Ngā taiepa

E ai ki te āhuatanga o tēnā me tēnā, ina whakarite ana tētahi rangatira whare ki te whakatū taiepa hou, te whakapaipai rānei i tētahi taiepa i waenga i tō mātou papanoho me tōna, ka whakaaroaro a Kāinga Ora ki te tautoko atu ki te haurua o ngā utu.

I mua i te tīmatanga, o ngā mahi, me mātua whiwhi mātou i tētahi tono ā-tuhi me ētahi mōhiohio tauwhāiti mō te taiepa e whakatūria ana.

Ka noho te whakarite mahere me te whakaritenga o ngā mahi ki te rangatira whare, engari he paerewa iti rawa ā mātou mō te haumaru me te kounga.

Ko te mea pai ake ki a Kāinga Ora ko ngā taiepa papa, hōpua kaukau rānei, kia kaua e teitei atu i te 1.2 mita engari ka whakaarohia ētahi atu momo taiepa mēnā e tika ana, ā, he pai te utu.

Ngā mea me tuku e koe ki a Kāinga Ora

Me tuku mai e koe ngā taipitopito e whai ake nei ki a mātou:

• tō ingoa me ngā taipitopito whakapā
• tō wāhi noho whānui tae atu ki te tāonenui me te tapatāone, me te wāhi noho o te papanoho Kāinga Ora
• he tauira, he whakaahua ā-rangi rānei me ngā tohu e whakaatu ana i te rārangi paenga/wāhanga o te rārangi paenga ka whakakapihia e koe, te whakatū taiepa hou rānei
• ngā whakaahua o te āhua onāianei o te taiepa/paenga (o te kore rānei)
• te momo taiepa e takune ana koe kia hanga (tae atu ki tōna roa, ki tōna teitei, ki ngā rawa ka whakamahia, ki ngā taipitopito o ōna waewae hoki)
• he aha te utu o te taiepa, ā, mēnā e hiahia ana koe i tētahi wāhanga tautoko mai i a Kāinga Ora, mēnā ae, e hia te utu
• kia rua ngā whakatau utu mai i ngā ngaio whai pūkenga mō te mahi i te taiepa e hiahia ana koe kia mahia.

Oti ai tō kohi i ēnei mōhiohio ka taea e koe te:

• īmēra: PropertyManagementService@kaingaora.govt.nz
  tērā rānei
• pōhi ki:
  Property Management Service Team
  Kāinga Ora - Homes and Communities
  National Office
  PO Box 2628
  Wellington 6140

Ina whiwhi mātou i tō tono ka whakarite mātou kia haere atu ki te tirotiro i te wāhi e hiahia ana koe kia tū te taiepa. Mēnā ka whakaae mātou ki ngā taipitopito o tō tono, ka tukuna atu e mātou he reta whakaae i roto i te 21 rā mahi. Ki te kore, ka whakapā atu mātou ki a koe ki te kōrero mō tō tono me ētahi kōwhiringa kē.

Ngā whakatakotoranga hoahoa noa

Me mātua ū te taiepa e marohitia ana ki Ngā Tikanga Hanga, ā, me mātua ū ki ngā whakaritenga hanga taiepa iti rawa a Kāinga Ora.

• Ngā whakatakotoranga taiepa [PDF, 163 KB]

Ngā taiepa ara kuhunga

Hei whakarite rārangi kite kia kite ai ngā kaitaraiwa i ngā tamariki, e tūtohua ana mō ngā wāhi e rere ana te taiepa i te taha o tētahi arakuhu, kuhunga rānei, kia whai rārangi kite te taiepa i ngā taha e rua o te arakuhu ina tata atu ki te ara hīkoi. 

Mā te whakaheke i te teitei kia kaua e teitei ake i te 1.2 mita, te whakatū taiepa e kitea atu ai tērā taha pērā i ngā taiepa hōpua kaukau, ka whakaiti i te mōrea ki ngā tamariki mai i ngā waka e taraiwa whakamuri ana.

Ngā taiepa papa

Me whakamahi i ngā papa paina H3.2 ki te Paerewa o Aotearoa NZS 3602, taumata tauhokohoko ki te NZS 3631, H4 kua whakaukatia mō te pā ki te whenua.

Ngā taiepa ki te 1.2 mita te teitei

• Ngā pou: 100mm x 75 mm, 600mm te mōkito, ka whakanohoia ki te raima.
• Ngā rēra: Ngā rēra e rua, ko ia rēra te 100mm x 50mm whakawhiti i te mata o ngā pou.  Me whakaū ngā rēra ki ia pou ki te whaowhiri kōti kua whakakonuteatia (galvanised coach bolt) 12mm me te mōria e kuhu ana mā tētahi hono tapa (halving joint). Me whakamau ā-tapa ngā rēra.
• Ko ngā tīwata (paling) katoa me 50mm atu i te papa.

Ngā taiepa ki te 1.8 mita te teitei

• Ngā pou: 100mm x 100 mm, 700mm te mōkito ki te raima.
• Ngā rēra: Ngā rēra e toru, ko ia rēra te 100mm x 50mm whakawhiti i te mata o ngā pou.  Me whakaū ngā rēra ki ia pou ki te whaowhiri kōti kua whakakonuteatia 12mm me te mōria e kuhu ana mā tētahi hono tapa. Me whakamau ā-tapa ngā rēra.
• Ko ngā tīwata katoa me 50mm atu i te papa. 

Ngā taiepa hōpua kaukau

• Ko ngā wahanga maitai katoa me whakakonutea mā te toutou wera ā muri i te hanganga.  Kāore i te whakaaetia te whakakonutea ā-hiko, i mua rānei.
• Me kaua e whakamahi ngā tihi koi, ngā taratara rānei ki ngā papa.
• Me maitai waikura-kore ngā whakamau.
• Me whakakonutea ā-tou wera te pou, me rākau rānei pērā i te taiepa ā-rākau.
• Ko ngā taiepa kua kākahuria ki te konganuku papa me te tihi koi me whai i tētahi uhi pītongatonga (flashing) U e whita ana te whakamau e huripokina ana i runga i te tapa o runga hei ārai i te whara.

Ngā taiepa raima

Me hanga ngā taiepa raima i runga i te tūāpapa raima e ū ake ana ki te Tikanga Hanga. Me āhei te tūāpapa ki te ārai i te huringa o te taiepa mō te roanga atu e takunetia ana kia tū ake te taiepa.