Te whakahaere i te whakakino nā te pōau-pī i ō mātou kāinga

He aronga pūtake-hauora

Pērā i ērā atu kairetiwhare, e aro atu ana a Kāinga Ora ki te take o te whakakino a te pōau-pī (meth) i ētahi o ō mātou kāinga.  He tino mārō tō mātou aronga ki tēnei.  E mōhio ana hoki mātou ko te take mātāmua o te whakamahi pōau-pī ko te hauora me te waranga, ā, ka pā pea ki ngā tāngata katoa o tētahi kāinga tūtahi, tae atu ki ngā tamariki.

Koinei te take, kua whai mātou i te aronga pūtake-hauora ki te whakahaere i te pōau-pī ka whakamātāmua ai i te whakarite kia ora te noho a ngā tāngata, a ngā whānau hoki i ō mātou nei kāinga.   

Mēnā e āwangawanga ana tā mātou kairēti ki te hauora me te oranga o te hunga i tōna kāinga tūtahi, ā, ka whakapae i te whakakino nā te pōau-pī pea, ka whakarite mātou kia whakamātauhia te papanoho. Ka whakarite hoki mātou kia noho tonu ngā kairēti ki te whare noho haumaru, whita hoki, i a mātou e whai ana i tētahi tukanga whakamātau me te whakawātea.

Kāore mātou i te whakaae ki te whakaputanga, ki te whakaratonga rānei o te pōau-pī i ngā kāinga e whakahaerehia ana e mātou, ā, ka tuku a Kāinga Ora i ngā whakaaturanga o te whakaputanga, o te whakaratonga rānei ki Ngā Pirihimana.

Ka whakarite hoki mātou kei ā mātou kairēti te mōhiohio mō te ara, mō te wāhi hoki ka taea te whiwhi tautoko, āheinga hoki ki ngā ratonga waranga pōau.

Te whakamātau me te whakawātea pōau-pī

Ina whai mōhio mātou ki te whakakino pōau-pī e whakapaetia ana ki tētahi papanoho, ā, he whaitake te whakapono he pono tēnei, ka whai mātou i tētahi tukanga mārō hei whakahaere i te whakamātau, i te whakawātea hoki mēnā ka hiahiatia. 

Ina whakaū ngā hua whakamātau i te whakakino pōau-pī o te neke atu i te 15 µg/100 cm2 mō te whakamahinga pōau-pī, ka whakatakea mai te hiahia mō te whakawātea o ngā wāhanga e pāngia ana o te papanoho.

Ka mahi mātou ki ngā kaikirimana ngaio, whai pūkenga hoki he mātanga ki te whakawātea pōau-pī.

Ngā pae pōau-pī

I te 29 o Mei i te tau 2018, i whakarewaina e tā te Pirimia Kaitohutohu Pūtaiao Matua o taua wā tētahi pūrongo e kīia nei ko ‘Methamphetamine contamination in residential properties: Exposures, risk levels and interpretation of standards’.

Ko tā te pūrongo "ko te huranga ki ngā taumata o te pōau-pī kei raro i te 15 µg/100 cm2 (15 karamu moroiti o te pōau-pī ki ia 100 mitarau pūrua o ngā mata ka tīpakohia) he tino iti nei te tūpono ka whakaputa i ngā pānga kino".

Nā Housing New Zealand (ināianei ko Kāinga Ora – Homes and Communities) i whakauru ngā kitenga o taua pūrongo, tae atu ki ēnei pae, ki te aronga ki te whakamātau, ki te whakawātea hoki i ngā papanoho e pāngia ana e te pōau-pī.

Whakapā mai

Mēnā e noho ana koe i tētahi whare a Kāinga Ora, ā, he āwangawanga āu mō te whakakino pōau-pī pea, tēnā toro atu ki tō Kaiwhakahaere Tautoko Whare Noho, waea mai rānei ki a mātou ki 0800 801 601 hei kōrerorero mō te whakarite i tētahi whakamātau.