Te takatū aituā me te ohotata

Te reo irirangi

Ki te weto te hiko, ka taea e tētahi irirangi hiko-kōmaru, hiko-pāteri rānei (te irirangi o tō waka rānei) te āwhina i a koe kia whai mōhio tonu ki ngā rongo kōrero hou. I te ohotata, whakarongo mai ki ēnei teihana:

• Te Reo Irirangi o Aotearoa
• The Hits
• NewstalkZB
• MoreFM
• Radio Live

ā-Tuihono

Mō ngā kōrero hou i tō takiwā, kei ngā paetukutuku a tō tātou Kaunihera, a Te Rākau Whakamarumaru hoki, kei te pāpāho ā-pāpori anō hoki te mōhiohio e hiahiatia ana kia noho haumaru tātou.

Me mōhio ki ō kiritata

He toa takitini te toa. I te ohotata, ka taea e koe te mahi ngātahi ki ō kiritata kia puta atu. Ka whakahui ngā rōpū Neighbourhood Support i ngā tāngata pātata hei whakarite kia haumaru, kia tautoko, kia hono ai ngā hapori.

I mua i te pā mai a tētahi pānga, tūhono ki a Neighbourhood Support ki neighbourhoodsupport.co.nz(external link) waea rānei ki 0800 463 444.

Matohi waea pūkoro ohotata

Mēnā e taea ana e ā tātou waea te whiwhi i ērā, ka taea e ngā pokapū kua whakamanatia pērā i a Te Rākau Whakamarumaru te tuku i ngā Matohi Waea Pūkoro Ohotata. Ka taea te whakawhāiti i ēnei ki ngā wāhi kua pāngia e ngā mōrearea taumaha.

Me kā noa te waea, me āhei, ā, me noho i roto tonu i te wāhi e arohia ana kia whiwhi i ngā matohi. Kāore he taupānga, he ohauru rānei e hiahiatia, ko tā tātou noa iho he whakahou tonu i ā tātou waea.

He hongere tāpiri hoki ngā Matohi Waea Pūkoro Ohotata hei āwhina kia noho haumaru te hunga mēnā ka pā tētahi ohotata. Kāore ēnei i te whakakapi i ērā atu matohi ohotata. Ki te rongo koe ānō nei e mōrearea ana tō ora, kaua e tatari ki te whakatūpato ōkawa. Kia wawe te mahi.

Rapua ētahi atu kōrero ki www.civildefence.govt.nz(external link)

Whakaritea he mahere

I Aotearoa, ka pā pea ngā ohotata i ngā wāhi katoa, i ngā wā katoa, horekau he whakatūpato. Ina pērā, ka nui te mahi a Te Rākau Whakamarumaru me ngā ratonga ohotata hei āwhina i ngā tāngata ka tino hiahia ki a rātou.

Ko ngā waipuke, ko ngā āwhā, ko te huarere kino, ko ngā rū whenua, ko ngā puia, ko ngā tainiwhaniwha, ko ngā horowhenua hoki ka whakararu mai i ō tātou nei ao, ka tūkino i ngā rawa, i ngā papanoho, ā, ko te tūkinotanga taumaha pea te mutunga iho.

Ko te rongo pai, he māmā kia whakarite kua takatū koutou ko te hunga e arohaina ana e koe kia puta atu.

Kōrero ki tō whānau, ki ō hoa, ā, whakaritea ka ahatia e koutou i ēnei āhuatanga:

• Kua mau ki te kāinga
• Tē taea te hoki ki te kāinga
• Me mātua whakatahi atu
• Kāore he hiko
• Kāore he wai
• Kāore he waea, he ipurangi rānei

Ka kapi i te mahere pai ngā mea e hiahiatia ana mēnā kua mau tātou ki te kāinga, me tūtakitaki ki hea ki te kore e taea te hoki atu ki te kāinga, ā, ki hea haere ai mēnā me wawe te wehe atu i te kāinga. He mea nui te whakahoahoa ki ō tātou kiritata, ā, ka āwhina pea i tētahi hapori kia whiriwhiri ko wai e taea ana te āwhina i a tātou, ā, ko wai ka hiahia pea ki tā tātou āwhina.

Rapua ētahi atu kōrero me te whakarite i tētahi mahere ki www.happens.nz(external link)