Tuku whakaaro mai, tuku amuamu mai rānei
Ko te tikanga he kiritata pai ngā kaireti a Kāinga Ora, ka mutu he wāhi pai ngā hapori mō te noho – me te aha he pērā te nuinga.
Engari i ētahi wā ka pupū ake he raruraru, nō reira ki te pērā ka tere tonu mātou ki te rapu i te whānuitanga o te kōrero i aha, ka tahuri ki te hāpai mēnā e hiahiatia ana.
Kei reira ētahi ara mō te whakapa mai ki a mātou - ka kitea ēnei i raro i Whakapā mai.
Mēnā e hiahia ana koe ki te amuamu tuihono me whakamahi i tā mātou Puka whakaaro me ngā uiui, ka tīpako noa i te 'Amuamu' i raro i te 'Momo uiui'
Ina whakapā mai koe ki a mātou mō tētahi raruraru kua pā ki a koe, kei reira ētahi mōhiohio hira me whiwhi mātou kia pai ai te tūhura. Me whakamōhio mai ki a mātou:
- He aha te raruraru, ā, he pēhea te hāngai ki a Kāinga Ora
- Mēnā kei te whakapā mai koe mō tētahi whare ake o Kāinga Ora, me whakamōhio mai i te wāhi noho
- Mēnā kei te whakapā mai koe mō tētahi āhuatanga ake, me whakamōhio mai:
- I te rā me te wā i pā mai te āhuatanga
- Ko wai te hunga kei roto
- Ētahi atu mōhiohio hāngai ki ōu whakaaro ka āwhina pea i a mātou ki te whakatau i te raruraru.
E tūtohu ana mātou kia tukuna mai anō e koe tō ingoa, tō wāhi noho me ō taipitopito whakapā. Ko te tikanga o tēnei ka whakapā atu anō mātou ki a koe ki te kōrero atu kei te aha mātou mō te āhuatanga, te tuku pātai anō mēnā e hiahiatia ana. Engari, ka taea e koe te noho muna mēnā ka hiahia koe.
He mea nui ki a mātou ngā amuamu, ā, ka kakama tonu mātou ki te rapu i te kōrero whānui i aha hei āwhina ki te whakatau i te take. Ko ā mātou mahi kei te āhua o ngā āhuatanga, ā, e aro ana mātou ki te whakarite i tētahi putanga tika.
E mōhio ana ā mātou kaireti ki ngā here kei runga i a rātou hei kaireti, hei kiritata hoki. Ki te kore e ū ki ēnei herenga, ka whakamahia e mātou ngā tikanga i raro i te Residential Tenancies Act (RTA) kia rerekē ai ō rātou whanonga. Mā te RTA ka āhei ngā kairetiwhare ki te kōkiri i te take kia mārama ai kāore i te pai taua whanonga, te neke kaireti me te whakakore retihanga.
Ina whakamahi i te RTA, kei reira te hātepe hei mātua whai mā ngā kairetiwhare. Ahakoa he roa pea tēnei, me mātua whai mātou i te hātepe tika.
Ahakoa e whai ana mātou ki te whakamōhio haere i a koe i roto i tēnei hātepe, he mea nui kia mōhio koe he whāiti ngā mea ka taea e mātou te tuku ki a koe i raro i te Ture Matatapu. Arā, kāore e āhei mātou ki te tuku mōhiohio mō ngā mahi tauwhāiti i whai mātou, ngā mahi whai ake rānei.
E mārama ana mātou ka hōhā pea koe i tēnei engari me mōhio koe kei te tino whakapau kaha mātou kia wawe te whakatau i ngā raruraru. Ahakoa he ahurei ngā mahi ake ka whāia e mātou mō ia āhuatanga, kei roto pea i ērā ko te:
- Kōrerorero ki ā mātou kaireti mō te āhuatanga me ngā mea ka taea e rātou hei whakatau i te āhuatanga – i te nuinga o te wā mā tēnei noa iho kua tau taua āhuatanga.
- Tuku tautoko whaikiko ki ngā kiritaki hei āwhina i a rātou ki te āwhina ki te whakatau i ngā raru mō ngā para, mahi tautiaki rānei.
- Tūhono i ngā kaireti ki ngā tari tautoko hei whakarite i te pūtake o te raruraru.
- Whakamahi i ngā tikanga i raro i te Residential Tenancies Act ina hiahiatia, tae atu ki tuku pānui takahi tikanga, whakatūpato rānei.
- Ina whiwhi mātou i tētahi amuamu, ko te whāinga kia whakamanahia tērā i roto i te rua rā mahi me te whakapā haere ki a koe i a mātou e tirotiro ana i te āhuatanga.
Mēnā kei te tatari koe mō tētahi kōrero, me whakapā mai ki tā mātou rōpū Tautoko Kiritaki i 0800 801 601 kia pai ai tā mātou whaiwhai ake me te rōpū o te rohe.
Tērā ētahi āhuatanga he pai ake te whakapā atu ki tētahi atu tari ki te āwhina, i mua i te whakapā atu ki a Kāinga Ora. Ka uru ki tēnei:
- Mēnā ki ōu whakaaro kei te noho mōrearea tonu te tangata, me waea tonu atu ki 111
- Mēnā kei te māharahara koe mō ngā mahi kino pea, me whakamōhio atu ki ngā Pirihimana i 105
- Mēnā ko te turituri te raruraru, me whakapā atu ki te tari whakahaere turituri i tō Kaunihera
- Mēnā ko ngā kurī te raruraru, me waea atu ki Animal Control i tō Kaunihera
- Mēnā kei te māharahara koe mō te ora o ngā kararehe, he mōkai rānei kua whakarērea, me whakapā atu ki te SPCA tūtata.
Ina pūrongohia e koe tō māharahara ki tētahi o ēnei whakahaere, me whakapā mai ki te whakamōhio mai kei te aha, ā, kua whakapā atu koe ki ētahi atu mana. Ko te tikanga o tēnei i tua atu i tā mātou whaiwhai ake i ō māharahara, ka taea hoki e mātou te toro atu ki te tari tika ki te rapu mōhiohio atu anō mēnā e hiahiatia ana.
Kua whakaurua mai e mātou tētahi aronga hou hei whakahaere i ngā whanonga whakararuraru, ā, ko tōna kaupapa ko te noho mārō me te tōkeke, me te tōtika ake o te whakamahi i te Residential Tenancies Act (RTA) kia rerekē ai te whanonga, kia mārama hoki te whakaita i ngā whanonga whakararuraru.
E pūmau ana mātou kia pai mātou hei kairetiwhare. Kei roto i tēnei kia taurite i waenga i ō mātou kawenga ki ā mātou kiritaki – he uauatanga tonu mō ētahi – me te whakarite kei te pai ētahi atu i roto i te hapori. He mea hanga tā mātou aronga hou kia tutuki tēnei tauritenga.
Ahakoa ka mārama tonu mātou ki ngā āhuatanga o ā mātou kaireti me te whakapau kaha kia mōhio ai he aha e pērā ai ō rātou whanonga, e mārama ana te kōrero ki ā mātou kaireti ka raru tā rātou retihanga i ngā mahi whakararuraru nui.
Kua whakaurua mai e mātou tētahi tikanga mō ngā āhuatanga ka raru te haumaru i ngā mahi a te kaireti, he whakararuraru me te tohetohe rānei, ā, kāore e aro ake ki ā mātou whakatūpato. I ēnei āhuatanga, ka tono mātou ki te Taraipiunara Retihanga kia whakakorehia te retihanga – ka mutu kāore e whakaratoa e mātou he kāinga anō mō rātou.
E aro ana ēnei huringa hei whakarite i ngā whanonga whakararuraru tino taumaha. He iti noa te nuinga o ngā raru e whakapā mai ana te tangata arā ko aua raru noa i waenga i ngā kiritata puta noa i te motu, pērā i te turituri o ngā motukā, kāore i te topea auautia ngā otaota, te nui rānei o te hāereere ake o ngā manuhiri ki tētahi kāinga. Ka whakaritea tonutia e mātou ēnei momo māharahara puta noa i ā mātou whakahaere onāianei.
Rapu kōrero atu anō mō tā mātou kaupapa whakahaere i ngā whanonga whakararuraru.
Kei Kāinga Ora e ū ana mātou ki te whakatinana i ō mātou uara me ā mātou paerewa mō te ngākau pono me te whanonga. E mōhio ana mātou arā pea ētahi wā ka whakamōreatia ēnei, ka pā rānei he āhuatanga ka whakatakea mai i te tūkino, i te rauhi rānei ki ētahi atu, ā, me tika te anganui ki ēnei, arā, te rēti anō i ō mātou kāinga, te whakamahi hē i ngā hua ā-ahumoni, te whakakonuka, te keiā, ngā pānga taupatupatu.
E pai ana tō pūrongo i te mahi tinihanga e whakapaetia ana e ā mātou kaimahi, e ā mātou kairēti, e ā mātou kaikirimana rānei mā te
- waea ki: 0800 8355 469 – e 24 hāora, e 7 ngā rā i te wiki, tērā rānei te
- īmēra ki: integrityservices@kaingaora.govt.nz
Kua whakahoungia te whārangi: 12 Hōngongoi 2024