Whakangungu me ngā mahi pia

Kaupapa mahi pia

He tino hira ngā mahi pia ki te ohumahi hangatanga pakari o te anamata. Engari, ehara i te mea māmā mō ngā pakihi ki te kimi i tētahi pia, ngā kāmura, rehe kōrere, kaimahi hiko pūhou rānei ki te kimi i tētahi kamupene hei ako i a rātou e mahi moni ana.

Ka mahi tahi te kaupapa mahi pia a Kāinga Ora me ngā hoa hanga, ngā kaiwhakarato whakangungu me te manaaki ākonga, me ētahi atu tari kāwanatanga ki te āwhina i ngā tāngata ngākaunui o Aotearoa kia uru ki ngā momo mahi pia ringarehe rerekē, te tautoko i a rātou me ā rātou kaimahi kia tino whai hua i ō rātou angitu.

E hia tini tāngata o Aotearoa kua āwhinatia e mātou kia uru ki ngā mahi pia me ō mātou hoa mahi tahi puta noa i tā mātou kaupapa hangatanga whare noho tūmatanui.

Ko ētahi o ō mātou hoa mahi ngātahi ko Building & Construction Industry Training Organisation (BCITO), Te Manatū Whakahiato Ora (MSD), me Te Pūkenga. Ka mahi tahi hoki mātou me ngā kaiwhakarato ratonga, he mahi rātou e tautoko ana i ngā hapori Māori me te Pasifika.

Te mahi me ngā kura tuarua

Kei te mahi tahi mātou me ngā kura tuarua kia mōhio ai rātou ki ngā painga o tētahi o te aramahi ringarehe me ngā ara mō te hunga wehe i te kura ki te whakangungu me te whai mahi i te rāngai hangatanga.

Tekau mā rua ngā kura ringarehe puta noa i te motu e hanga whare ai ngā ākonga ki ā mātou whakatakotoranga i raro i ngā tohutohu a ngā kāmura rēhita me ngā kaiako, e whiwhi mōhio ai ki ngā mahi kāmura, ngā paipa wai me te hiko. Ka whakamātauria e mātou tētahi kirimana hangatanga arumoni me te kura, ā, ka haere atu ā mātou kaiwhakahaere mahi ki ngā wāhi mahi kia āta tirotirohia ngā mahi. Ina oti ngā kāinga ka hokona mai e mātou kātahi ka kawea atu ki tētahi o ō mātou wāhi whanaketanga whare noho tūmatanui.

Anei ētahi o ngā kura me ngā hinonga ringarehe e mahi tahi ana mātou i tēnei wā:

Dargaville High School
Unitec Te Pukenga
Massey High School
Onehunga High School
Te Kura Tuarua o Rotohokahoka
Raukura
Te Kāreti o Ōpōtiki
Weltec Whitireia
Iconiq Gisborne
Hastings Boys High School me
Nelson MIT Te Pukenga.

I tua atu i ngā kura ringarehe, ka hāngai tā mātou kaupapa kura tuarua ki tika ai ki ō mātou hoa hanga me ngā kura o te rohe. I te nuinga o te wā he whai kura ō mātou hoa hanga e hiahia ana rātou ki te tautoko hei āwhina mā mātou ki te whakatū i te pātuitanga me te kura ka kōwhiria e rātou, e āpiti ana rānei. Ka taea hoki e mātou te whakatika te kaha o te whai wāhi o ngā ākonga. Kua whakaritea e tētahi kura kei te taha o ā mātou whanaketanga whare noho tūmatanui i Ōtautahi kia haere atu ngā ākonga, ā, ka haere atu te hoa hanga ki te akomanga ki te whakamārama i ngā wāhanga o te hangatanga. Kei reira anō ngā arawātea wheako mahi e riro mai ai pea he mahi pia, ētahi atu arawātea rānei mā ngā ākonga.

Pānuitia ētahi ō mātou kōrero kura ringarehe

MATES in Construction

Kei te rāngai ahumahi te ōwehenga nui rawa o ngā mate whakamomori puta noa i ngā ahumahi i Aotearoa, ā, e whakapono ana a Kāinga Ora he wāhanga tōna ki te hāpai i te hunga ringarehe e pāngia ana e ngā mate hauora hinengaro ki te whiwhi i ngā āwhina ina hiahiatia ana e rātou. Koinei te take i mahi ngātahi mātou me te kaupapa aroha mō te ārai mate whakamomori me te hauora hinengaro a MATES in Construction i te tau 2020.

Kei te hōrapahia te kaupapa MATES in Construction i ngā wāhi hanga o Kāinga Ora, he kaupapa ārai mate whakamomori i te wāhi mahi e arahina ana e te ahumahi mō te whakahau i ngā kaimahi ki te tiaki i a rātou tētahi ki tētahi me te rapu, te tuku me te whakaae ki ngā āwhina ina hiahiatia. Ko te whāinga ko te whakapakari i ngā pūkenga me te mōhio ki te hauora hinengaro me te whakauru i tēnei ki ngā mahi o ia rā.

Kua whakaaturia a MATES in Construction hei tauira tikanga pai rawa i te ao mō te ārai i te mate whakamomori e te World Health Organisation (WHO) i roto i tā rātou whakaputanga Live Life: An Implementation Guide for Suicide Prevention in Countries(external link).

Construction Plus

Mā Construction Plus, ka āwhina a Kāinga Ora i ngā hapori kua pākahatia e te whanaketanga ā-tāone, mā te tūhono i te tangata ki ngā whakangungu, te whai mahi me ngā arawātea ahumahi puta noa i Tāmaki Makaurau me Aotearoa. Ka hono atu te kaupapa nei i ngā ākonga kura tuarua ki tō mātou hoa mahi kari whenua a LEAD Alliance me te tuku arawātea mō te wheako mahi.

Te tautoko i ngā taiohi kia whiwhi moni ai i a rātou e ako ana - 19 Hūrae 2023
He whānui te tīmata a te ākonga kāmura mā te kaupapa karahipi - 13 Hune 2023
Ka rawe kē ki ngā ākonga Construction Plus a Kāinga Ora te wheako mahi i te wāhi mahi - 11 Mei 2021

Kaupapa a Te Ara Poutama

Kei te āwhina tā mātou mahi ngātahi me Te Ara Poutama Aotearoa i a mātou kia nui haere ake te whakarato i ngā whare mahana, maroke hoki.

Kei te mahi tahi a Kāinga ora me ngā whare herehere o Rolleston me Spring Hill i raro i tētahi kaupapa e whiwhi pūkenga hangatanga ai ngā mauhere i a rātou e whakahou haere ana i ngā kāinga kāwanatanga i ngā iāri hangatanga i roto i ngā whare herehere. Kātahi ka nekehia ēnei whare ki ngā whenua o Kāinga Ora hei kāinga mō ā mātou kiritaki. Kua whakawhānuitia tēnei kaupapa kia uru mai anō ko ngā kāinga kāwanatanga hou ka hangaia mā tēnei mahi tahi.