Te tū hei kiritata pai
He wāhanga hira o te noho i tō hapori te tū hei kiritata pai. E aki ana mātou i ā mātou kairēti katoa kia tū hei kiritata pai.
Ka whakapau kaha mātou ki te tautoko i a koe hei kaireti me te tuku i tētahi kāinga pūmau ki a koe. Otirā, ko tā mātou e hiahia ana kia pai koe hei kaireti, hei kiritata hoki.
Hei āwhina ki te tautoko i tēnei, kua whakakahatia e mātou tā mātou aronga ki te whakahaere retihanga me te urupare ki ngā whanonga whakararuraru. Kei roto i ēnei momo whanonga e tino raru ai te haumaru, te whakararuraru tonu rānei i ētahi e tata ana ki a koe me te kore e aro ki ngā whakatūpato a Kāinga Ora.
Ina pā mai ngā whanonga whakararuraru, me mōhio koe ka whakamahia e mātou te Residential Tenancies Act ina hiahiatia kia rerekē ai ngā whanonga, ā, kia mārama hoki kaua rawa e kino te whanonga. Ki te kore e rerekē te whanonga, ka whakakorehia e mātou ngā retihanga mēnā e hiahiatia ana. Mēnā ka pērā, kāore e tukuna e mātou he kāinga anō ki a koe.
E mōhio ana mātou ko te nuinga o ā mātou kaireti he tāngata mahara, ā, he whakaaronui ki ō rātou kiritata. Mēnā ko koe tērā, kāore he tino pānga ki a koe o te āhua o tā mātou whakahaere i tō retihanga.
E pēnei ana te kiritata pai:
- he manawa popore – ka whakautehia ngā tika me te tūmataiti o ētahi atu
- he manawa rahi – ka mārama i a ia kei tēnā, kei tēnā ōna ake āhua o te mahi i ngā mahi, ā, he pai tonu tērā
- he pūaroha – ka kite atu ina raru tētahi mea, ā, ka mahia he mahi hei anganui atu
- he haepapa – mō ngā mahi a ō rātou whānau, a ō rātou manuhiri, a ā rātou mōkai
E tono ana mātou ki a koe:
- kia kōrerorero i ngā take ina puta he raru, kia whakarongo ki ngā tirohanga o ētahi atu, me te ngana kia tae atu ki tētahi whakaaetanga ka whaihua mō te katoa
- kia tiro koe i ngā papanoho o ngā kiritata ina noho rātou i wāhi kē me te pūrongo i ngā mahi ohiti
- kia noho tonu te turituri e puta mai ana i tō whare (he puoro, he pāti, he pūoho, he kurī, he waka, he aha atu anō) i te nui e pai ana, inarā i te pō
- kia manawanui i te tākaro ki waho a ngā tamariki a ngā kiritata
- kia wātea tonu ngā ara kuhunga ngātahi
- kia tika tonu te āhua o tō iāri.
Mātakitakihia ki raro hei mō ngā mea pai ki te mōhio mō te hanga i tētahi hapori ki ō kiritata.
Te whakatau raru
Ahakoa he pai tō hononga ki ō kiritata i te nuinga o te wā, ka puta pea he wā ka tautohe koutou. I te tuatahi me kōrero koe ki tō kiritata, nā te mea ka tau pea te nuinga o ngā raru i te matapaki pai.
I ētahi wā tē tau ngā raru i te kōrerorero. Ki te pēnei, me tīmata ki te tuhituhi i ngā taipitopito, tae atu ki ngā āhuatanga ka pā, ki ngā wā ka pā anō hoki. He mea āwhina pea tēnei kia mārama ai he aha kei te haere. Ka whaitake hoki ō tuhinga ki a koe mēnā me kōkiri tonu te take.
I ētahi wā me tono pea koe i te āwhina hei whakatau i ngā raru:
- Ki te whakaaro koe e mōrea ā-tinana ana tētahi, inarā ko te tamariki, waea wawe atu ki ngā pirihimana ki 111.
- Ko 111 te nama ohotata mō Ngā Pirihimana, mō te Ahi, mō te Waka Tūroro hoki.
- Ko 105 te nama mō Ngā Pirihimana mēnā ehara i te ohotata.
- Mēnā he raru ōu ki te turituri nui, ka hiahia pea koe ki te waea atu ki te Tari Whakahaere Turituri i tō kaunihera ā-takiwā.
- Mēnā he raru ōu ki ngā kurī, ka hiahia pea koe ki te waea atu ki te Tari Whakahaere Kararehe i tō kaunihera ā-takiwā.
Mēnā ka pūrongo koe i tētahi raru ki ngā mana, tēnā waea hoki mai ki a mātou ki 0800 801 601 hei whakamōhio mai ki a mātou mō te take.
He aha ka taea e Kāinga Ora?
Hei kairetiwhare, he here ō mātou ki ā mātou kaireti me ngā hapori e noho nei rātou. Arā, ka kōkirihia e mātou te take mēnā ka whakararuraru te tangata i te rongomau, te hāneanea, te tūmataitinga, te haumaru rānei o te hunga noho tata. He mea nui kia tōkeke tā mātou whai, ka mutu ina whiwhi amuamu mātou, ka kohia e mātou ngā whakaaturanga i te tuatahi kia mārama pai ai mātou i aha.
Ko ā mātou mahi kei te āhua o ngā āhuatanga. I ētahi wā me tuku tono e mātou ki ngā mātanga ratonga pāpori me te hauora hei āwhina ki te whakatika i ngā pūtake whanonga taketake. Ka whakamahia pea hoki e mātou ngā tikanga o te Residential Tenancies Act, pērā i ngā pānui whakatūpato, me ngā nekenga whakature, tūao rānei, ā, he whaitake ēnei hei āwhina kia rerekē ai te whanonga. Tērā hoki ngā wā ka mate pea mātou ki te whakauru mai i ētahi atu tari pērā i ngā Pirihimana.
Rapu mōhio atu anō mō te āhua o tā mātou whakahaere i ngā whanonga whakararuraru, whakapā mai rānei mēnā e hiahia āwhina ana koe me ngā raruraru o tō takiwā noho. Ka mahi tahi mātou ki a koe, ki ērā atu e whai wāhi atu ana hei whakatau i te raru.
Kua whakahoungia te whārangi: 4 Hōngongoi 2023