Te hūnuku atu

Mēnā ka hūnuku atu koe i tō kāinga nō Kāinga Ora, me homai ā-tuhi e koe te whakamōhiotanga mai o te 28 rā.

Ka pēnei mā te whakakī, me te tuku mai i tēnei puka ki a mātou: Notice to End Tenancy Agreement [PDF, 500 KB].

Te hūnuku ki tētahi atu whare a Kāinga Ora

Ki te hiahia koe ki te hūnuku atu ki tētahi atu whare a Kāinga Ora, ko te tīmatanga tino pai ko te waea mai ki tō mātou Pokapū Tautoko Kiritaki ki 0800 801 601. Ka kōrerorero tāua mō ō āhuatanga, kātahi ka rapu i ngā kāinga e wātea ana i tō rohe ka whakatutuki i ō hiahia. Ka tūhonoa ai ngā kāinga katoa nō Kāinga Ora ki ngā kairēti i runga i ō rātou hiahia, ā, he rārangi tatari kei te nuinga o ngā rohe, nō reira tē taea e mātou te kī taurangi ka taea e koe te hūnuku wawe.

Ki te rapu mātou i tētahi atu kāinga mōu, ā, ka waiho koe i tō kāinga kia mā, kāore he tūkinotanga, ā, kua utua katoatia ō utu, ka tono mātou ki Hīkina Whakatutuki(external link) ki te whakawhiti i tō monihere o nāianei ki tō kāinga hou. Ka whakarite hoki mātou kia whakawhitia ngā rēti kua utua tōmuatia e koe ki tō kāinga hou. Māu e whakarite tō nekehanga taputapu me te tūhono i tō waea, i tō hiko.

Ā muri i te whakamōhio atu ki a koe

I roto i te 48 haora o te whiwhi i tō pānui, ka tukuna atu he rārangi arowhai ki a koe hei āwhina i a koe ki te hūnuku atu me te whakarite i tētahi tirotirotanga whakamutunga kia pai ai te tirotiro i te Pūrongo Āhua o te Papanoho mai i te wā i kuhu atu koe. Mēnā me utu koe i ētahi whakatikahanga ki te kāinga, ka taea e mātou te āwhina i a koe ki te whakarite i ngā utu anō e hāngai ana ki tō pūtea kia ea ai i a koe i roto i te wā.

Ki te hiahia koe ki te wehe atu i mua i te mutunga o tō wā whakamōhiotanga e 28-rā, waea mai ki a mātou hei te wā tino tata ka taea. I ngā wāhi i reira he nui te hiahia ki ō mātou kāinga, ka taea pea e koe te wehe atu i mua atu mēnā he mā, he tika tō kāinga, ā, ki te whakaae mātou kia mutu tōmua te retihanga. Ina pēnei ai, me utu noa koe i te rēti tae noa atu ki te hūnuku mai te kairēti hou.

Ki te rerekē ō whakaaro

Ki te rerekē ō whakaaro, ā, kāore koe i te hiahia tonu ki te hūnuku atu, ka taea anake e mātou te whakaae kia noho tonu koe mēnā kāore anō mātou kia whakarite i ētahi atu takohanga, pērā i te waitohu ake i tētahi kairēti hou. Kei konei mātou hei āwhina atu, nō reira waea mai ki a mātou hei te wā tino tata ka taea mēnā ka huri ō āhuatanga.

Mēnā ka whakamutu a Kāinga Ora i tō retihanga

Mēnā me whakamutu a Kāinga Ora i tētahi retihanga, ka hoatu mātou i te whakamōhiotanga ā-tuhi e toru marama (e 90 ngā rā) i te itinga iho, ki te kore te Taraipiunara Retihanga e tuku i tētahi ōta e tuku ana i te whakamutunga.

Ina hoatu mātou i te whakamōhiotanga ki a koe, ka whakaritea tētahi wā hei toro atu ki te papanoho hei aromatawai i ngā whakatikahanga me mahi, i ngā tūkinotanga me whakatika i mua i tō hūnuku atu.

Mēnā i hūnuku tuatahi mai koe ki tētahi kāinga nō Kāinga Ora i mua i te Rātapu te 7 o Āperira i te tau 2019, nāu pea tētahi monihere i utu. Mēnā i pēnā, ka tono mātou ki ngā Ratonga Retihanga a Hīkina Whakatutuki(external link) hei whakahoki i te utu ki a koe ina kua whakaritea e mātou hei pai te āhua o tō kāinga, ā, kua utua katoatia ō utu.

Te tono i tētahi reta tautoko retihanga

Mēnā kei te hūnuku atu koe mai i tō kāinga a Kāinga Ora ki tētahi retihanga tūmataiti ka āhei koe ki te tono reta tautoko retihanga mai i a mātou.

Ka āwhina tētahi reta tautoko retihanga i te kairetiwhare tūmataiti ki te whakarite ki te kōwhiri i te kaireti tika mō tōna kāinga. Kei roto i ngā tono retihanga ko ngā mōhiohio whaiaro kia pai ai te tuku tohu atu ki te kiritaki a Kāinga Ora. Mēnā ka tono tō kairetiwhare, kaiwhakahaere whare rānei mō tētahi reta tautoko retihanga, me tono koe mai i a mātou kātahi ka tukuna atu ki a ia.

Ko te reta tautoko retihanga he reta tērā mai i a Kāinga Ora kua whai mea pērā i ēnei:

• Te roa o tō noho hei kiritaki a Kāinga Ora.
• Mēnā i pai tō tiaki i te papanoho kia mā, kia pai te āhua.
• Mēnā kei te nama tonu koe ki a Kāinga Ora.

Me pēnei tō tono mō tētahi reta tautoko retihanga:

1. Haere ki tā mātou puka 'Ngā uiui me te tuku whakaaro'
2. I raro i 'Ngā momo uiui' tīpakona a 'Tētahi atu'
3. Ki te pouaka kuputuhi whakamōhiotia mai kei te tono koe mō tētahi 'Reta Tautoko Retihanga'
4. Me mātua whakauru atu i tō ingoa whānui, te wāhi noho Kāinga Ora, me tētahi wāhi noho tuku mēra, wāhitau īmēra rānei kia pai ai te tuku atu i te reta tautoko retihanga.

Tono hunga kē hei kōrero mō tētahi reta tautoko retihanga

Mēnā ka hiahia tētahi hunga kē (pērā i tō kairetiwhare, kaiwhakahaere whare rānei) ki te kōrero mō tō reta tautoko retihanga ki a Kāinga Ora, me tono whakaae rā anō i a koe i te tuatahi.

Hei whakarite kia tukuna tō whakaae ki tētahi hunga kē, me whai i ēnei mahi:

1. Haere ki tā mātou puka 'Ngā uiui me te tuku whakaaro'
2. I raro i 'Ngā momo uiui' tīpakona a 'Tētahi atu'
3. I roto i te pouaka kuputuhi me whakamōhio mai kei te 'hiahia koe ki te whakaae atu ki tētahi hunga kē ki te kōrero mō tō reta tautoko retihanga ki a Kāinga Ora'. Kia maumahara ki te whakauru atu i tō tau waea, wāhitau īmēra rānei kia pai ai tā mātou whakapā atu me te āwhina i a koe ki te whakarite i tēnei.