Toitūtanga i Kāinga Ora
I Kāinga Ora, he kawenga hira tā mātou mō te takahuri i ngā kōwhiringa whare noho i Aotearoa, ngā putanga me te rāngai whare noho whānui mā te hanga kāinga me ngā hapori e momoho ai ngā tāngata o Aotearoa.
Hei kaituku i ngā ratonga retihanga ki tōna 200,000 kairēti, me te tautiaki i te 69,000 kāinga, me te tuku i te 1,100 kāinga tāpiri hou ia te tau, kei a mātou te āheinga nui ki te whakapai ake i te oranga taiao mā ā mātou mahi hangatanga, mahi whanaketanga ā-tāone hoki, ā, hei whakakā i te huringa pai puta noa i te ahumahi whānui ake o Aotearoa. E ū ana mātou ki te whakarite i te whakawhitinga mana ōrite, tika hoki mō ā mātou kiritaki.
E hiahia ana mātou ki te whakarite kia whakaurua ngā mahi toitū ki te āhua o tā mātou whakamahere i ō mātou wāhi whanaketanga ā-tāone, o tā mātou hanga kāinga, o tā mātou mahi i ā mātou mahi. E whai ana mātou me ā mātou kaupapa matua e ono kia:
- tautoko i te whakawhitinga ki te hangatanga waro-iti,
- whakapai ake i ngā putanga mō te kanorau koiora, mō te ngahere ā-tāone i ō tātou hapori,
- tiaki me te whakaora i ngā kōawa e karapoti ana i ō mātou wāhi whanaketanga,
- tautoko i te ikiiki waro-iti,
- whakaheke i te para hangatanga me te turakanga,
- whakarite kia tū pakari ō mātou kāinga, ō mātou hapori anō hoki ki ngā pānga huringa āhuarangi ā te anamata.
Tā Mātou Rautaki Taiao [PDF, 1.1 MB]
Ā mātou wāhi whakaarorangi
Hei te kaiwhakawhanake whare noho tino nui o Aotearoa, e whai ana a Kāinga Ora kia tū hei kaihautū ā-ahumahi mō te whakawhiti i te rāngai ki ngā mahi hangatanga waro kore. I tēnei wā, ko ngā whare ko te 20% o ngā putanga waro o Aotearoa (mā te whakapeto), ā, nā ngā hangatanga hou te 5x te rahi o te waro e whakaaetia ana i raro i ā tātou whāinga 2050.
Hei whakaheke i tēnei pānga, e kawe ana a Kāinga Ora i tōna rahi, i tōna hōkai hoki ki te panoni i te āhua o tāna hanga i ngā kāinga, waihoki ki te āwhina i te ahumahi hangatanga i tōna whakawhitinga atu ki te waro kore.
E whakapaetia ana kia piki te hiahia ki te hiko mā te 68% hei te tau 2050 i Aotearoa. I taua wā tonu me mātua whakakore i te waro tō tātou nei kōtui ā-motu (te whakaputanga me te tūāhanga anō hoki). Ahakoa ka ahu mai ētahi whakaputanga hou i ngā puna o mua, e whakapae ana mātou ka noho waiwai ngā pūnaha pūngao hangarua ki te whakarite kia whakatutukihia e Aotearoa ōna hiahia pūngao ā muri ake, ā, kia taea e ā mātou kiritaki te whai i te pūngao tareka ā-utu. I te Ākuhata i te tau 2020 i whakapuakina e te kāwanatanga te pūtea hei whakamātau i ngā hangarau pūngao hangarua ki ngā whare tūmatanui me ngā whare Māori.
Ko te whakamātautau tuatahi ka whakatinanatia ki ngā papanoho a Kāinga Ora ko te whakamau i ngā papa kōmaruhiko (photovoltaic) ki ngā kāinga kua whakahoungia, ki ngā kāinga hou hoki i te rohe o Te Whanganui-a-Tara. Whai muri i tērā ka whakahaere mātou i tētahi raupapa o ngā whakamātautau e tiro atu ana ki te whai hua o te whakaputanga hangarua kua whakakotahingia ki te whāomotanga pūngao ki te whare noho apiapi. Mā roto i te tukanga e whai ana mātou ki te rapu i ngā otinga ahumoni ka taea te tārua ki ētahi atu wāhi, i te wā tonu e whakaheke ana i ngā utu hiko mō ā mātou kiritaki.
Ko tōna 40 - 50% o ngā para katoa ka tukuna ki te ruapara i Aotearoa ko te para hangatanga me te para turakanga. Hei tauira, ka whakaputaina e te kāinga kua hangaia houtia te toharite o te whā tana o te para i roto i te hātepe hangatanga.
E arotahi ana a Kāinga Ora ki te whakaheke i te nui o te para ka whakaputaina e ā mātou mahi whanaketanga. E anganui hoki ana mātou ki te neke kē, ki te āta wāwāhi rānei i ngā whare tawhito ake kaua e turaki, ina taea ana. Kei te whai hoki mātou ki te whakaiti i te para hāngai-hangatanga mā te whakamahinga rawa tōtika ake me ngā mahi whakahaere para. I runga i te mahi ki te taha o ā mātou kaikirimana, o ngā mātanga ahumahi anō hoki, e whai ana mātou ki te whakamahi i tō mātou rahi hei āwhina ki te takahuri i te pūnaha.
Kei Kāinga Ora he nui ake tā mātou i te hanga i ngā kāinga, kei te hanga hoki mātou i ngā hapori. I tēnei wā, i ngā wāhi tāone o Aotearoa ko te ikiiki te puna tino nui o ngā tukunga waro, ā, ko tāna he tuku i te 37% o ngā tukunga o te kāinga tūtahi noa.
Ahakoa he nui ngā wero kei mua i te aroaro mō te whakawhiti atu ki te ikiiki waro-iti, e whakaarorangi ana a Kāinga Ora ki ngā āhuatanga e taea ana i roto tonu i tō mātou pānga; e hanga ana i ngā hapori ka hāpai ake i te āheinga ki te hīkoi, i te tomopai ki ngā rawa tukuora, me te āki i ngā momo ikiiki tūmatanui, i ngā momo ikiiki kē atu i ngā wā katoa ka taea.
E whakatinana ana mātou i te aronga hohe, hei kaiārahi hoki ki ngā putanga mō te toitūtanga, mō te oranga hoki ki tā mātou pou tarāwaho Sustainable Transport Outcomes. E whakatakoto ana tēnei i ngā putanga rautaki mārama mō te ikiiki ki roto i ngā whanaketanga me ngā hapori o Kāinga Ora, me te aronga mārō ki te whakarite e tino taea ana ngā momo ikiiki tūmatanui, ngā momo ikiiki hohe hoki e te katoa.
- Sustainable Transport Outcomes Te Reo Ingarihi [PDF, 3 MB]
- Sustainable Transport Outcomes Te Reo Māori [PDF, 2.9 MB]
Pānui pāpāho
- The transition to an electric fleet, our journey so far - 7 Māehe 2022
Kei a Kāinga Ora te mahi me te kawenga hei āwhina ki te whakahoki i te ngahere ki ngā wāhi i reira he rangatira whenua nui mātou. He maha, he nui hoki ngā painga o te ngahere, tae atu ki ēnei:
- he pai ake te hauora me te oranga o te tangata,
- he kaha ake te mauri o te whenua, o ngā wai,
- te whakaputu waro,
- he iti iho ngā tūraru o te parahanga ā-hau, ā-oneone, ā-wai hoki,
- te tautoko i te whakaoranga ā-hapori me te kanorau koiora pātata he pai ake, ā,
- te ārai i te pānga motu wera ā-tāone.
Ka whai a Kāinga Ora ki te whakarite ko ā mātou ake mahi hoahoa, hanga, mahi hoki ka whakamātāmua i ngā hua mō te ngahere, hei tāpiri atu ki te whakahoa ki ētahi atu whakahaere, ki ētahi atu rangatira whenua, ki ētahi atu rōpū hapori anō hoki hei whakaahei i ngā hua pai ake mō ngā hapori whānui ake i roto rā mātou e mahi ana.
I te Mei i te tau 2023, i āwhina a Kāinga Ora ki te whakarewa te Ngaa Hau o Maangere Planting Guidelines; he mahinga ngātahitanga i waenga i ngā mana whenua mātou ko Mangere East Family Services, ko Uru Whakaaro ko Kāinga Ora.
Pānuitia ngā aratohu [PDF, 11 MB].
Pānui pāpāho
- A tiny forest starts with a mighty tōtara - 21 Oketopa 2022
Aroturuki Taiao ā-Roto
Nā te nui o te kaupapa hanga, me te mana ki te whakarato kāinga pai ake ki ā mātou kiritaki, e pūmau ana a Kāinga Ora ki te ine i te mahinga a ētahi o ō mātou kāinga hou ina hangaia, ā, ka nōhia.
Mā te mahi tahi me ngā kiritaki kei te whakaae, kei te tīmata mātou ki te kohikohi raraunga, ā, he whakaatu ki a mātou he pēhea te mahinga a ngā kāinga e ai ki te pai o te noho ā-mahana nei me te mahinga pūngao. Ka whakakotahitia e mātou ēnei mōhiohio me te rangahau i ngā whakaaro o ngā kiritaki, kia whānui ai tō tātou tirohanga o te noho āhuru me te mahinga a te kāinga.
Ko te kohikohi i ēnei mōhiohio tō mātou pūmau kia mutunga kore te whakapai ake, me te whakarato i ō mātou mātāpono toitūtanga. Ka āwhina tēnei i a mātou ki te tautuhi whai wāhitanga kia pai ake, ā, ka whakamōhio i ā tātou paerewa hanga anamata kia āhei atu ai ngā kiritaki katoa a Kāinga Ora ki ngā kāinga mahana, maroke me te hauora he tōtika te utu ki te whakamahana me te whakamātao.
Kua tīmata kē ngā rangahau 'tauira' tuatahi i Porirua, me ngā mahere ki te whakaroha i te kaupapa puta noa i te motu.
Tā mātou whakahaere
Kua whakahaerehia e Kāinga Ora tētahi tūhuratanga tuatahi kia mārama ai ki ā mātou pūtake tukunga waro nui rawa. E hāngai ana ki te Kaupapa Kāwanatanga Waro Kore(external link), ka inea e mātou me te pūrongo ki ā mātou tukunga waro pakihi me te whakarite he waro kore ā mātou whakahaere hei te 2025. Kei roto i tēnei ko te whiwhi i ngā waka hiko mō ō mātou waka katoa, te tiwhikete mahinga pūngao mō ā mātou tari nunui, me te arotahi ki ētahi atu tikanga whakahaere hei whakaiti tukunga.
Engari, mō Kāinga Ora, kei te mārama mātou he nui ā mātou tukunga waro whakahaere pakihi e ai ki ngā tukunga waro e pā ana ki ā mātou mahinga hangatanga, me te pūngao i whakamahia i ō mātou kāinga mō te roanga o te wā. Nā tēnei, a whakawhānuitia e mātou te awhe o ā mātou pūrongo tukunga hei whakauru mai i ngā tukunga kei roto i ngā hua me ngā rawa ka whakamahia hei hāngai i ō mātou kāinga me ngā tūāhanga hāngai, me ngā pūngao whakatau tata ka whakamahia e ā mātou kiritaki. Ka kōkirihia e tēnei ngā whakapaitanga mō te āhua o tā mātou hoahoa me te hanga i ō mātou kāinga kia iti ai ngā pānga hangatanga, me te arotau i te tōtika ā-pūngao.
Koinei tō mātou arawātea hei whakaiti i ngā tukunga waro me te whakahohoro i te whakaiti waro mā ā mātou ara ratonga.
Pānui pāpāho
- The transition to an electric fleet, our journey so far - 7 Maehe 2022
Kāore e kore he nui te pānga o ā mātou kiritaki me ngā kāinga nā ngā aituā huringa āhuarangi.
I whakahaerehia e mātou tētahi aromatawai mōrea tuatahi e pā ana ki te piki o te moana me ngā waipuke nā ngā marangai. I toro atu mātou ki a NIWA ki te arotake i tā mātou kōpaki me te huarahi haumi i whakaritea hei whāinga ki ngā mōrea waipuke e mōhiotia ana.
Kei te wāhanga tuatahi mātou o te waihanga rautaki, kaupapahere, ngā urupare a te poari me te whakahaere ki ēnei mōrea hei whakarite ka taea e mātou te urupare wawe, tōtika hoki.
Kāinga Ora climate statements 2024
The Climate Statements outline how we identify, assess and manage the risks and opportunities posed by climate change. They also include information about our greenhouse gas emissions.
Kua whakahoungia te whārangi: 17 Whiringa-ā-nuku 2024