu ma le aogā o faiga o tali atu ai.
Kāinga Ora climate statements 2024
The Climate Statements outline how we identify, assess and manage the risks and opportunities posed by climate change. They also include information about our greenhouse gas emissions.
Uma na faafou le itulau: 17 October 2024