5. Te whakatau

Ngā mihi! Kua herekore tō tukunga. He torutoru noa ngā mea hei whakatutuki māu ināianei i mua i tō whiwhi i ngā kī ki tō kāinga.

Koinei ngā mea me tutuki i a koe i mua i te rā whakatau:

• Whakapūmauhia ō taipitopito pūtea taurewa whare - Ina whakaūngia tō rā whakatau, me whakapā atu ki tō pēke, kaituku, kaitakawaenga mōkete rānei ki te whakapūmau i tō pūtea taurewa whare. Māna e whakamārama i te momo pūtea taurewa me ngā kōwhiringa hanganga ki a koe, te whakaū i tō pāpātanga huamoni me te whakarārangi i tō hōtaka utu.
• Te whakarite inihua mō tō kāinga - Kāore e kore me whiwhi inihua kāinga koe mai i te rā tuatahi ka whiwhi koe i tō kāinga, ā, he here tēnei i raro i tō pūtea taurewa ka mutu me whakauru atu pea koe i tō pēke, tō kaituku rānei ki tō inihua. Ka tono anō pea tō rōia me tō pēke, tō kaituku rānei i ngā kape o tō inihua i mua o te whakatau.
• Tō tirotirotanga i mua o te whakataunga - He wāhanga tēnei mōu ki te tirotiro i te whare i mua i te tino riro mai i a koe, me te whakarite kāore i te tūkinohia te papanoho mai i tō waitohu i te whakaaetanga hoko. I te nuinga o te wā ka whakaritea tēnei mā te kaihoko, tana kaihoko whare rānei, ko te tikanga i te 2 rā i mua o tō rā whakatau.

Mēnā ka kitea e koe he raruraru i a koe e tirotiro haere ana, me whakamōhio atu ki te kaihoko whare ka whakapā atu ki tō rōia, tō māngai whakawhiti rānei me te rārangi o ngā mea me whakaoti i mua o te whakatau.

• Te whakatau i ngā pūtea e toe ana - Ka whakamōhiotia atu koe e tō rōia mēnā me whakawhiti he pūtea, te nui me te wāhi hei tuku atu.

Kia kore ai e takaroa, ko te tikanga mā tō rōia koe e whakamōhio atu mō ngā mea katoa me oti i a koe i mua o te rā whakatau, ā, māna e whakatutuki ētahi atu mea katoa mōu. Māna e:

• whakaū kua ea i a koe ngā pūtea e tārewa ana
• whakamōhio atu ki tō pēke, kaituku rānei e hia te nui o te moni hei whakatau i te hokotanga
• whakarite kia whakawhitia tō pūtea taurewa me te utu i te kaihoko
• tirotiro mēnā kua utua ngā reiti e te kaihoko, ā, mēnā kua ea katoa
• mahi me te rōia a te kaihoko ki te whakatutuki i te whakawhitinga o te whare
• rēhita i te whare me te tuhi i te taitara ko koe te rangatira.

Me tutuki ēnei mahi mā tēnei raupapa, ki te tōmuri i tētahi wāhanga ka tōmuri pea te whakataunga. Ina whakamōhiotia atu koe e tō rōia kua tutuki te hoko, kua pai tō neke ki roto i tō whare hou. Ka roa pea te ra i te wa e whakariteritehia ai nga mea katoa, no reira he pai ki te tuku i tetahi atu ra i mua i to whakaaro ki te neke ki roto.

Te rapu āwhina ki te tūpono hē tētahi mea

He māmā noa iho te hātepe whakataunga, ā, ka rere pai i te nuinga o te wā. Mēnā he āwangawanga ōu ahakoa te wāhanga, me whakapā atu ki tō rōia, tō mātanga whakawhiti rānei mō ngā āwhina. Māna e whakautu ō pātai me te whakamōhio atu ki a koe kei te pēhea te haere.

Tino pai! I whai koe i ia wāhanga o te huarahi me ōna piki me ōna heke. Me whai koe ki te whakamihi ki a koe me te whakanui hoki e ai ki tōu hiahia – ka tika tonu!

Te whakarite i tō whare hei kāinga - Kua tutuki i a koe! Nā, koinei te wā mō te whakatā, te whakaparohe me ōna painga o te whai whare. Ko tēnei wāhi nōu ake, tō hapori hei tirotiro, hei pārekareka. Ko tēnei kāinga tō kōhanga mō te āhua katoa o tōu ao.

Te āta uru haere ki tō hapori - Mā ētahi mahi iti noa ka tino whaihua koe i tō takiwā noho, ā, e tau ai koe i tō kāinga.

Me mōhio koe ki te takiwā mā te tiro i te paetukutuku a tō kaunihera, te kōrerorero rānei ki ō kiritata kia mōhio ai ki ngā mea pērā i ngā rā rāpihi me te tukurua, te whare pukapuka me ngā haora pokapū hapori, mēnā he whārangi pāpāho pāpori hapori rānei hei whai māu.

Anei ētahi hono paetukutuku whaikiko hei āwhina i a koe me te mahi "Te whakatau".

• Rārangi arowhai – Te whakatau [PDF, 154 KB]
• Rārangi arowhai - Mō te hūnuku atu [PDF, 78 KB]

Rauemi whakatau:

• Rārangi arowhai – Te tata haere atu ki te whakataunga mō te hunga hoko whare(external link)