Te whakaaetanga retihanga

Te aratohu whakaaetanga retihanga

Ki te taha o te ataata nā mātou hoki i hanga tētahi Aratohu ki te mārama ki tō whakaaetanga retihanga [PDF, 788 KB]

He whakarāpopoto o te Residential Tenancies Act

Kei reira te Residential Tenancies Act hei whakahaumaru i ngā kairēti, i ngā kairetiwhare hoki, ā, e hāngai atu ana ki tēnā, ki tēnā e whai wāhi ana ki te rēti i tētahi kāinga.

Ka āwhina tō whakaaetanga retihanga i a mātou ki te whakarite e whakatutuki ana mātou i ngā here o te Residential Tenancies Act, ā, i ētahi wā ka whakamāramatia ngā kaupapa pērā i te wāhi e pai ana te whakatū i tō waka, ā, mēnā rānei e pai ana tō whai mōkai.

Me waitohu e kōrua ko tō Kaitoko Kāinga, ko tētahi atu mema rōpū nō Kāinga Ora, te Whakaaetanga retihanga i mua i tō hūnuku mai. Ka whakaritea hoki e mātou kei a koe tētahi tārua hei pupuri.

Ā mātou kawenga

Mēnā ka uru atu mātou ki tētahi whakaaetanga retihanga ki a koe, mā mātou:

• e whakarite he haumaru, he whita tō kāinga, ā, he pai tōna āhuatanga
• e whakatutuki tō kāinga i ngā tikanga hanga me ngā paerewa mō te hauora me te haumaru
• e whakarite kia whakamahia ngā whakatikahanga waiwai hei te wā tino tata ka taea
• e hoatu te whakamōhiotanga e 24 hāora i mua i te whakamahi i ngā mahi tautiaki kua whakamaheretia
• e hoatu te whakamōhiotanga e 48 hāora i mua i tētahi toronga ā-tau.

E haepapa ana a Kāinga Ora mō te tautiaki i tō papanoho engari kāore mātou i te haepapa mō te tūkinotanga, mō te ahi, mō te tāhae rānei i ō taputapu, i ō rawa rānei. E aki ana mātou kia whakarite koe i te rīanga taonga whare hei tiaki i tēnei.

Mēnā ki ō whakaaro kāore mātou i te whakatutuki i ā mātou kawenga, whakapā mai ki a mātou kia taea te mahi ngātahi hei whakatika.

Ngā kawenga kairēti

Mā te waitohu i tō whakaaetanga retihanga, kei a koe te tika ki te noho i te rangimārie, i te āhuru, i te tūmataiti o tō kāinga, horekau te kaitorohi mai a Kāinga Ora, a ētahi atu kairēti, kiritata rānei.

Hei kaireti a Kāinga Ora, e tono ana mātou kia pēnei koe:

• ka utu i tō rēti i te wā tika
• ka manaaki i tō kāinga, i tō whenua mā te whakarite kia tika tonu
• ka whakamōhio mai ki a mātou hei te wā tino tata ka taea ina hiahiatia te tautiaki
• ka tū haepapa mō te whanonga o ērā atu tāngata e noho ana i tō kāinga, e toro atu ana rānei. Ka herea pea koe mō te tūkinotanga ka pūtakea e rātou
• ka whakaute i te rangimārie, i te āhuru, i te tūmataiti hoki a ō kiritata

E hiahia ana mātou ki te āwhina i a koe kia noho haumaru ahi i tō kāinga. Ka taea hoki e koe te āwhina i a mātou mā:

• te whakamōhio mai ki a mātou hei te wā tino tata ka taea mēnā ka mutu te mahi a tētahi o ō pūoho auahi. Waea mai ki a mātou mēnā e pīpī ana tō pūoho, kāore he take - he mea nui kia kaua ngā pūoho auahi e tīkina iho, e tangohia rānei ngā pāteri, ā, ka taea e mātou te āwhina i a koe ki te whakatika.
• te whakamahere i te ara ki te paheko atu i tētahi ahi, me te whakarite:
  • ka noho wātea tonu ngā ara paheko (kāore ngā mea e puritia ana ki ngā kaupae, ki ngā kauhanganui hoki)
  • e wātea ana ngā kūaha puta auahi i ngā ārai
  • ka noho kati ngā kūaha whakahaere-auahi me te aukati-ahi, mēnā kei a koe ētahi.

Mēnā ka ngaro ō kī, kua rakaina atu koe i tō kāinga, e wātea ana koe ki te whakarite i tētahi ringarehe kī māu anō, engari he pai hoki te waea mai ki a mātou ki te hiahia āwhina koe.

Te tuku urupare

E hiahia ana mātou ki te āhei kia pai te noho i tō kāinga, nō reira tēnā whakamōhiotia mai mēnā kāore tētahi āhuatanga i te tika. He mea nui tō urupare ki a mātou nā te mea he mea āwhina ki a mātou ki te ako he aha me whakapai ake.

Arā ētahi ara māu hei whakapā mai, ā, ka whakapau kaha mātou kia whakahoki kōrero ki a koe i roto tonu i te rua rā mahi.