Maliega mautotogi

Taiala maliega mautotogi

Maimoa i le video i le Taiala e malamalama ai i lau maliega mautotogi [PDF, 788 KB]

O se aotelega o le Residential Tenancies Act

E puipui tagata nofo mautotogi ma tagata e ona fale i le Residential Tenancies Act, ma e aofia ai tagata uma o aafia i se fale o mautotogi ai.

E fesoasoani lau maliega mautotogi e mautinoa ai o matou ausia tulaga moomia o le Residential Tenancies Act, ma faamatala manino tulaga e pei o le nofoaga e mafai na paka ai lau taavale po o le mafai na fai se fagafao.

E tatau ona oulua sainia faatasi ma lau Housing Support Manager, po o se sui o le Kāinga Ora, lau maliega Mautotogi a o lei siitia e te nofo i le fale. E mautinoa le maua atu o sau kopi o le maliega lea.

Matou tiute tauave

O tulaga nei matou te faia, pe a tatou sainia faatasi se maliega mautotogi:

• mautinoa o saogalemu ma malu lou fale, ma o iai i se tulaga lelei
• mautinoa o ausia e lou fale tulafono laiti mo fale ma tulaga faalesoifua maloloina ma le saogalemu
• faatulaga le faataunuu o lipea o moomia i se taimi vave e mafai ai
• tuuina atu se faasilasilaga i le 24 itula a o lei faataunuu se galuega faaleleia na fuafuaina
• tuuina atu se faasilasilaga i le 48 itula a o lei faia se asiasiga faaletausaga.

O le matafaioi a Kāinga Ora le faatumauina o tulaga lelei o lou fale ae e le o se tiute a le faalapotopotoga meafale po o meatotino ua faaleagaina, faaleagaina i se mu pe na gaoia. Matou te fautuaina lou faia o se inisiua mo meatotino mo tulaga faapenei.

Afai ua e manatu ai matou te le o faia la matou tiute, faafesootai mai tatou te faia faatasi se tonu sa‘o ma lelei.

Tiute tauave tagata nofo mautotogi

O lou sainia o lau maliega mautotogi, ua faapena na e maua ai le aiatatau e te ola fiafia, nofo lelei, ma puipui ia te oe lava i lou fale e aunoa ma le faalavelave atu o Kāinga Ora po o isi tagata mautotogi ma tuaoi.

E tusa ma lou tulaga o se tagata mautotogi i fale Kāinga Ora, matou te talosagaina lou:

• totogi o lau mautotogi i taimi faatulagaina
• vaai lelei lou fale ma teu mamā le fanua
• faailoa mai i se taimi vave e mafai ai pe a moomia se galuega faaleleia
• fai ma ou tiute amioga o isi tagata o tou nonofo faatasi po o asiasi atu i lou fale. E iai tulaga e noatia ai ona e totogia ni mea na latou faaleagaina
• tausisia le va fealoai ia maua e ou tuaoi le filemu, nofo lelei ma le malupuipuia

E taua ia i matou le fesoasoani atu ia maua lou saogalemu mai se mu i lou fale. E mafai foi ona e fesoasoani mai:

• faailoa mai i se taimi vave e mafai ai pe afai ua lē ola se faailo asu. Valaau mai pe afai o tatagi le faailo asu e aunoa ma se mafuaaga tatau - e taua le taatia ai pea o faailo asu, aua le talai esea pe aveese maa, e mafai ona matou fesoasoani atu i le tulaga lea.
• fai se fuafuaga i auala e tuua ai le fale mai se mu, ia mautinoa:
  • e leai se mea o poloka ai le ō ese (e leai ni mea o faaputu i le sitepu ma le mea e savali ai)
  • leai ni mea o poloka ai faitotoa e ulufafo ai
  • tapunia faitotoa e taofiofi ai le asu ma le mu, pe afai e iai.

Afai ua leiloa ki o le fale po o le loka o oe i fafo ma le fale, valaau se fai loka, pe valaau mai foi pe afai o moomia se fesoasoani.

Tuuina mai manatu faaalia

Faamolemole faailoa mai pe afai o iai se faaletonu, auā e taua lou maua o le nofo lelei i lou fale. E taua manatu ua e faaalia matou te iloa ai mea e toe fai faalelei i le isi taimi e toe tupu ai.

E iai auala eseese e mafai ona e faafesootai mai ai ma o le a taumafai e tali atu i totonu o le lua aso faigaluega.